ՀՀ առաջին փոխվարչապետ Արարատ Միրզոյանն իր ֆեյսբուքյան էջում անդրադարձել է Ադրբեջանի արտգործնախարար Էլմար Մամեդյանովի նախօրեին արած հայտարարությանը:
Արցախցիներն իրենք են որոշելու իրենց ճակատագիրը. Միրզոյանի պատասխանը Մամեդյարովին
ՍՏԵՓԱՆԱԿԵՐՏ, 26 դեկտեմբերի, ԱՐՑԱԽՊՐԵՍ-ՀԱՅ ՁԱՅՆ: «Ադրբեջանի արտգործնախարար Մամեդյարովն ասել է, որ Բաքուն պատրաստ է ապահովել Արցախի հայության անվտանգությունը և նրանց բարձր մակարդակի ինքնակառավարման իրավունք տրամադրել:
Պրն Մամեդյարովին խորհուրդ եմ տալիս առաջարկը ներկայացնել նաև Արցախի ժողովրդին․ ի վերջո արցախցիներն իրենք են որոշելու իրենց ճակատագիրը։ Դա նրանց բնական, անօտարելի, որևէ սպառնալիքով կամ զենքի ուժով չճնշվող իրավունքն է, և այդ իրավունքը ուշ թե շուտ պետք է ճանաչել»,- գրել է նա:
Հիշեցնենք, որ դրբեջանի արտգործնախարար Էլմար Մամեդյարովն այսօր ասել է, թե պատրաստ են Լեռնային Ղարաբաղի հայերին բարձր մակարդակով ինքնակառավարման իրավունք տրամադրել։ «Մեր երկիրը, ինչպես որ ապահովում է այլ էթնիկ խմբերի ներկայացուցիչ իր քաղաքացիների անվտանգությունը, պատրաստ է իր միջազգային պարտավորություններին համապատասխան դա անել նաև Լեռնային Ղարաբաղում հայկական ծագում ունեցող քաղաքացիների նկատմամբ և նրանց բարձր մակարդակով ինքնակառավարման իրավունք տալ Ադրբեջանի Հանրապետության միջազգայնորեն ճանաչված սահմանների շրջանակում», - Մամեդյարովի խոսքն է մեջբերում մամուլի ծառայությունը ։ Նրա խոսքով` ղարաբաղյան հակամարտության հարցում առաջխաղացումը «ամբողջ տարածաշրջանում խաղաղության, անվտանգության ու կայունության պայմաններ ստեղծելով, առաջին հերթին տնտեսական աճի հնարավորություն կտա Հայաստանին»։ «Ցավոք, տարիներ շարունակ ընթացող բանակցություններն արդյունք չեն տվել։ Սակայն Հայաստանում տեղի ունեցած վերջին իրադարձությունները, նաև Ադրբեջանի նախագահ Իլհամ Ալիևի ու ՀՀ վարչապետ Նիկոլ Փաշինյանի զրույցները Դուշամբեում ու Սանկտ Պետերբուրգում` ԱՊՀ գագաթնաժողովների ընթացքում, ինչպես նաև իմ հայ գործընկերոջ հետ երեք հանդիպումները, բանակցային գործընթացի առաջխաղացման տեսակետից լավատես լինելու հիմքեր են տալիս», – ասել է Ադրբեջանի արտգործնախարարը։
