ԱՀ գյուղատնտեսության նախարարության սննդամթերքի անվտանգության պետական ծառայությունն (ՍԱՊԾ) իրականացնում է շոշափելի աշխատանք, սակայն, հասկանալի պատճառներով, հանրապետության բոլոր համայնքներում հնարավոր չէ լրիվությամբ ամենօրյա վերահսկողություն իրականացնել, ուստի, անհրաժեշտ է, որ այս մասով տեղական ինքնակառավարման մարմիններն օգտվեն իրենց վերապահված լիազորություններից:
Հողօգտագործողներին առանց վերահսկողության պարարտանյութեր չեն տրամադրվելու. ԱՀ ՍԱՊԾ պետ
ՍՏԵՓԱՆԱԿԵՐՏ, 14 դեկտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ՍԱՊ ծառայության պետ Արթուր Ներսիսյանը:
Անդրադառնալով 2018 թվականին ծառայության կողմից իրականացված աշխատանքներին՝ ոլորտի պատասխանատուն ասել է, որ իրենք մտահոգություն ունեն հատկապես համայնքներում, որտեղ հայտնաբերվել են մեծ քանակությամբ ժամկետանց, առանց համապատասխան ջերմային ռեժիմի պահպանման սննդամթերք:
«Սա վկայում է այն մասին, որ համայնքներում տեղական ինքնակառավարման մարմինների կողմից այս ոլորտում վերահսկողությունը լավ չի իրականացվում: Այստեղ բոլորս էլ անելիքներ ունենք, և ոլորտում արդյունքի հասնելու համար բոլորս էլ պետք է մեր մասնակցությունն ունենանք: Շատ կարևոր է նաև այս գործում հասարակության լայն զանգվածներին մասնակից դարձնելը: Եվ որպեսզի հասարակությունն ակտիվորեն մասնակցի, անհրաժեշտ է առաջին հերթին բարձր իրազեկվածության մակարդակ ապահովել: Համաձայն գյուղատնտեսության զարգացման հայեցակարգի՝ հողօգտագործողներին առանց վերահսկողության պարարտանյութեր չեն տրամադրվելու: Դրանց տրամադրման անհրաժեշտությունը պետք է հիմնավորվի հողերի ագրոքիմիական հետազոտությամբ: Այս դիրքորոշումն ինքնանպատակ չէ, քանի որ այն անմիջական անդրադառնում է ստացված սննդամթերքի անվտանգությանը. բերքատվության բարձրացման հաշվին չպետք է տուժի բնակչությունը»,-ավելացրել է Ա. Ներսիսյանը:Խոսելով՝ ՍԱՊԾ-ի կողմից իրականացվելիք աշխատանքների մասին՝ ծառայության պետն ասել է, որ իրենք նախատեսում են տարբեր ոլորտներում իրականացնել ամենորյա դիտարկումներ:
Մեր զրուցակիցը տեղեկացրել է նաև, որ ստուգումներին և դիտարկումներին զուգընթաց՝ տնտեսավարող սուբյեկտների հետ կտարվեն բացատրական և խորհրդատվական աշխատանքներ, կավելացվի ուսումնամեթոդական այցերի քանակը, որի նպատակն է` մասնագիտական խորհուրդների և մեթոդական ցուցումների միջոցով տնտեսավարող սուբյեկտների ներկայացուցիչներին կրկին ծանոթացնել ոլորտը կարգավորող նորմատիվ իրավական ակտերով սահմանված պահանջները:
«Նախատեսվում է նաև կազմակերպել հանդիպում-սեմինարներ` տնտեսավարող սուբյեկտների, համայնքների ղեկավարների, գյուղատնտեսության ոլորտի աշխատակիցների հետ, ինչպես նաև սպառողների շրջանում իրականացնել իրազեկման և տեղեկատվական լայնածավալ աշխատանքներ:
Այս ամենը հետապնդում է նպատակ՝ իրազեկել սպառողին իր իրավունքների մասին և դարձնել նրան առավելագույնս պաշտպանված: Սպառողների շրջանում կատարված ուսումնասիրությունները ցույց են տվել, որ սպառողները կամ տեղյակ չեն իրենց իրավունքների մասին կամ էլ սովորաբար, չեն պայքարում իրենց իրավունքների պաշտպանության համար և հաճախ համակերպվում են այդ իրականության հետ:
Հաշվի առնելով խնդրի կարևորությունը, այն կարգավորելու նպատակով շատ կարևոր է նաև ակտիվ համագործակցությունը բոլորիս միջև, քանզի ոչ բոլոր իրացման կետերը կարող են հայտնվել ծառայության աշխատակիցների տեսադաշտում: Այս համագործակցությամբ հնարավոր կլինի բացահայտել և շտկել խնդիրները»,-ասել է Ա. Ներսիսյանը:
Հաշվի առնելով այն փաստը, որ Ամանորի նախատոնական ու տոնական օրերին պարենային մթերքի առևտրի ծավալներն ու դրանով պայմանավորված ռիսկերն աճում են, ԱՀ ԳՆ սննդամթերքի անվտանգության պետական ծառայության կողմից ուժեղացվել է պարենային շուկայի վերահսկողությունը: Պայմանավորված այդ հանգամանքի հետ, ծառայությունը կգործի 24-ժամյա ռեժիմով:
