ՍՏԵՓԱՆԱԿԵՐՏ, 10 դեկտեմբերի, ԱՐՑԱԽՊՐԵՍ: Գրքի  համահեղինակներն  են  Արցախի երիտասարդ գիտնականների և մասնագետների միավորում (ԱԵԳՄՄ)  հասարակական  կազմակերպության  նախագահ,    իրավաբանական  գիտությունների   թեկնածու, դոցենտ  Ավետիք  Հարությունյանը,  ԱԵԳՄՄ  հիմնադիր, իրավաբանական  գիտությունների  թեկնածու  Սիրանուշ  Պետիկյանը  և  ԱՀ  արդարադատության   նախարարության  աշխատակազմի  իրավական  ակտերի փորձաքննության  և  օրենսդրության  կատարելագործման   բաժնի  առաջին  կարգի  մասնագետ  Լուսինե  Բարխուդարյանը:

«Արցախպրես»-ի  թղթակցի   հաղորդմամբ՝    Ա.  Հարությունյանը  խոսելով  գրքի  մասին,  ասել է, որ  այն նվիրված է Արցախի Հանրապետության ուսումնական հաստատությունների սովորողների իրավագիտակցության հիմնախնդրին:  Այդ  շրջանակներում ուսումնասիրվել են վերջիններիս իրավագիտակցության մակարդակը, ներկայացրել դրանց բարձրացման հիմնական ուղիները, հետազոտել անչափահասների հանցավորության մակարդակը, երիտասարդության իրավագիտակցության ձևավորման, բուհերում իրավաբանական կրթության, ուսանողների իրավական ակտիվության, ինչպես նաև իրավագիտակցության ձևախեղման հիմնախնդիրները և վերջիններիս հաղթահարման ուղիները:

«Գրքում  ներկայացված են առաջարկություններ, որոնք որոշ չափով կարող են նպաստել բարձրացված հիմնախնդիրների լուծմանը: ԱՀ-ում  քաղաքացիների  իրավագիտակցության   մակարդակի  բարձրացման  ու  իրավական  դաստիարակության  միջոցով  օրինապահ  քաղաքացիներ  ունենալն  ավելի  նախընտրելի  է, քան  անազատության  մեջ   հայտնված    մարդկանց  օրենքի  տառն  ու  ոգին   բացատրելը:  Այսինքն՝   կանխելն   առավել  նախընտրելի  է, քան  ուղղելը: Տեսական  նյութը  գործնական   դարձնելու  նպատակով  կազմակերպվել  են  կոնկրետ  միջոցառումներ, որոնք  պետք է   կրեն  շարունակական  բնույթ»,-ավելացրել  է  Ա. Հարությունյանը  և  հավելել, որ    գիրքը  նախատեսված է «Հասարակագիտություն» առարկայի ուսուցիչների, պետության և իրավունքի տեսության, իրավունքի փիլիսոփայության, իրավունքի սոցիոլոգիայի և իրավագիտակցության հարցերով հետաքրքրվող ընթերցողների լայն շրջանակի համար:

Գրքի  համահեղինակ  Լուսինե   Բարխուդարյանն  էլ  նշել  է,  որ    գրքում   հետաքրքրական մաս  է   կազմում     երիտասարդության  շրջանում սոցիոլոգիական  հարցումների  անցկացումը, որոնք  ԱՀ-ում  առաջին  անգամ  են  կազմակերպվել:

«Գրքում  վեր  հանված   հիմնախնդիրների  շրջանակներում   զրույցներ  ենք  ունեցել  հասարակագիտություն  առարկա  դասավանդող   ուսուցիչների  հետ:  Նրանք այն  կարծիքին են, որ այդ  առարկայի   նյութերը     վերանայման  կարիք  ունեն: Հրատարակված գիրքն  այդ  գործում  պիտանի  կլինի»,-ասել է  Լ.  Բարխուդարյանը  և   ավելացրել, որ  այսօրվա  երիտասարդությունը  մեծ  հետաքրքրություն  է  ցուցաբերում   իրավական  նորմերի  նկատմամբ:  Ազգաբնակչության  իրավագիտակցության մակարդակը    բարձրացնելու  համար անհրաժեշտ  է, որ   աշակերտության   և  երիտասարդության շրջանում  տարբեր  դասընթացներ  կազմակերպվեն:

Միջոցառմանը    ներկա  ԱՀ  գերագույն  դատարանի    նախկին  նախագահ, Արցախի  վաստակավոր  իրավաբան   Վլադիմիր  Հովսեփյանը  ևս  կարևորել  է գրքի  հրատարակումը  և  նշել,  որ     քաղաքացիների իրավագիտակցության  հիմնախնդիրը    ցանկացած  հասարակության    մեջ   հրատապ  է:

Ըստ ԱՀ  գերագույն  դատարանի    նախկին  դատավոր, վաստակավոր  իրավաբան,   Գրետա  Արզումանյանի՝  նման  գրքի  լույսընծայումը       անհրաժեշտություն  է:

«Առանց  իրավագիտակցության     բարձր  մակարդակի՝     չենք  կարող  ունենալ   իրավական  պետություն: Այն  մեր   պետության  առաջնահերթ  խնդիրներից   մեկն  է: Գրքի համահեղինակների վաերլուծության  արդյունքներով   պարզվել է, որ  դպրոցականների  և  ուսանողների մոտ  իրավագիտակցության  մակարդակը այնքան  էլ  բարձր  չէ, որի  համար բոլորս   էլ պատասխանատվություն  ունենք»,-նշել է  Գ. Արզումանյանը: 

Շնորհանդեսին   ելույթներով    հանդես  են  եկել  նաև   ԱՀ  ընդհանուր  իրավասության    առաջին  ատյանի  դատարանի  նախագահ, իրավաբանական  գիտությունների  թեկնածու   Անատոլի   Թադևոսյանը, ԱԵԳՄՄ   անդամներ, հյուրեր: