ՍՏԵՓԱՆԱԿԵՐՏ, 13 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` նիստին ԱՀ ԱԺ նախագահ Աշոտ Ղուլյանն ասել է, որ այս օրերին և առաջիկայում Խորհրդարանն անդրադառնալու է հաջորդ տարվա գլխավոր ֆինանսական փաստաթղթին, որի շուրջ քննարկումներն Ազգային ժողովում մեկնարկել են գրեթե մեկ ամիս առաջ:

Նրա խոսքով՝ մեր երկրի բնականոն կենսագործունեության համար կարևոր այդ նախագծի քննարկումներն անցել են բաց ու հրապարակային եղանակով, և այսօր էլ այդ գործընթացը շարունակվում է իշխանության օրենսդիր և գործադիր թևերի սերտ համագործակցության մթնոլորտում:

Խորհրդարանի ղեկավարն անդրադարձել է նաև անցած կիրակի ՀՀ-ում տեղի ունեցած արտահերթ խորհրդարանական ընտրություններին:

«Բոլորիս անունից ցանկանում եմ առաջին հերթին շնորհավորել ՀՀ քաղաքացիներին և իշխանություններին՝ ազատ ու թափանցիկ ընտրություններ կազմակերպելու առթիվ: Մեր շնորհավորանքներն ու արդյունավետ աշխատանքի բարեմաղթանքներն ենք ուզում հղել ՀՀ յոթերորդ գումարման խորհրդարան անցած քաղաքական ուժերին՝ համոզիչ մեծամասնություն ստացած «Իմ քայլը» դաշինքին և «Բարգավաճ Հայաստան» ու «Լուսավոր Հայաստան» կուսակցություններին: Մենք ձևավորված բարի ավանդույթներ ունենք հայկական երկու հանրապետությունների խորհրդարանների փոխգործակցության տարեգրության մեջ, և, վստահ եմ, ՀՀ նորընտիր Ազգային ժողովի հետ համագործակցությունն ու միջխորհրդարանական կապերի ամրապնդումը շարունակական են լինելու»,- ավելացրել է Ա. Ղուլյանը:

Այնուհետև ԱՀ ֆինանսների նախարար Արթուր Հարությունյանը Խորհրդարանին է ներկայացրել «ԱՀ 2019թ. պետական բյուջեի մասին» օրենքի նախագիծը՝ նշելով, որ 2019 թվականի բյուջետային քաղաքակա­նությունը ուղղված է լինելու տնտեսական աճի խթանմանը և աստիճանական բարձրացմանը:

 

Ֆինանսների նախարարի խոսքով՝ կատարված մակրոտնտեսական կանխատեսումների համատեքստում 2019 թվականի պետական բյուջեի ցուցանիշները ծրագրվել են եկամուտների գծով`    112 մլրդ 340.9 մլն դրամ, ծախսերի գծով`       110 մլրդ 987.7 մլն դրամ, դրա արդյունքում պրոֆիցիտը կկազմի  1 մլրդ 353.2 մլն դրամ, որը կուղղվի նախկինում ներգրավված փոխառու միջոցների մարմանը:

Գլխադասային հանձնաժողովի դրական եզրակացությունը ներկայացրել է ԱԺ ֆինանսաբյուջետային և տնտեսական կառավարման հարցերի մշտական հանձնաժողովի նախագահ, պատգամավոր Արամ Գրիգորյանը՝ տեղեկացնելով, որ պետական բյուջեի նախագծի ոլորտային քննարկումներն ընթացել են շահագրգիռ և արդյունավետ փոխըմբռնման մթնոլորտում:

 

Այնուհետև Ազգային ժողովն ընդմիջել է հարցի քննարկումը: 24 ժամվա ընթացքում պատգամավորները և խմբակցությունները կարող են առաջադրել երկրորդ խումբ առաջարկությունները, որոնք կներկայացվեն Հանրապետության Նախագահին :

Անցնելով օրենսդրական այլ նախագծերին՝ Խորհրդարանը 29 կողմ ձայնով ընդունել է «Ոստիկանության մասին» ԼՂՀ օրենքում փոփոխություններ և լրացում կատարելու մասին օրենքի նախագիծը՝ կից «Ոստիկանությունում ծառայության մասին», «Զենքի մասին», «Ձերբակալված և կալանավորված անձանց պահելու մասին» ԼՂՀ օրենքներում փոփոխություններ կատարելու մասին» օրենքի նախագծով:

Այն Խորհրդարանին ներկայացնելով՝ ԱՀ ոստիկանության պետ, ոստիկանության գնդապետ Իգոր Գրիգորյանն ասել է, որ նախագծի ընդունման անհրաժեշտությունը պայմանավորված է 2017 թվականի սահմանադրական բարեփոխումների արդյունքում պետական կառավարման համակարգում կատարված փոփոխություններով: Փաթեթով առաջարկվում է նշված օրենքները համապատասխանեցնել ԱՀ օրենսդրությանը և Սահմանադրությանը, ինչպես նաև այդ օրենքում օգտագործվող պետական մարմինների և օրենքների նախկին անունները համապատասխանեցնել ներկայիս անվանումներին:

Գլխադասային հանձնաժողովի դրական եզրակացությունը ներկայացրել է ԱԺ պաշտպանության, անվտանգության և օրինապահպանության հարցերի մշտական հանձնաժողովի նախագահ, պատգամավոր Ժաննա Գալստյանը:

Իսկ «Հանրային ծառայությունները և տնտեսական մրցակցությունը կարգավորող մարմնի մասին» ԼՂՀ օրենքում փոփոխություններ և լրացումներ կատարելու մասին օրենքի նախագիծը ներկայացրել է ԼՂՀ հանրային ծառայությունները և տնտեսական մրցակցությունը կարգավորող պետական հանձնաժողովի նախագահ Հակոբ Ղահրամանյանը՝ մանրամասնելով, որ օրենքի նախագիծը պայմանավորված է գործող Սահմանադրության համապատասխանեցմամբ, սկզբունքների հստակեցմամբ և նորերի ներառմամբ: Օրենքի ընդունման դեպքում ակնկալվում է, որ այն համահունչ կլինի ԱՀ Սահմանադրությանը, ինչպես նաև կարգավորվող մարմնի իրավասությունների շրջանակների ու լիազորությունների հստակեցման, հանձնաժողովի անդամի նկատմամբ քաղաքական զսպվածության սահմանման, հանձնաժողովի նախագահի լիազորությունների հստակեցման, հանձնաժողովի աշխատանքի կանոնակարգման, հանձնաժողովի ֆինանսավորման կազմակերպման միջոցով կբարձրանա ոլորտում իրականացվող քաղաքականության արդյունավետությունը:

Գլխադասային հանձնաժողովի դրական եզրակացությունը ներկայացրել է ԱԺ արտադրության և արտադրական ենթակառուցվածքների հարցերի մշտական հանձնաժողովի նախագահ, պատգամավոր Արպատ Ավանեսյանը: Օրենքի նախագիծն ընդունվել է 29 կողմ ձայնով:

Այսօրվա նիստին պատգամավորների կողմից հայտարարություններ չեն հնչեցվել :