ԱՀ և ՀՀ առողջապահության նախարարությունների համատեղ նախաձեռնությամբ և Հայ օգնության միության (ՀՕՖ) ֆոնդի աջակցությամբ Ստեփանակերտի «Արևիկ» մանկական բուժմիավորմում այսօր ավարտվել է ընտանեկան բժշկության վերապատրաստման ծրագիրը:
«Արևիկ» մանկական բուժմիավորումում ավարտվել է ընտանեկան բժշկության վերապատրաստման ծրագիրը
ՍՏԵՓԱՆԱԿԵՐՏ, 13 նոյեմբերի, ԱՐՑԱԽՊՐԵՍ: Ծրագրին մասնակցել է Ստեփանակերտի և ԱՀ բոլոր շրջանների բուժմիավորումներից 42 բժիշկ:
«Արցախպրես»-ի թղթակցի հետ զրույցում Հայ օգնության միության ֆոնդի առողջապահական ծրագրերի ղեկավար Համբարձում Սիմոնյանն ասել է, որ սկսած 2011 թվականից Ամերիկայի հայ բժիշկների միության ֆինանսավորմամբ իրենք Արցախում իրականացնում են բժիշկների վերապատրաստման ծրագիր:
Նրա խոսքով՝ վերապատրաստման վեցշաբաթյա ծրագրի ընթացքում Հայաստանից հրավիրված մասնագետները տեսական և գործնական գիտելիքներ են փոխանցել արցախցի բժիշկներին:
«Ծրագրի մասնակիցներն ստանում են կրեդիտավորված հմտություններ, որոնք հետագայում հնարավորություն կտան բժիշկներին՝ ստացած գիտելիքները կիրառելու առօրյա աշխատանքում»,-նշել է Հ. Սիմոնյանը՝ տեղեկացնելով, որ ծրագիրը շարունակական է լինելու:
ՀՀ առողջապահության ազգային ինստիտուտի բժշկական գիտությունների դոկտոր, պրոֆեսոր Սամվել Հովհաննիսյանի խոսքով՝ ծրագիրը ներառում է թերապիայի և մանկաբուժության բնագավառները:«Քննարկել ենք տարաբնույթ հարցեր: Դասընթացը տեսական գիտելիքների և հմտությունների տեսանկյունից եղել է ինտերակտիվ: Բժիշկները նկատելի ակտիվություն են ցուցաբերել: Ուրախալի է, որ արցախցի բժիշկները միայն լսողի դերում չէին, այլև հանդես էին գալիս առաջարկություններով և հարցերով: Կարծում եմ՝ այն գիտելիքները, որոնք նրանք ձեռք են բերել կօգտագործեն ազգաբնակչությանը բուժօգնություն իրականացնելու ընթացքում»,-մասնավորապես ասել է Ս. Հովհաննիսյանը:
Վերապատրաստման ծրագրի մասնակից Կովսականի տեղամասային հիվանադանոցի վարիչ Լուսինե Սարգսյանն էլ ասել է, որ դասընթացներն իրենց հնարավորություն է տվել մոտիկից շփվել ու ճանաչել նոր գործընկերների հետ, կատարել փորձի փոխանակում:
«Ծրագրի ընթացքում մենք ձեռք բերեցինք նոր գիտելիքներ ու հմտություններ, տեղեկացանք հիվանդությունների նորագույն ախտորոշումների մեթոդներին: Շատ կարևոր էր նաև հիվանդի հետ շփման հոգեբանական ճիշտ ձևերին ծանոթանալը, որն առաջնահերթ է բժշկության բնագավառում»,-նշել է Լ. Սարգսյանը:
