Ստեփանակերտի Գրիգոր Նարեկացի համալսարանում տեղի է ունեցել հեռավար ինտերակտիվ ուսուցման կաբինետի բացման արարողություն:
Գրիգոր Նարեկացի համալսարանում բացվել է հեռավար ինտերակտիվ ուսուցման կաբինետ
ՍՏԵՓԱՆԱԿԵՐՏ, 12 նոյեմբերի, ԱՐՑԱԽՊՐԵՍ: Կաբինետի բացման պատիվը տրվել է համալսարանի ռեկտոր Վարդան Հակոբյանին:
«Արցախպրես»-ի թղթակցի հետ զրույցում Վ. Հակոբյանն ասել է, որ հեռավար ինտերակտիվ ուսուցման կաբինետը Գրիգոր Նարեկացի համալսարանի ուսանողներին և դասախոսներին հնարավորություն կտա կապ հաստատել ամերիկյան և մոսկովյան առաջատար բուհերի հետ:
«Գրիգոր Նարեկացի համալսարանն արդեն համագործակցության պայմանագիր ունի կնքած Երևանի Մանուկ Աբեղյանի անվան գրականության ինստիտուտի և Լոս Անջելեսի Կալիֆոռնիայի համալսարանի հետ: Կաբինետն ամբողջությամբ համալրված է նոր սարքավորումներով: Մեր համալսարանի ուսանողները հնարավորություն կունենան պարբերաբար շփվելու աշխարհի տարբեր երկրների ուսանողության հետ, ծանոթանալ նրանց դասապրոցեսներին, կրթական ծրագրերին: Մեր երկրի համար կրթությունը ռազմավարական նշանակություն ունի, և, կարծում ենք, որ այս կաբինետը խթան կհանդիսանա, որ մեր ուսանողների կրթության որակն էլ ավելի բարձր հիմքերի վրա դրվի»,-ավելացրել է Վ. Հակոբյանը:
Նշենք, որ ԱՀ գրողների միության նախաձեռնությամբ Ստեփանակերտի Գրիգոր Նարեկացի համալսարանի նորաբաց հեռավար ինտերակտիվ ուսուցման կաբինետում կայացել է Արցախի, Հայաստանի և Ռուսասատանի գրողների միության անդամ, արձակագիր, լրագրող, թարգմանիչ Աշոտ Բեգլարյանի գրական գործունեության 30 և ծննդյան 50-ամյակներին նվիրված միջոցառում:
