Շաքարային դիաբետի միջազգային օրվա կապակցությամբ «Հաղթենք դիաբետը միասին» հիմնադրամի նախաձեռնությամբ այսօր Ստեփանակերտի «Արևիկ» մանկական հիվանդանոցում կազմակերպվել է «Դիաբետն առնչվում է յուրաքանչյուր ընտանիքի» խորագրով միջոցառում:
Արցախում շաքարային դիաբետով հիվանդ երեխաների համար կազմակերպվել է միջոցառում
ՍՏԵՓԱՆԱԿԵՐՏ, 14 նոյեմբերի, ԱՐՑԱԽՊՐԵՍ:Միջոցառման ժամանակ շաքարային դիաբետով հիվանդ երեխաներին հյուրասիրել են հակադիաբետիկ քաղցրեղենով և թեյերով: Ծրագրի շրջանակներում երեխաներին են բաժանվել նաև գլխարկներ: Երեխաներն ասֆալտի վրա նկարել են շրջանակներ, որից հետո փոքրիկները օդ են բաց թողել փուչիկներ:
«Արցախպրես»-ի թղթակցի հետ զրույցում «Հաղթենք դիաբետը միասին» հիմնադրամի նախագահ Խանդութ Հովհաննիսյանն ասել է, որ միջոցառման նպատակն է հանրության ուշադրությունը հրավիրել շաքարային դիաբետի խնդրին, նպաստել հիվանդության վաղ հայտնաբերմանը՝ խուսափելու համար հետագա բարդություններից:
«Ըստ վիճակագրական տվյալների՝ աշխարհում 542 մլն մարդ տառապում է շաքարային դիաբետով, որի 85%-ը վերաբերում է հիվանդության երկրորդ տիպին: Իրականում աճը կապված է հենց երկրորդ տիպի հետ: Հիվանդության առաջին տիպը բնորոշ է մինչև 40 տարեկաններին: Հիվանդության հայտնաբերման համար անհրաժեշտ է տարին մեկ անգամ արյան մեջ ստուգել շաքարի մակարդակը և խուսափել հետագա բարդություններից: Այս պահին մենք ԱՀ առողջապահության նախարարության հետ իրականացնում ենք «Վերահսկիր դիաբետը, ապրիր լիարժեք կյանքով» խորագրով ծրագիրը: Այս ծրագրին առայժմ Արցախը ներգրավված է միայն դեղորայքային մասով: Ծրագրի շրջանակներում մինչև 23 տարեկան շաքարային դիաբետով հիվանդներին անվճար տրամադրվում է ինսուլին դեղ: Մենք աշխատում ենք, որ Արցախն ամբողջությամբ մասնակիցը դառնա այս ծրագրին և յուրաքանչյուր հիվանդ կարողանա օգտվել բուժման եղած հնարավորություններից»,- ավելացրել է Խ. Հովհաննիսյանը:Նրա խոսքով՝ շաքարային դիաբետի բուժումը համարվում է ինսուլինաթերապիան, որը համաշխարհային շուկայում ամենավերջին ձեռքբերումն է: Ինսուլինի ճիշտ ներարկումը հնարավորություն է տալիս հիվանդին լիարժեք ապրելու:
Խոսելով հիվանդության առկայության նշանների մասին՝ մեր զրուցակիցը նաև ասել է, որ շաքարային դիաբետի երկրորդ տիպի ախտանշանները թույլ են լինում արտահայտված. Դրան ավելի հակված են գեր մարդկիկ, իսկ առաջին տիպի հիվանդության ժամանակ ախտանշաններն ավելի սուր են արտահայտնվում: Նշաններն են՝ բերանի չորությունը, հաճախամիզությունը, քաշի նվազումը, քնկոտությունը, ախորժակի բարձրացումը և այլն, որը խոսում է արյան մեջ բարձր գլյուկոզայի պարունակության մասին: Նման դեպքում պետք է անհապաղ դիմել բժշկի:
«Արևիկ» մանկական հիվանդանոցի էնդոկրինոլոգ Շողեր Գրիգորյանն էլ հայտնել է, որ Արցախում ներկայումս շաքարային դիաբետով հիվանդ 20 երեխա կա, ովքեր անվճար ստանում են ինսուլինաթերապիա:
«Երեխաները գտնվում են մեր հսկողության տակ: Բժիշկ-ծնող- երեխա կապը մշտական է: Ցանկացած երեխայի մոտ եթե հայտնաբերվում է շաքարային դիաբետ, ապա նա պարտադիր ստանում է ինսուլին: Ցավալի է, որ շաքարային դիաբետով հիվանդ փոքր երեխաների թվի աճ կա: Հիվանդության աճի կոնկրետ պատճառներն առայժ չենք կարող ասել, սակայն կարծում ենք, որ արտաքին գործոնների ազդեցությունը ևս իր դերն ունի»,- ասել է Շ. Գրիգորյանը:
