Այսօր՝ դեկտեմբերի 18-ին, Արցախի «Արդարություն» կուսակցության գործունեության 100-րդ օրվա կապակցությամբ տեղի է ունեցել կուսակցության համանախագահ Մարսել Պետրոսյանի մամուլի ասուլիսը:
«Արդարություն» կուսակցության համանախագահն ամփոփել է գործունեության 100 օրը
ՍՏԵՓԱՆԱԿԵՐՏ, 18 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ասուլիսին Մարսել Պետրոսյանը ներկայացրել է այս ընթացքում իրենց կողմից կատարված աշխատանքները, անդրադարձել հետագա անելիքներին:
«Սեպտեմբերի 7-ին կայացած համագումարում կուսակցությունն ընտրել էր 4 համանախագահներ, որոնք 2 տարվա ընթացքում իրենց պարտավորությունները կստանձնեն հաջորդաբար՝ յուրաքանչյուրը 6 ամսով: Կուսակցությանն անդամագրվել են ավելի քան 200 քաղաքացիներ: Այս ընթացքում մենք եղել ենք Քաշաթաղի, Մարտունու, Հադրութի, Մարտակերտի, Ասկերանի շրջաններում, հանդիպել մի շարք համայնքների երիտասարդության հետ, լսել նրանց կարծիքները: Այդ հանդիպումները կրելու են շարունակական բնույթ»,- ասել է Մ. Պետրոսյանը:
Անդրադառնալով առաջիկա անելիքներին՝ նորաստեղծ կուսակցության համանախագահը նշել է, որ պատրաստվում են ակտիվ մասնակցել 2020 թվականին Արցախում կայանալիք խորհրդարանական և նախագահական ընտրություններին: Պետրոսյանի խոսքով՝ ընտրությունը կատարում է ժողովուրդը, և ստացված արդյունքն իրենց համար կլինի ընդունելի:
«Այդ ընթացքում կաշխատենք ներկայանալ հանրությանը՝ ցուցադրելով մեր հետևողականությունը, գործունեության արդյունավետությունը: Մենք չենք ընդունում հնացած այս համակարգը: Մենք ցանկանում ենք, որպեսզի տեղի ունենա ոչ թե անձերի, պաշտոնյանների, այլ համակարգի արմատական փոփոխություն: Մեր կուսակցությունը տարբերվում է հանրապետությունում մինչ այդ ստեղծված կուսակցություններից: Այն ստեղծվել է երկու տարբեր նախաձեռնող խմբերի միացմամբ, մի քանի ամիսներ տևող բանակցությունների, բանավեճերի արդյունքում: Հանրության հետ շփվելու համար ընտրեցինք ամենադյուրին միջոցը՝ ֆեյսբուքյան էջը: Այդ հարթակում կարճատև գործունեության ընթացքում մեզ հաջողվել է Արցախի Նախագահի, Խորհրդարանի, նախարարությունների, պետական հիմնարկների ուշադրությունը բևեռել հրատապ լուծում պահանջող հարցերի վրա: Ներկայացրել ենք մի շարք խնդիրներ փոքր և միջին բիզնեսի հանդեպ գործող օրենքների անկատար լինելու մասին, գյուղատնտեսական նշանակութան հողատարածքները օտարերկրյա քաղաքացիներին սեփականության իրավունքով վաճառելու, ընտանիքներում ծնված երրորդ և հաջորդ երեխաների անվամբ նպատակային ժամկետային ավանդ բացելու կարգի, զինծառայողներին տրամադրվող վարկերի տոկոսադրույքների և «Արցախգազ» ընկերության կողմից ներտնային գազօգտագործման հետ առնչվող նոր պայմանագրերի կնքման մասին»,- ավելացրել է Մ. Պետրոսյանը:
Նա անդրադարձել է նաև Արցախի խնդրի կարգավորմանը՝ նշելով, որ պետք է հստակություն և պարզություն մտցվի այն հարցում, թե Արցախը լիազորում է արդյո՞ք ՀՀ ղեկավարությանը Ղարաբաղի անունից շարունակելու բանակցել Ադրբեջանի իշխանությունների հետ:
«Կուսակցությունը կարծում է, որ բանակցային գործընթացին պարտադիր կերպով Արցախը պետք է մասնակցի իր իշխանության պատվիրակությամբ: Սակայն այդ հարցը լուծում չի ստացել, և բանակցային գործընթացը շարունակում է մնալ այն վիճակում, ինչ տարիներ առաջ էր»,- ասել է Մ. Պետրոսյանը:
Մամուլի ասուլիսին կուսակցության համանախագահը պատասխանել է լրագրողների կողմից բարձրացված մի շարք այլ հարցերի:
