Կայացել է ԱՀ Ազգային ժողովի ընթացիկ տարվա վերջին լիագումար նիստը
Այսօր՝ դեկտեմբերի 20-ին, տեղի է ունեցել ԱՀ Ազգային ժողովի ութերորդ նստաշրջանի եզրափակիչ լիագումար նիստը, որին ներկա էին 31 պատգամավորներ:
Կայացել է ԱՀ Ազգային ժողովի ընթացիկ տարվա վերջին լիագումար նիստը
ՍՏԵՓԱՆԱԿԵՐՏ, 20 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` նիստին ԱՀ ԱԺ նախագահ Աշոտ Ղուլյանն ասել է, որ ութերորդ նստաշրջանը ծանրաբեռնված է եղել՝ հատկապես օրինաստեղծ աշխատանքների կտրվածքով:
«Նախորդ տարիների օրինակով՝ այս անգամ էլ տարեվերջին մեր քննարկումների կենտրոնում էր հաջորդ տարվա պետական բյուջեի նախագիծը, որն անցել է հանձնաժողովային ու քաղաքական քննարկումների բոլոր փուլերը, իսկ մեկ շաբաթ առաջ` դեկտեմբերի 13-ին կայացած հերթական լիագումար նիստի ժամանակ ընդմիջվել են «ԱՀ 2019թ. պետական բյուջեի մասին» ԱՀ օրենքի նախագծի քննարկումները` հնարավորություն տալով պատգամավորներին ու խմբակցություններին նոր առաջարկներ ներկայացնելու գործադիր իշխանությանը»,- նշել է Ա. Ղուլյանը:
Այնուհետև Ազգային ժողովում վերսկսվել է «Արցախի Հանրապետության 2019թ. պետական բյուջեի մասին» օրենքի նախագծի քննարկումը:
Այն Խորհրդարանին է ներկայացրել ԱՀ ֆինանսների նախարար Արթուր Հարությունյանը՝ նշելով, որ պատգամավորական խմբակցությունների և առանձին պատգամավորների կողմից 2019 թվականի պետական բյուջեի նախագծի վերաբերյալ ԱՀ Նախագահին գրավոր ներկայացվել է առաջին փուլում 97, իսկ երկրորդ փուլում՝ 16 առաջարկ :
«Ստացված առաջարկությունների վերաբերյալ կառավարության հայտնած տեսակետները ներկայացվել են Ազգային ժողով` ամփոփաթերթիկի տեսքով: Միաժամանակ ներկայացվել է նաև «Արցախի Հանրապետության 2019թ. պետական բյուջեի մասին» օրենքի նախագծի լրամշակված տարբերակը, որը ներառում է պատգամավորների կողմից արված առաջարկությունները, որոնց վերաբերյալ կառավարության կողմից տրվել է դրական եզրակացություն: 2019 թվականի պետական բյուջեի լրամշակված նախագծի համաձայն՝ պետական բյուջեի վերջնական ցուցանիշները կազմելու են եկամուտների գծով` 112 միլիարդ 747 միլիոն դրամ, ծախսերի գծով` 111 միլիարդ 410.5 միլիոն դրամ: Պրոֆիցիտը կկազմի 1 միլիարդ 136.5 միլիոն դրամ»,- ասել է Ա. Հարությունյանը:
Գլխադասային հանձնաժողովի դրական եզրակացությունը ներկայացրել է ԱԺ ֆինանսաբյուջետային և տնտեսական կառավարման հարցերի մշտական հանձնաժողովի նախագահ, պատգամավոր Արամ Գրիգորյանը:
Նիստին ներկա ԱՀ Նախագահ Բակո Սահակյանը հանդես է եկել եզրափակիչ խոսքով՝ նշելով, որ բյուջեում արտացոլված են մեր երկրի տնտեսական զարգացման հիմնարար սկզբունքները, որոնց բաղադրիչներն են դինամիկ եւ համաչափ զարգացող տնտեսությունը, ներհայկական տնտեսական ինտեգրացիայի բարձր աստիճանի ապահովումը եւ սոցիալական պետության կարևորագույն ատրիբուտների պահպանումը: Առանձին ուշադրության կենտրոնում եղել եւ մնում են բանակաշինության, անվտանգության, ինչպես նաև քաղաքացիական պաշտպանության ոլորտները:
Գալիք տարվա գլխավոր ֆինանսական փաստաթուղթն ընդունվել է 26 կողմ, 5 դեմ ձայների հարաբերակցությամբ :
Խորհրդարանի այսօրվա նիստին ԱՀ ֆինանսների նախարար Արթուր Հարությունյանը ներկայացրել է նաև «Հարկային և այլ պարտադիր վճարների գծով արտոնություններ սահմանելու մասին» օրենքի նախագիծը՝ կից «Հարկերի մասին» ԼՂՀ օրենքում լրացումներ կատարելու մասին, «Շահութահարկի մասին», «Եկամտային հարկի մասին», «Ավելացված արժեքի հարկի մասին», «Հաստատագրված վճարների մասին», «Արտոնագրային վճարների մասին», «Առևտրի և ծառայությունների մասին» ԼՂՀ օրենքներում փոփոխություններ և լրացումներ կատարելու մասին փաթեթով:
Նա նշել է, որ վերոնշյալ օրենքների ընդունումը պայմանավորված է գործարար միջավայրի, հատկապես փոքր ու միջին ձեռնարկատիրության, հարկման բարենպաստ պայմանների ձևավորման, ինչպես նաև որոշ ոլորտներում առավել օպտիմալ հարկային դրույքաչափերի սահմանման և արդյունավետ հարկային վարչարարության իրականացման անհրաժեշտությամբ:
Գլխադասային հանձնաժողովի դրական եզրակացությունը ներկայացրել է ԱԺ ֆինանսաբյուջետային և տնտեսական կառավարման հարցերի մշտական հանձնաժողովի նախագահ, պատգամավոր Արամ Գրիգորյանը: Օրենքի նախագիծը երկրորդ ընթերցմամբ ընդունվել է 28 կողմ, 3 ձեռնպահ ձայների հարաբերակցությամբ:
ԱՀ գյուղատնտեսության նախարար Ժիրայր Միրզոյանն էլ ներկայացրել է «ԼՂՀ հողային օրենսգրքում լրացումներ և փոփոխություններ կատարելու մասին» օրենքի նախագիծը՝ կից «ԼՂՀ քաղաքացիական օրենսգրքում փոփոխություններ և լրացում կատարելու մասին» և «Տեղական ինքնակառավարման մասին» ԼՂՀ օրենքում լրացում կատարելու մասին փաթեթով:
Գլխադասային հանձնաժողովի դրական եզրակացությունը ներկայացրել է ԱԺ արտադրության և արտադրական ենթակառուցվածքների հարցերի մշտական հանձնաժողովի նախագահ, պատգամավոր Արպատ Ավանեսյանը: Օրենքի նախագիծը երկրորդ ընթերցմամբ ընդունվել է 24 կողմ, 6 դեմ, 1 ձեռնպահ ձայների հարաբերակցությամբ:
Երկրորդ ընթերցմամբ Խորհրդարանը 31 կողմ ձայնով ընդունել է նաև «Դիվանագիտական ծառայության մասին» օրենքի նախագիծը: Այն Խորհրդարանին է ներկայացրել ԱՀ արտաքին գործերի նախարար Մասիս Մայիլյանը՝ նշելով, որ այս ընթացքում նոր առաջարկություններ չեն եղել:
Գլխադասային հանձնաժողովի դրական եզրակացությունը ներկայացրել է Աժ արտաքին հարաբերությունների մշտական հանձնաժողովի նախագահ, պատգամավոր Արզիկ Մխիթարյանը:
ԱՀ պաշտպանության նորանշանակ նախարար Կարեն Աբրահամյանը ներկայացրել է «Ռազմական դրության իրավական ռեժիմի մասին» օրենքի նախագիծը: Նա նշել է, որ առաջին ընթերցումից հետո առաջարկություններ ու դիտողություններ չեն եղել:
Գլխադասային հանձնաժողովի դրական եզրակացությունը ներկայացրել է ԱԺ պաշտպանության, անվտանգության և օրինապահպանության հարցերի մշտական հանձնաժողովի նախագահի տեղակալ, պատգամավոր Գեորգի Պետրոսյանը:
Երկրորդ ընթերցմամբ օրենքի նախագիծն ընդունվել է 31 կողմ ձայնով :
«ԼՂՀ տոների և հիշատակի օրերի մասին» ԼՂՀ օրենքում փոփոխություններ և լրացումներ կատարելու մասին օրենքի նախագիծը ներկայացրել է Ազգային ժողովի պատգամավոր Ռիտա Մնացականյանը` նշելով, որ օրենքի նախագծում կատարվել են խմբագրական, բովանդակային փոփոխություններ և ավելացել են նոր հոդվածներ:
Գլխադասային հանձնաժողովի դրական եզրակացությունը ներկայացրել է պետաիրավական հանձնաժողովի նախագահ, պատգամավոր Հովիկ Ջիվանյանը :
Օրենքի նախագիծն ընդունվել է 22 կողմ, 6 դեմ ձայների հարաբերակցությամբ :
Օրենսդրական նախաձեռնությամբ հանդես է եկել նաև պատգամավոր Էդուարդ Աղաբեկյանը` ներկայացնելով «Արցախի Հանրապետության ընդերքի մասին օրենսգրքում փոփոխություն կատարելու մասին» օրենքի նախագիծը :
Գլխադասային հանձնաժողովի դրական եզրակացությունը ներկայացրել է ԱԺ արտադրության և արտադրական ենթակառուցվածքների հանձնաժողովի նախագահ, պատգամավոր Արպատ Ավանեսյանը: Օրենքի նախագիծն ընդունվել է 18 կողմ, 2 դեմ, 1 ձեռնպահ ձայների հարաբերակցությամբ:
«Պետական կենսաթոշակների մասին», «Պետական պաշտոններ զբաղեցրած անձանց սոցիալական երաշխիքների մասին» ԼՂՀ օրենքներում փոփոխություններ կատարելու մասին օրենքի նախագիծը ներկայացրել է ԱՀ աշխատանքի, սոցիալական հարցերի և վերաբնակեցման նախարար Սամվել Ավանեսյանը:
Գլխադասային հանձնաժողովի դրական եզրակացությունը ներկայացրել է սոցիալական և առողջապահության հանձնաժողովի նախագահ, պատգամավոր Արարատ Օհանջանյանը: Օրենքի նախագիծն ընդունվել է 31 կողմ ձայնով:
«Քաղաքացիական պաշտպանության մասին» ԼՂՀ օրենքում փոփոխություններ կատարելու մասին նախագիծը ներկայացրել է ԱՀ արտակարգ իրավիճակների պետական ծառայության տնօրեն Լևոն Մնացականյանը՝ նշելով, որ անհրաժեշտություն է առաջացել կատարել որոշակի խմբագրական փոփոխություններ:
Գլխադասային հանձնաժողովի դրական եզրակացությունը ներկայացրել է ԱԺ պաշտպանության, անվտանգության և օրինապահպանության հարցերի մշտական հանձնաժողովի նախագահի տեղակալ, պատգամավոր Գեորգի Պետրոսյանը: Օրենքի նախագիծն ընդունվել է 30 կողմ ձայնով :
Նիստի վերջում պատգամավորներ Գեղամ Ստեփանյանը և Վիլեն Սաֆարյանը հանդես են եկել պատգամավորական հայտարարություններով: