Յուրաքանչյուր մեծ գաղափարի հիմքում ընկած է փոքրիկ երազանք: Սակայն երազանքները կյանքի են կոչվում միայն ներդրված ջանքերի և գործողոությունների արդյունքում: Այդպիսի փոքրիկ երազանքի «պատճառով» Արցախն այսօր աշխարհին է ներկայանում նոր բրենդով:
Արցախն աշխարհին է ներկայանում նոր բրենդով
Յուրաքանչյուր մեծ գաղափարի հիմքում ընկած է փոքրիկ երազանք: Սակայն երազանքները կյանքի են կոչվում միայն ներդրված ջանքերի և գործողոությունների արդյունքում: Այդպիսի փոքրիկ երազանքի «պատճառով» Արցախն այսօր աշխարհին է ներկայանում նոր բրենդով:
Աշոտ Մարգարյանն, ով Լոնդոնի համալասարանական քոլեջն ավարտելուց հետո ներկայումս աշխատում է Արցախում, նախաձեռնել է «Woodpeckers» (Փայտփորիկներ) ծրագիրը: Այս բրենդի ներքո պատրաստվում և վաճառվում են փայտե խաղալիքներ: Սակայն խաղալիքները յուրահատուկ են ոչ միայն իրենց բարձր որակով և գեղեցիկ դիզայնով, այլև նրանով, որ ներկվում են երեխաների կողմից:
Ինչպես հաղորդում է «Արցախպրես»-ը վկայակոչելով «Times.am»-ին ծրագրի մեջ երեխաների ներգրավածությունն ունի մեծ խորհուրդ: Նախաձեռնության հեղինակ Աշոտ Մարգարյանի խոսքերով, երեխաներին հնարավորություն է տրվում խաղալու միջոցով գումար վաստակել, որը հետագայում մեծ ազդեցություն կունենա նրանց մտածելակերպի ձևավորման վրա:
«Ծրագրի բաղկացուցիչ մասն է կազմում սոցիալիզացիան' ցածր եկամուտ ունեցող, անապահով ընտանքիների և մանկատան սաների մասնակցության ակտիվացումը, նրանց համար եկամտի աղբյուրի ստեղծումը և նոր սերնդի մոտ ինքնուրույն գործելու մտածելակերպի արմատավորումը»,-ասաց Աշոտ Մարգարյանը՝ հավելելով, որ խաղալիքների վաճառքից գոյացած եկամտի 50 տոկոսը բաժին է հասնում ծրագրին մասնակից երեխաներին, ինչպես նաև մանկատանը նրանց կարիքների ապահովանը:
Մարգարյանի խոսքերով, առանց փայտագործ Կարեն Գասպարյանի պատրաստակամության և Արևիկ Դանիելյանի գործուն մասնկացության հնարավոր չէր լինի մեկ ամսում կյանքի կոչել այս ծրագիրը: Նախաձեռնության ակտիվ մասնակիցներից են՝ Քնար Խաչատրյանը, Լիլիթ Հարությունյանը, Արտակ Բեգլարյանը, Արման Արուշանովը, Սյուզաննա Արուշանովան:
«Woodpeckers»-ը սակայն չի սահմանափակվում միայն խաղալիքների արտադրությամբ, այն ներառում է պայուսակներ, բարձեր, էջանիշներ, հուշանվերներ: Բացի այդ այն լավ հարթակ է բոլոր տաղանդավոր արցախցիների համար, ովքեր տարբեր հանգամանքների բերումով հնարավորություն չունեն իրենց ձեռքի աշխատանքները վաճառքի ներկայացնելու:
«Այս ամենի նպատակը տեղական արցախյան բրենդի ձևավորումն է, որի շնորհիվ կստեղծվի համագործակցության մի մեծ ցանց Արցախում: Տասնյակ մարդիկ, ովքեր ապրում են տարբեր շրջաններում, հեռավոր գյուղերում, հնարավորություն կունենան վաճառելու իրենց ձեռքի աշխատանքը շուկայում»,-մեկնաբանեց Մարգարյանը:
«Woodpeckers»-ն արդեն իսկ աչքի է ընկել քաղաքացիական նախաձեռնությամբ՝ Ստեփանակերտում տեղադրելով թռչնի բներ:
Նշենք, որ «Woodpeckers»-ի արտադրանքը ներկայացված է արցախյան խանութներում, ինչպես նաև աշխարհի տարբեր ծայրերից պատվերներն ընդունվում են ֆեյսբուքյան էջի միջոցով: