ՍՏԵՓԱՆԱԿԵՐՏ, 13 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` ներկայացնելով օրենքի նախագիծը՝ ԱՀ ֆինանսների նախարար Արթուր Հարությունյանն ասել է, որ այն մշակվել է` հաշվի առնելով ԱՀ Նախագահի 2017-2020 թվականների ծրագրի նպատակադրումները, որոնք միտված են ինչպես կայուն տնտեսական աճի ապահովմանը, այնպես էլ տնտեսության գերակա ոլորտների զարգացմանն ու գործարար միջավայրի բարելավմանը:

 

«2019 թվականի բյուջետային քաղաքակա­նությունը ուղղված է լինելու տնտեսական աճի խթանմանն ու աստիճանական բարձրացմանը: 2019 թվականի համար կանխատեսումային համախառն ներքին արդյունքի ծավալը կկազմի 333.2 մլրդ դրամ` ապահովելով մոտ 8 տոկոս իրական աճ՝ կանխատեսվող 2 տոկոս դեֆլյատորի դեպքում, որը համապատասխանում է Արցախի Հանրապետության Նախագահի 2017-2020 թվականների ծրագրում նախատեսված տնտեսական աճի թիրախային մակարդակին: Կատարված մակրոտնտեսական կանխատեսումների համատեքստում 2019 թվականի պետական բյուջեի ցուցանիշները ծրագրվել են եկամուտների գծով`    112 մլրդ 340.9 մլն դրամ, ծախսերի գծով`       110 մլրդ 987.7 մլն դրամ, դրա արդյունքում պրոֆիցիտը կկազմի`  1 մլրդ 353.2 մլն դրամ, որը կուղղվի նախկինում ներգրավված փոխառու միջոցների մարմանը:

Պետական բյուջեի սեփական եկամուտները ծրագրվել են 54,7 մլրդ. դրամի չափով, որը 2018 թվականի համար պլանավորված եկամուտների նկատմամբ ավել է 1.7 մլրդ. դրամով կամ  3.2 տոկոսով: Այդ թվում հարկային եկամուտները և պետական տուրքերը կկազմեն 54,2 մլրդ դրամ կամ ընթացիկ տարվա համար պլանավորված եկամուտներից ավել շուրջ 2.8 տոկոսով, որի արդյունքում կանխատեսումային Հարկեր/ՀՆԱ հարաբերակցությունը կկազմի 16.4 տոկոս»,- մանրամասնել է Արթուր Հարությունյանը՝ հավելելով, որ Նախագծով առաջարկվող բյուջետային ծախսերի ծավալների, կազմի ու կառուցվածքի ձևավորման ժամանակ առաջնորդվել են բյուջետային նորմատիվների և ծախսային ուղենիշերի, ինչպես նաև ֆինանսական կարգապահության կանոնների խիստ պահպանման սկզբունքով, որն իր հերթին կանխատեսվել է տնտեսության զարգացման տեմպերի ապահովմանն ուղղված կառավարության քաղաքականությանը համապատասխան:

 

Գլխադասային հանձնաժողովի դրական եզրակացությունը ներկայացրել է ԱԺ ֆինանսաբյուջետային և տնտեսական կառավարման հարցերի մշտական հանձնաժողովի նախագահ, պատգամավոր Արամ Գրիգորյանը՝ նշելով, որ առաջին անգամ ԱԺ քննարկմանը ներկայացված պրոֆիցիտով բյուջեի նախագիծը ողջունելի է :

«Ողջունելի է նաև այն հանգամանքը, որ նախագիծը կրում է խիստ սոցիալական ուղղվածություն, որի մասին են վկայում  ոչ միայն սոցիալական ծրագրերի պահպանումը, այլ նոր ծրագրերի ընդգրկումը, նվազագույն կենսաթոշակի շեմի բարձրացումը, առողջապահական համակարգում աշխատավարձերի բարձրացումը, բնակարանաշինության ծրագրերի պահպանումը և նոր ծրագրերի ներդրումը, հիփոթեքային վարկավորման մեխանիզմներում բարեփոխումները և հասանելիության բարձրացումը: Առաջին անգամ պետական բյուջեի նախագծով պիլոտային եղանակով ներկայացված է գյուղատնտեսության ոլորտում որոշ ծրագրերի իրականացումը՝ ծրագրային բյուջետավորման տարբերակով: Վստահ եմ՝ ստեղծվելու են պայմաններ, որպեսզի առաջիկա տարիներին ամբողջ բյուջեի նախագիծը ներկայացվի ծրագրային բյուջետավորման ձևաչափով: Բյուջեի նախագծում ներկայացված ծրագրերը, այդ ծրագրերի համար նախատեսված ֆինանսական միջոցները և կանխատեսումները իրատեսական են: Ստեղծված են բոլոր նախադրյալները, որպեսզի 2019 թվականին տնտեսական աճի երկնիշ ցուցանիշը ապահովի իր շարունակականությունը»,- ասել է Ա. Գրիգորյանը:

Պետական բյուջեի ծառայողական և պետական գաղտնիք պարունակող հոդվածների մասին դրական եզրակացությունը տվել է ԱԺ պաշտպանության, անվտանգության և օրինապահպանության հարցերի մշտական հանձնաժողովի նախագահ, պատգամավոր Ժաննա Գալստյանը:

Այնուհետև տեղի է ունեցել պետական բյուջեին առնչվող մտքերի փոխանակություն, որի ընթացքում պատգամավորներ Հայկ Խանումյանը, Արթուր Թովմասյանը, Գագիկ Բաղունցը անդրադարձել են կրթությանը, բնակարանաշինությանը, տոկոսադրույքների նվազեցմանը և մի շարք այլ հարցերի:

Անդրադառնալով հնչեցված հարցերին՝ նիստին ներկա պետական նախարար Գրիգորի Մարտիրոսյանն ասել է, որ վերջին ժամանակահատվածում շուկայում տոկոսադրույքների որոշակի իջեցում է նկատվել:

 

«Բնականաբար, ԱՀ կառավարությունը նույնպես այդ ուղղությամբ աշխատել է, որպեսզի արդեն ներգրավված նոր ծրագրերի՝ փոխառությունների գծով տոկոսները լինեն ավելի մատչելի: Կցանկանայի անդրադառնալ նաև բնակարանային խնդրին, քանի որ հարցը բազմիցս շոշափվել է: Այն այսօր մեր հանրության առջև կանգնած ամենակարևոր և ամենախնդրահարույց հարցերից մեկն է՝ նաև ահռելի ֆինանսական միջոցների պահանջի տեսանկյունից: Այդ առումով այս իրավիճակում կառավարությունն ընտրել է իրատեսական միակ ճանապարհը: Բացի այն սոցիալական կատեգորիաներից, որոնց բնակելի տան տրամադրման պարտավորությունը ստանձնել է պետությունը, մնացած բոլոր դեպքերում բնակարանային խնդրի լուծումը հնարավոր է մատչելի հիփոթեքի եղանակով: Երկարաժամկետ անտոկոս փոխառության տրամադրման համար բյուջեով նախատեսվել է համապատասխան գումար: Ուզում եմ հիշեցնել, որ Արցախի ներդրումային հիմնադրամի կողմից իրականացվում են այդպիսի ծրագեր: Այս տարի Արցախի ներդրումային հիմնադրամին տրվող գումարն ավելացել է 1.5 մլրդ դրամով, որի նպատակը բնակարանային նոր ծրագրերի համար ֆինանսական միջոցների նախատեսումն է: Ինչ վերաբերում է այդ գումարները տրամադրելուն երկրորդային շուկայի կամ հին բնակֆոնդի ձեռքբերմանը, ապա դա նույնպես չի բխում կառավարության քաղաքականությունից, քանի որ կառավարությունը պատրաստ է շատ ավելի մատչելի պայմաններով տրամադրել գումարներ նոր բնակֆոնդի ստեղծման համար՝ հաշվի առնելով բազմաթիվ գործոններ»,- նշել է Գ. Մարտիրոսյանը:

 

Հիշեցնենք, որ այսօրվա նիստին Խորհրդարանն ընդհատել է պետական բյուջեի նախագծի քննարկումը, և 24 ժամվա ընթացքում պատգամավորներն ու խմբակցությունները կարող են ներկայացնել երկրորդ խումբ առաջարկությունները: