ԱՀ ուշու քունգ ֆուի ֆեդերացիայի նախաձեռնությամբ այսօր Ստեփանակերտի մշակույթի և երիտասարդության պալատում տեղի է ունեցել 2018 թվականին կառույցի կողմից իրականացրած աշխատանքների արդյունքների ամփոփում:
ԱՀ ուշու քունգ ֆուի ֆեդերացիայի համար 2018-ը ձեռքբերումների տարի էր. գլխավոր մարզիչ
ՍՏԵՓԱՆԱԿԵՐՏ, 28 դեկտեմբերի, ԱՐՑԱԽՊՐԵՍ: Միջոցառմանը ֆեդերացիայի սաները հանդես են եկել ցուցադրական վարժանքներով, իսկ Ստեփանակերտի մշակույթային կենտրոնների անդամներն էլ՝ երգ ու պարով:
Ֆեդերացիայի կողմից վերջերս կազմակերպված գոտիների որակավորման քննության հաղթողներն իրենց մարզիչներից ստացել են համապատասխան գույնի գոտիներ:
Ցուցադրվել է ֆեդերացիայի մեկամյա գործունեության մասին պատմվող տեսանյութ: Մարզիկների ծնողներն իրենց ելույթներում շնորհակալություն են հայտնել ֆեդերացիայի անդամներին՝ ասելով, որ նրանց քրտնաջան աշխատանքը մեծ դեր է կատարում նաև մատաղ սերնդի դաստիարակության գործում:
«Արցախպրես»-ի թղթակցի հետ զրույցում ԱՀ ուշու քունգ ֆուի ֆեդերացիայի գլխավոր և ԱՀ վաստակավոր մարզիչ Դավիթ Գրիգորյանն ասել է, որ իրենց գործունեությունը հիմնված է առաջին հերթին հավատի և վստահության վրա:
Նա նշել է, որ տարվա ընթացքում եղել են շատ դժվարություններ, որոնք իրենք հաղթահարել են: Ունեցել են վերելքներ, բայց նաև հիասթափություններ: Ֆեդերացիան շատ խնդիրներ ունի լուծելու, որոնք ըստ պատասխանատուի՝ ժամանակի ընթացքում հարթվելու է համակարգված աշխատանքի շնորհիվ:
«Տարվա ընթացքում գրանցել ենք լուրջ ձեռքբերումներ, այդ թվում՝ ֆեդերացիայի սան Արսեն Բաղրյանը Բրազիլիայում մասնակցելով ուշու քունգ ֆուի երիտասարդների աշխարհի առաջնությանը նվաճել է չեմպիոնի տիտղոսը, իսկ Վարդան Աբրահամյանը դարձել է այդ մրցաշարի բրոնզե մեդալակիր: Իսկ ուշու քունգ ֆուի Եվրոպայի մեծահասակների առաջնությունում Հայկ Գասպարյանը և Դավիթ Կասումյանն արժանացել են բրոնզե մեդալների»,- ասել է Դ. Գրիգորյանը և ընդգծել, որ 2019 թվականին իրենք կշարունակեն լուրջ աշխատանքներ իրականացնել՝ էլ ավելի մասսայականացնելու և զարգացնելու մարզաձևը:
Նա նաև նշել է, որ բացի Ստեփանակերտից, ֆեդերացիան մասնաճյուղեր ունի նաև Մարտունի քաղաքում և շրջանի Նոր շեն, Աշան, Վազգենաշեն, Բերդաշեն, Գիշի համայնքներում: Ֆեդերացիայի մարզիկների թիվը հասնում է 500-ի:
ԱՀ ուշու քունգ ֆուի ֆեդերացիայի նախագահը զրույցի վերջում շնորհավորել է արցախցիների և ողջ հայության գալիք Ամանորն ու Սուրբ Ծնունդը և մաղթել նորանոր հաղթանակներ ու վերելքներ:
