Sophos ընկերության կիբեր անվտանգության ոլորտի հետազոտողները Android համակարգով սարքերի համար վնասակար ծրագիր են հայտնաբերել, որը մարտկոցի արագ լիցքաթափում է առաջացնում:
Android սմարթֆոնները լիցքաթափող վիրուս է հայտնաբերվել
ՍՏԵՓԱՆԱԿԵՐՏ, 18 դեկտեմբերի, ԱՐՑԱԽՊՐԵՍ: Վնասակար ծրագրային ապահովումը հայտնաբերվել է Google Play խանութի մի քանի ծառայություններում եւ Andr/Clickr-AD անվանումը ստացել, հայտնում է news.am-ը:
Վարակված հավելվածների մեջ եղել է քլիկեր, որը գեներացրել է գովազդային հղումներով անցումները եւ աշխատել անկախ նրանից հավելվածը գործել է, թե ոչ: Մշտական ակտիվությունը մարտկոցի արագ լիցքաթափմանն է հանգեցրել: Պարզվել է, որ վարակված են ավելի քան 20 հավելվածներ, որոնք 2 մլն անգամ բեռնվել են:
Չարագործներն իրենց ծրագրերը գովազդատուների համար ներկայացրել են որպես iOS հավելվածներ, ինչը թույլ է տվել նրանց ավելի շատ եկամուտ ստանալ: Ներկա պահին վարակված ծրագրերը հեռացվել են Google Play-ից:
Փորձագետները խորհուրդ են տվել հակավիրուսներ օգտագործել, իսկ տուժողներին առաջարկել են նախնական կարգավորումներին վերադառնալ, սակայն զգուշացրել են, որ այդ դեպքում հեռախոսի տեղեկատվությունը ջնջվելու է:
