ՍՏԵՓԱՆԱԿԵՐՏ, 12 նոյեմբերի, ԱՐՑԱԽՊՐԵՍ: Ծննդյան   50-ամյակի   կապակցությամբ   հեղինակը հրատարակել  է     «Հաղթահարում»  վերնագրով  գիրքը, որը   նվիրել  է  իր  կնոջը՝  Սիրվարդ  Բեգլարյանին:

 «Արցախպրես»-ի   թղթակցի  հաղորդմամբ՝  միջոցառմանը   բացման  խոսքով  հանդես  է  եկել    ԱՀ  գրողների  միության    նախագահ   Վարդան  Հակոբյանը:

Նա   ասել է, որ Ա. Բեգլարյանը  նոր   շունչ  է  հաղորդել    Արցախի  գրական   ընտանիքին:

«Հայ  իրականության  մեջ  նա  ունի  իր  ուրույն  ձեռագիրը, ոճը, մտածելակերպը: Նրա  ստեղծագործություններում   վավերագրական  տարրը   բավականին  զգալի  է  և   այդ ամենն  Ա. Բեգլարյանը  կարողանում  է   գեղարվեստորեն    ներկայացնել   ընթերցողին: Նա  Արցախի  գրողների  միության  երջանկահիշատակ    բանաստեղծ  Էռնեստ  Բեգլարյանի  որդին է: Գրողն  իր   մարդկային   տեսակով, համեստ բնավորությամբ      սիրված  ու  հարգված  է  բոլորի  կողմից: Նա   արցախյան  շարժման  առաջամարտիկներից  է, հայրենասեր  ու  իր  գործին  նվիրյալ մարդ: Ա.  Բեգլարյանն  ինչպես  Արցախում, այնպես  էլ  արտերկրում  մեծ    ճանաչում  և  հարգանք  է  վայելում   շատերի  կողմից»,-ավելացրել  է Վ. Հակոբյանը:

 Բանաստեղծ  Սոկրատ  Խանյանը, խոսելով  Ա.  Բեգլարյանի  մասին,  ընդգծել է, որ   չնայած   արձակագիրը ռուսերեն  է   ստեղծագործում, սակայն  արտահայտման   ոգին, գաղափարը, հոգեբանությունը  հայկական  են:

«Ա.  Բեգլարյանը  բավականին   լուրջ  և   գրագետ  արձակագիր է, ում  ի  վերուստ   տրված  էր  այդ   շնորհը: Նա    իր   ստեղծագործություններում   ներկայացնում  է  հայկական   սովորությունները, մեր   առօրյան   ու  կյանքը: Իր  մարդկային  եզակի  տեսակով  կարողանում  է ամենուր   սեր  ու հարգանք  վայելել»,-մասնավորապես  ասել  է  Ս. Խանյանը:

Միջոցառմանը   ռուս  բանաստեղծ  Վիկտոր  Կոնոպլյովը  տեսակապով    շնորհավորել  է   գրչընկերոջը՝  ասելով, որ   իր  և  Աշոտի   ընկերությունը, որն  արդեն  վեր է   ածվել   բարեկամության,   տարիների  պատմություն  ունի: 

«Շնորհիվ  Ա.  Բեգլարյանի՝  ես  մոտիկից  ճանաչեցի  Արցախը  և  արցախցիներին: Ա.  Բեգլարյանը  տաղանդավոր  գրող  է, ով  նրբորեն  է ներկայացնում  իր  պատմածքների  յուրաքանչյուր   բառը: Արցախը   արտերկրում  ներկայացնելու  գործում   մեծ  ներդրում  ունի  նաև Ա.  Բեգլարյանը».-ասել է  Վ.  Կոնոպլյովը:

Գրող, լրագրող  Ալբերտ  Ոսկանյանի  խոսքով էլ   ինքը   Ա.  Բեգլարյանի   շնորհիվ  է  սկսել է  ստեղծագործել:

«Նա  սրտաբաց,  կամեցող, հարահաս լավ  ընկեր  է, Էությամբ  անշահախնդիր մաքուր մարդ: Նրա  ստեղծագործությունների  հերոսները  մեր   շրջապատի  մարդիկ  են, միջավայրը՝ մեր  կյանքը:  Ա.  Բեգլարյանն անցել է  պատերազմի  թոհ  ու  բոհով, կորցրել   շատ  ընկերներ  ու  հարազատներ: Պատահական  չէ, որ  նա  հիմնականում  ստեղծագործում  է  պատերազմական  թեմաներով: Նրա ստեղծագործություններում ագրեսիվություն  չկա, դրանք  մարդասիրական   ու   խաղաղասիրական  են: Նա  իր  գրվածքներով     ոչ   է ասում  պատերազմին»,-ընդգծել  է  Ա.  Ոսկանյանը:  

Միջոցառման  վերջում  Աշոտ  Բեգլարյանն  իր   խորհին  շնորհակալությունն է   հայտնել  բոլորին  բարի  մաղթանքների  համար:

«Այսօր   իմ  հետ  էր  նաև  ռուս  գրող  Վիկտոր  Կոնոպլյավը, ում   հետ  ոչ  միայն  ընկերություն  ենք  անում, այլև՝   հանուն  Արցախի, մի  ընդհանուր   գործի  ենք  լծված: Ինձ  համար  հասարակ, մարդկային  ջերմությունն   ամենաթանկն  է: Եկեք  միշտ  օգնենք  միմյանց  և  լավ  ու  վատ  օրերին  միշտ  իրար  նեցուկ լինենք»,-նշել է   Ա. Բեգլարյանը:

Ելույթներով  հանդես  են  եկել   նաև  գրողի գրչընկերները, մտերիմները, ուսանողները  և  այլք:  

Նշենք, որ Աշոտ Բեգլարյանը ծնվել է 1968 թվականին, Ստեփանակերտում։ Սովորել է Երևանի պետական համալսարանի ռուսաց լեզվի և գրականության ֆակուլտետում։ Տպագրվում է 19 տարեկանից։ Ստեղծագործում է հիմնականում ռուսերեն։ Ա. Բեգլարյանի պատմվածքներն ու ակնարկները հրապարակվել են գրական, հասարակական-քաղաքական հրատարակչություններում Ստեփանակերտում, Երևանում, Մոսկվայում, Սանկտ Պետերբուրգում, Դոնի Ռոստովում, Նովոչերկասկում, Նիժնի Նովգորոդում, Տոմսկում, Աբխազիայում, Վրաստանում, Ղազախստանում,Ուկրաինայում, Բելառուսիայում, Բուլղարիայում, Սլովակիայում, Կանադայում, ԱՄՆ-ում, Մեծ Բրիտանիայումև այլն։Աշոտ Բեգլարյանը հանդիսանում է տասնյակ գրքերի թարգմանիչ և խմբագիր։Ռուսաստանյան ազգային գրական «Տարվա գրող» 2015 և 2016 թվականների մրցանակի դափնեկիր է:Վերջերս ԱՀ նախագահ Բակո Սահակյանի հրամանագրով Աշոտ Բեգլարյանը Արցախի տեղեկատվական դաշտում բազմամյա արդյունավետ աշխատանքի և 50-ամյակի կապակցությամբ արժանացել է  «Լեռնային Ղարաբաղի Հանրապետության վաստակավոր լրագրող» պատվավոր  կոչման: