Արցախի համայնքներում կատարվել է երիտասարդների շրջանում առկա խնդիրների ուսումնասիրություն
Այսօր՝ դեկտեմբերի 14-ին, Ստեփանակերտում տեղի է ունեցել ՀՀ աշխատանքի և սոցիալական հարցերի նախարարության աշխատանքի սոցիալական հետազոտությունների ազգային ինստիտուտի և ԱՀ աշխատանքի սոցիալական հարցերի և վերաբնակեցման նախարարության ժողովրդագրության վարչության համատեղ կատարած «Արցախի Հանրապետության գյուղական համայնքներում երիտասարդների խնդիրների ուսումնասիրության» արդյունքների ներկայացումը:
Արցախի համայնքներում կատարվել է երիտասարդների շրջանում առկա խնդիրների ուսումնասիրություն
ՍՏԵՓԱՆԱԿԵՐՏ, 14 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը ԱՀ աշխատանքի, սոցիալական հարցերի և վերաբնակեցման նախարար Սամվել Ավանեսյանն ասել է, որ կատարած ուսումնասիրությունները ինքնանպատակ չեն, և դրանց արդյունքները անհրաժեշտ են հետագայում կառավարչական որոշումներ կայացնելիս:
«Ապահովել ենք գիտականորեն հիմնավորված արդյունքներ, և համոզված եմ, որ ոչ միայն մեր, այլև մյուս գերատեսչությունների աշխատանքներում հնարավոր կլինի օգտագործել ու ապահովել ավելի բարձր արդյունք: Փորձել ենք միասնական հայացքով նայել բոլոր այն խնդիրներին, որոնք կարող են գոյություն ունենալ երիտասարդների, հատկապես գյուղաբնակ երիտասարդների պարագայում: Որոշ խնդիրների մասով եղել են առանձին ուսումնասիրություններ, և տրվել են առանձին գնահատականներ: Սա արդեն թվով 5-րդ ուսումնասիրությունն է: Այս պահին աշխատանքներ են ընթանում՝ գնահատելու և վերլուծելու սոցիալական պաշտպանության խոշոր ծրագրերից մեկը՝ նպաստների համակարգը: 2019 թվականին կիրականացնենք նաև ընտանիքների կարիքավորության աստիճանի գնահատում: Արդյունքում կկարողանանք հասնել նրան, որ սոցիալական պաշտպանության ոլորտի բոլոր ծրագրերի մոնիթորինգը և գնահատումը թույլ կտա օպերատիվ կերպով բացահայտել առկա թերությունները և ըստ այդմ իրականացնել բարեփոխումներ»,- մանրամասնել է Ս. Ավանեսյանը:
Ներկայացնելով կատարված ուսումնասիրությունները՝ ՀՀ աշխատանքի և սոցիալական հարցերի նախարարության աշխատանքի սոցիալական հետազոտությունների ազգային ինստիտուտի փոխտնօրեն Գառնիկ Նալբանդյանն ասել է, որ կատարված վերլուծությունը ցույց է տալիս, որ Արցախի գյուղական համայնքներում երիտասարդների խնդիրները բազմազան են, և դրանք ուղղակիորեն ազդում են ժողովրդագրական՝ մասնավորապես՝ ծնելիության, ամուսնության, արտագնա աշխատանքի մեկնելու ցուցանիշների վրա:
«Վերլուծությունը ցույց է տվել, որ վերջին 5 տարիներին Արցախում պահպանվում է մի իրավիճակ, երբ բնակչության թիվը, կապված ծնելիության հետ, աճում է, սակայն շարունակաբար նվազում են աճի տեմպերը: Եվ դա պետք է լինի մեր մտահոգության կարևորագույն առարկան: Մեզ հաջողվել է 66 համայնքների շրջանակում կատարել միջինացված գնահատում, որը ցույց է տալիս, որ գյուղական համայնքներում երիտասարդների շրջանում առկա է ուժեղ արտահայտված խնդիրներ՝ բնակարանային ապահովվածությունը, զբաղվածությունը: Բնակարանային ապահովվածությունը հանդես էր եկել որպես առավել խոշոր գործոն: Օրինակ՝ գյուղական բնակավայրերում երիտասարդների չամուսնանալու հիմնական պատճառը ունի որոշակի սոցիալական խնդիրներ՝ ցածր եկամուտ, բնակարանային վատ պայմաններ, կայուն աշխատանքի բացակայություն, գյուղում մնալու հետ կապված անորոշություն: Վերլուծության նպատակն էր հասկանալու այդ ցուցանիշների վրա առավել ակտիվ ազդող գործոնները»,- ասել է Գ. Նալբանդյանը:
Միջոցառմանը ներկա էին ԱՀ պետական նախարար Գրիգորի Մարտիրոսյանը, պաշտոնատար այլ անձինք, ոլորտի ներկայացուցիչներ: