1988 թվականի Սպիտակի ավերիչ երկրաշարժի 30-րդ տարելիցի կապակցությամբ այսօր Ստեփանակերտի քաղաքային հուշահամալիր են այցելել բազմաթիվ քաղաքացիներ՝ իրենց հարգանքի տուրքը մատուցելու անմեղ զոհերի հիշատակին:
Արցախում հարգանքի տուրք են մատուցել Սպիտակի երկրաշարժի 30-րդ տարելիցի առթիվ (լուսանկարներ)
ՍՏԵՓԱՆԱԿԵՐՏ, 7 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ հուշահամալիր են այցելել ԱՀ նախագահ Բակո Սահակյանը, Ազգային ժողովի նախագահ Աշոտ Ղուլյանը, պետական նախարար Գրիգորի Մարտիրոսյանը, պաշտոնատար այլ անձինք, տարբեր գերատեսչությունների, կազմակերպությունների և կրթական հաստատությունների անդամներ, ովքեր ծաղիկներ ու ծաղկեպսակներ են խոնարհել երկրաշարժի զոհերի հիշատակը հավերժացնող հուշակոթողին:
Աղետալի երկրաշարժի զոհերին նվիրված Արցախի թեմի առաջնորդ Պարգև արքեպիսկոպոս Մարտիրոսյանի հանդիսապետությամբ տեղի է ունեցել հոգեհանգստյան արարողություն:
Պարգև արքեպիսկոպոս Մարտիրոսյանն իր խոսքում ասել է, որ ուղիղ 30 տարի առաջ տեղի ունեցածը մեծ ողբերգություն էր հայ ժողովրդի համար:
«Այսօր մեր հարգանքի տուրքն ենք մատուցում նրանց հիշատակին: Մենք Արցախից հոգով միանում ենք այդ աղետալի երկրաշարժի հետևանքով զոհվածների մերձավորներին՝ սփոփելով նրանց ծանր վշտերը»,-մասնավորապես ասել է Արցախի թեմի առաջնորդը:
Տեղեկացնենք, որ Սպիտակի երկրաշարժի 30-րդ տարելիցին նվիրված հիշատակի միջոցառումներ են անցկացվել նաև ԱՀ բոլոր շրջաններում:
Նշենք, որ 1988 թվականի դեկտեմբերի 7-ին տեղի ունեցած Սպիտակի երկրաշարժն ընդգրկել էր Հայաստանի Հանրապետության տարածքի մոտ 40 %-ը: Պաշտոնական տվյալներով՝ աղետալի երկրաշարժից զոհվել է ավելի քան 25 հազար մարդ, ավերվել` 20 մեծ ու փոքր քաղաքներ, այդ թվում՝ Սպիտակը, Գյումրին, Վանաձորն ու Ստեփանավանը: Տուժել է մոտ 350 գյուղ, որից 58-ը՝ ամբողջությամբ:
