Ստեփանակերտի քաղաքապետարանում այսօր տեղի է ունեցել 2018 թվականի հոկտեմբերին Վանաձորում կայացած հանդբոլի պատանիների և աղջիկների Հայաստանի առաջնության (մինչև 16 տարեկանների) հաղթողների պարգևատրման արարողություն:
ԱՀ հանդբոլի ֆեդերացիայի նախագահը պարգևատրել է մի խումբ մարզիկների
ՍՏԵՓԱՆԱԿԵՐՏ, 25 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել Ստեփանակերտի քաղաքապետ, ԱՀ հանդբոլի ֆեդերացիայի նախագահ Սուրեն Գրիգորյանը:
Նա ասել է, որ հանդբոլն Արցախում միշտ էլ եղել է սիրված սպորտաձև: Զբաղվելով հանդբոլով՝ տարիների ընթացքում մեծ թվով տղաներից և աղջիկներից Արցախում ձևավորվել են թիմեր:
«Արցախյան պատերազմից 20 տարի անց Արցախում ստեղծվել է հանդբոլի ֆեդերացիա: Այդ սպորտաձևի մասսայկանացման և զարգացման համար մեր ֆեդերացիան հետևողական աշխատանք է տարել: Հանդբոլի համար պատրաստել ենք համապատասխան մարզադաշտեր և իրականացրել այլ աշխատանքներ: Ամենօրյա մարզումների արդյունքում մենք ունենում ենք ավելի մեծ ձեռքբերումներ: Մանավանդ վերջին շրջանում, արցախցի պատանիներն ու աղջիկները ցուցաբերելով իրենց հմտություններն ու խաղին տիրապետելու պրոֆեսիոնալ ձևերը՝ ՀՀ-ում անցկացվող մրցումներում սկսել են գրավել առաջնային տեղեր: Նրանք գիտակցում են, որ ոչ մի արդյունք առանց աշխատանքի չի ստացվում»,-մասնավորապես ասել է Ս. Գրիգորյանը:
Ստեփանակերտի քաղաքապետարանի կրթության և սպորտի բաժնի պետ Կառլեն Մարգարյանն էլ ասել է, որ սպորտը դաստիարակում է բոլորին՝ շրջապատում լինել ավելի կազմակերպված, կայացած և ուժեղ: Քաղաքապետարանի և ֆեդերացիայի նպատակն է, որպեսզի մասսայականացվի բոլոր տեսակի սպորտաձևերը և այն դարձվի ապրելակերպ:
Ըստ Կ. Մարգարյանի՝ հանդբոլի հաղթանակը խոսում է այդ սպորտաձևի մարզիչների և մարզիկների նվիրական աշխատանքի մասին:
Ստեփանակերտի N2 դպրոցի հանդբոլի մարզիչ Մարիետա Հովհաննիսյանը շնորհակալություն է հայտնել ֆեդերացիայի անդամներին՝ իրենց աշխատանքն ըստ արժանվույն գնահատելու համար:
Վերջինս էլ իր հերթին շնորհավորելով ներկաներին, հաղթողներին մաղթել է նորանոր սպորտային ձեռքբերումներ:
«Մենք ամեն ինչ անելու ենք, որ հանդբոլ մարզաձևում պահպանենք մեր պատվավոր հորիզոնականը: Կոչ եմ անում բոլոր մարզիչներին, որպեսզի միասին ստեղծենք հանդբոլի հզոր թիմ և միշտ հաղթանակներ գրանցենք»,-նշել է Մ. Հարությունյանը:
Հայաստանի հանդբոլի հավաքականի կազմում ընդգրկված ԱՀ Ճարտար քաղաքի 16-ամյա մարզիկ Եվա Ղուկասյանն էլ ասել է, որ ինքը 12 տարեկանից է սկսել զբաղվել հանդբոլով:
Սկզբնական պարապմունքներն անց է կացրել Ճարտարում:
Մեծ սեր ունենալով հանդբոլ սպորտաձևի հանդեպ, սկսել է անհատական պարապմունքներ անցկացնել: Մասնակցել է հանդբոլի մի շարք մրցումների և արժանացել պարգևների:
Իր հմուտ մարզիչների շնորհիվ արցախցի մարզիկն օրեցօր ավելի պրոֆեսիոնալ է դառնում: Նա երազում է դառնալ հանդբոլի միջազգային չեմպիոն:
ԱՀ հանդբոլի ֆեդերացիայի նախագահը մարզիկներին և մարզիչներին պարգևատրել է պատվոգրերով և դրամական պարգևներով:
