ՍՏԵՓԱՆԱԿԵՐՏ, 3 դեկտեմբերի, ԱՐՑԱԽՊՐԵՍ: «Արցախպրես»-ի    թղթակցի    հաղորդմամբ՝   միջոցառմանը   բացման  խոսքով  հանդես  է  եկել  ԱՀ  ՄԻՊ  Արտակ  Բեգլարյանը:

Նա  ասել է,  որ  հանդիպման նպատակը  հաշմանդամության խնդիրներով  զբաղվող հասարակական  կազմակերպությունների  աշխատանքներին, խնդիրներին  և  պետության   կողմից  իրականացվող  ծրագրերին  ծանոթանալն  է:

«Ինձ  համար  առաջնահերթ  ուղղություններից  է  հաշմանդամների  իրավունքների   պաշտպանության     հարցը: Կարևոր  է   ծանոթանալ    ոլորտի  առաջնահերթ  խնդիրներին: Ինքս  լինելով  հաշմանդամ, ավելի  լավ  եմ   պատկերացնում   խնդրի  կարևորությունը, բայց  որպես  մասնագետ  պետք  է  համակողմանի    գնահատեմ  իրավիճակը, որից  հետո  պետական  մարմիններին  և  քաղաքացիական հասարակությանը  կոնկրետ    առաջարկներ    ներկայացնեմ: Այս  դաշտում  պետք  է   կարգավորումներ  կատարվեն,  որպեսզի  կարողանանք   աստիճանաբար բարելավումներ իրականացնել:  Քննարկվելիք   արդյունքները  շատ  կարևոր  են  լինելու: Մենք միշտ  կապի  մեջ  կլինենք՝  հաշվի  առնելու  համար  յուրաքանչյուրի կարծիքը»,-մասնավորապես  ասել է  Ա.  Բեգլարյանը:

Խոսելով  սոցիալական   պաշտպանության համակարգի  մասին՝ ԱՀ աշխատանքի,  սոցիալական  հարցերի  և վերաբնակեցման    նախարար  Սամվել  Ավանեսյանն  էլ  ասել է, որ    պետության   կողմից  իրականացվում են  մի  շարք  ծրագրեր:

«Հաշմանդամներին   պետության  կողմից    տրամադրվում են  նպաստներ: Իրականացվում  են  բազմաթիվ  ծրագրեր՝   կապված   հաշմանդամների  կենցաղային  պայմանների  բարելավման, հանգստի   կազմակերպման  և    առողջության   վերականգնման  համար:  Մենք  կարևորում ենք  նաև  այն  ծրագրերը, որոնք, որ  նպատակային  ուղղված  են հաշմանդամների  աշխատանքով  ապահովելուն:   Հնարավորությունների սահմաններում   անում  ենք   կարիլին, այս  ոլորտի  խնդիրները   լուծելու  համար»,-նշել է   նախարարը  և  տեղեկացրել, որ    ԱՀ-ում  հաշվառված  է    8800  հաշմանդամ: 

Քննարկմանը ներկա   Ազգային  ժողովի  առողջապահության և սոցիալական  հարցերի   հանձնաժողովի  նախագահ  Արարատ  Օհանջանյանն  էլ      ասել  է, որ  դեռևս  1998  թվականին    ԱՀ ԱԺ-ն  ընդունել  է    հաշմանդամների  սոցիալական  պաշտպանության  մասին  օրենք, որը  հետագայում   որոշ փոփոխությունների  է  ենթարկվել: Այն   գործում    է   իրավական  և  օրենսդրական   դաշտերում:

 

Իսկ ԱՀ  առողջապահության  նախարարության    բժշկական  օգնության   կազմակերպման  աշխատանքների  համակարգող      Կարինե  Արշակյանի  խոսքով  էլ  առողջապահության  համակարգի   հիմնական  նպատակը   հաշմանդամների   առողջական   և   բուժման  հարցերն  են, ինչպես  նաև  նրանց  ինտեգրացումը  հասարակությանը:

«Մենք  ունենք  անվճար և  արտոնյալ  պայմաններով  դեղորայքի   տրամադրում  (որից  մոտ  25  %-ը տրամադրվում   է  մանկական  հաշմանդամներին), կազմակերպում  ենք  նաև անկողնային   հիվանդների  տնային  այցեր, կենտրոնական  նյարդային  հիվանդների    ամբուլատոր  վերականգնողական    բուժօգնություն, կատարում  ենք  հեմոդիալեզի  անցկացում,  պրոթեզավորում  և  կորսետավորում: Սրանք  բոլորը   արտահիվանդանոցային    ծառայություններ  են: Դրան   զուգահեռ  ունենք    հիվանդանոցային   բուժօգնության ծառայություններ, բնակչության  առանձին  հատուկ   խմբերում  ընդգրկված          անձանց  բուժօգնությունը, ինչպես  նաև  մինչև   18  տարեկան  հաշմանդամ  երեխաների  բժշկական  ծառայությունների    իրականացում և  վերականգնողական   բուժօգնություն»,-մանրմասնել  է  Կ.  Արշակյանը:

Միջոցառմանը հասարակական կազմակերպությունների պատասխանատուները    հակիրճ  ներկայացրել  են իրենց   կառույցների    կատարած  աշխատանքները,  ծրագրերը  և  խնդիրները, հանդես  եկել   առաջարկներով:  Նրանց  կողմից  բարձրացվել  են     հաշմանդամության  խնդիրների  վերաբերյալ մի  շարք  հարցեր, այդ  թվում՝   հաշմանդամ  երեխաների  նկատմամբ  հասարակության  կողմից   հոգեբանական  և   ֆիզիկական   բռնությունների,   հաշմանդամ  երեխաների   ծնողների  իրավունքների   և  այլնի:   

 

Քննարկման  վերջում   Արտակ  Բեգլարյանն   ասել  է,  որ հաշվի  առնելով    միջազգային   փորձն  ու  չափորոշիչները՝  իրենց   կառույցը  մշտապես  կապի  մեջ  է  լինելու  ՀԿ-ների   հետ  և    ձգտելու  է   առաջ   քաշված  բոլոր   հարցերին  տալ  համապատասխան  լուծումներ: