Ստեփանակերտի Վերածննդի հրապարակում այսօր՝ դեկտեմբերի 19-ին, վառվել են գլխավոր տոնածառի լույսերը:
Վառվել են Ստեփանակերտի գլխավոր տոնածառի լույսերը (լուսանկարներ)
ՍՏԵՓԱՆԱԿԵՐՏ, 19 դեկտեմբերի, ԱՐՑԱԽՊՐԵՍ: Օրվա առթիվ Ստեփանակերտի քաղաքապետարանի նախաձեռնությամբ կազմակերպվել են նաև մշակութային միջոցառումներ. մայրաքաղաքի ավելի քան 400 դպրոցականների մասնակցությամբ կայացել է ամանորյա ֆլեշմոբ:
Երգ ու պարով հանդես են եկել ՊԲ «Ասպետ» համույթը, Ստեփանակերտի մշակույթի տան սաները և անհատ կատարողներ:
Գլխավոր տոնածառի լույսերը վառել են Ձմեռ պապն և Ձյունանուշը:
Տոնածառի շուրջ հավաքված երեխաներին իրենց ներկայությամբ զվարճացրել են նաև մուլտիպլիկացիոն հերոսները և 2019 թվականի խորհրդանիշ խոզուկը:
Ողջունելով ներկաներին՝ Ձմեռ պապը շնորհավորել է բոլորին գալիք նոր՝ 2019 թվականի առթիվ և հայ ժողովրդին մաղթել հարատև ուրախություն և հաջողություն:
«Արցախպրես»-ի թղթակցի հետ զրույցում Ստեփանակերտի փոխքաղաքապետ Արմեն Հակոբյանն ասել է, որ առաջիկայում նախադպրոցական երեխաների համար նախատեսվում են մի շարք միջոցառումներ:
Նա ավելացրել է, որ դեկտեմբերի 31-ին Ձմեռ պապն ու Ձյունանուշը կշրջեն մայրաքաղաքի փողոցներով, կշնորհավորեն երեխաներին և կբաժանեն նվերներ: Երեկոյան մայրաքաղաքի հրապարակում տեղի կունենա տոնական համերգ, որը կավարտվի հրավառությամբ:
Ա. Հակոբյանը գալիք ամանորյա տոների առթիվ շնորհավորել է բոլորին և մաղթել Արցախ աշխարհին խաղաղություն, զինվորներին՝ բարի ծառայություն, համայն հայությանը՝ միասնականություն:
