Այսօր՝ դեկտեմբերի 17-ին, Շուշիի «Եզնիկ Մոզյան արհեստագործական ուսումնարան»-ի և ամերիկահայ բարերար Սևան Թորոսյանի միջև կնքվել է փոխըմբռնման հուշագիր:
Ամերիկահայ բարերարի միջոցներով Երևանից և մարզերից 10 աշկերտներ կուսանեն «Եզնիկ Մոզյան» ուսումնարանում
ՍՏԵՓԱՆԱԿԵՐՏ, 17 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ըստ հուշագրի՝ Սևան Թորոսյանի հովանավորութամբ ՀՀ 10 քաղաքացիներ կարող են ուսում ստանալ «Եզնիկ Մոզյան արհեստագործական ուսումնարան»-ում՝ ստանալով կրթաթոշակ:
Իր հերթին ուսումնարանը պարտավորվում է նրանց ապահովել ժամանակակից աշխատաշուկայի պահանջներին համապատասխան որակյալ կրթությամբ:
Փոխըմբռնման հուշագրի ստորագրմանը ներկա ՀՀ կրթության և գիտության նախարարի պաշտոնակատար Արայիկ Հարությունյանն ասել է, որ Արցախի կրթական համակարգն ինտեգրվում է ՀՀ կրթական համակարգին:
«Մեզ համար երկու գերատեսչությունների միջև համագործակցությունը շատ կարևոր է: Նախաձեռնության գաղափարը ծագել է ընթացիկ տարվա ամռանը, երբ հասկացանք, որ մենք կարիք ունենք մասնագետների, որոնք պատրաստվում են այստեղ՝ Արցախում: Ոլորտն ուսումնասիրելիս տեսանք, որ ունենք շատ լավ ուսումնական հաստատություն Շուշիում: Սկսվեց փնտրտուքը նոր գործընկերների, որոնք կօգնեն իրականացնել ծրագիրը: Սևան Թորոսյանը արձագանքեց, և այս պահին կարող ենք արձանագրել, որ հաջորդ ուսումնական տարում 10 ուսանողներ արդեն ապահովված կլինեն կրթաթոշակով: ՀՀ-ից այստեղ սովորելու եկած քաղաքացիները իրենց ստացած մասնագիտություններով աշխատաշուկայում անմիջապես կգտնեն իրենց տեղը»,- մանրամասնել է Ա. Հարությունյանը:
Իր հերթին ԱՀ կրթության, գիտության և սպորտի նախարար Նարինե Աղաբալյանն ասել է, որ այս նախաձեռնությամբ իրենք կոտրում են կարծրատիպեր:«Մինչև հիմա ամեն տարի պետպատվերի շրջանակներում արցախցի ուսանողներն էին սովորում հայաստանյան բուհերում, իսկ այս քայլով սկսում ենք հակառակ գործընթացը: Այսօր Շուշին հավակնում է դառնալ համահայկական կրթական կենտրոն, և մեր քայլերը պետք է ուղղված լինեն կրթական հաստատություններին անհրաժեշտ ռեսուրսներ տրամադրելուն: Պետք է աշխատենք առաջնորդվել փոխլրացման սկզբունքով, և այդ ինտեգրումը կատարենք շատ ավելի ճիշտ ձևով»,- ավելացրել է Ն. Աղաբալյանը:
Ծրագրի հովանավոր Սևան Թորոսյանն իր խոսքում կարևորել է նախաձեռնությունը և հույս հայտնել, որ այն արդյունավետ կլինի:
«Ուրախ եմ, որ Արցախում գործում է նման հաստատություն, որն իր արդյունքները կտա նաև մայր հայրենիքում: Ինքս աշխատում եմ շինարարության ոլորտում և կարծում եմ, որ նոր սերունդը պետք է ավելի մասնագիտացված ուսում ստանա այս բնագավառում ևս: Սա սկզիբն է, և ծրագիրը պետք է շարունակական լինի»,- ասել է Ս. Թորոսյանը:
«Եզնիկ Մոզյան արհեստագործական ուսումնարան»-ի գործադիր տնօրեն Վասպուրակ Կարապետյանն էլ ընդգծել է երկու հանրապետությունների միջև ուսանողների փոխանակման ծրագրերի կարևորությունը:
Նա նշել է, որ այս կերպ հնարավորություն է ստեղծվում, որպեսզի տարեցտարի ավելի ու ավելի մեծ թվով երիտասարդներ ընդգրկվեն մասնագիտական կրթության ոլորտում:
Վասպուրակ Կարապետյանի ուղեկցությամբ հյուրերը շրջայց են կատարել ուսումնարանի տարածքում, ծանոթացել ստեղծված պայմաններին:
