2018 թ-ին առողջապահության բնագավառի ծախսերը կազմել են 6 մլրդ 151մլն 800 հազար. Արայիկ Բաղրյանը հանդես է եկել մամուլի ասուլիսով
Արցախի Հանրապետության 2018 թվականի պետական բյուջեի նախագծով նախատեսված առողջապահության բնագավառի ծախսերը կազմել են 6 մլրդ 151 մլն 800 հազար դրամ, նախորդ տարվա 5 մլրդ 996 մլն 800 հազար դրամի դիմաց, որը համախառն ներքին արդյունքում կազմել է 2,1 %, իսկ ԱՀ պետական բյուջեում՝ 6,1%:
2018 թ-ին առողջապահության բնագավառի ծախսերը կազմել են 6 մլրդ 151մլն 800 հազար. Արայիկ Բաղրյանը հանդես է եկել մամուլի ասուլիսով
ՍՏԵՓԱՆԱԿԵՐՏ, 11 հունվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ հունվարի 11-ին տեղի ունեցած մամուլի ասուլիսի ժամանակ ասել է ԱՀ առողջապահության նախարար Արայիկ Բաղրյանը՝ նշելով, որ Արցախի առողջապահության համակարգի 2018 թվականի կատարողականը կազմել է 5 մլրդ 952 մլն 803 հազար 620 դրամ. բյուջեն կատարվել է 96,7 %-ով:
Ա. Բաղրյանը մանրամասնել է, որ առողջապահության նախարարությունը 2018 թվականին ուշադրություն է դարձրել հանրապետության բնակչության առողջության պահպանման,ծննդօգնության մակարդակի, մոր և մանկան առողջության պահպանման, բժշկական օգնության և սպասարկման որակի ու մատչելիության բարձրացմանը, բոլոր բուժհիմնարկների անհրաժեշտ սարքավորումներով և պարագաներով համալրման գործընթացին, ֆինանսական միջոցների արդյունավետ օգտագործմանը, անվճար և արտոնյալ պայմաններում դեղորայք ստանալու իրավունք ունեցող բնակչությանն անհրաժեշտ դեղորայքով ապահովմանը, ինչպես նաև ոլորտի օրենսդրական դաշտի բարելավմանն ու այլ խնդիրների:
«Նախարարությունը շարունակել է հետևողական աշխատանքներ ծավալել համակարգը բժշկական կադրերով համալրելու ուղղությամբ: 2018 թվականին հանրապետության բուժհիմնարկներ աշխատանքի է ուղեգրվել 19 բժիշկ: Արցախի կառավարության 2015 թվականի փետրվարի 25-ի թիվ 105-Ն որոշմամբ հաստատված «Այլ վայր աշխատանքի ուղեգրվող բժշկին ֆինանասական աջակցության ցուցաբերում» ծրագրի շրջանակներում 2018 թվականին 36 մլն դրամի չափով ֆինանսական աջակցություն է ստացել համակարգի 36 բժիշկ:Բացի այդ Հայաստանի Հանրապետության առողջապահության նախարարության ակադեմիկոս «Ավդալբեկյանի անվան առողջապահության ազգային ինստիտուտ»-ի ներուժով, Ամերիկայի Հայ օգնության ֆոնդի հայաստանյան գրասենյակի աջակցությամբ Ստեփանակերտում առաջնային օղակի 42 բժիշկների համար անց է կացվել արտագնա 6 շաբաթական դասընթաց: Նշված գրասենյակի կողմից մեկնարկվել է նաև նոր եռամյա ծրագիր հանրապետության համայնքային բուժքույրերի համար, որի շրջանակներում 2018 թվականին 4 շրջանների համայնքային 120 բուժքույրերի համար տեղում կազմակերպվել է վերապապատրաստման դասընթացներ։ Կազմակերպվել են նաև տարբեր սեմինարներ՝ մասնավորապես ուռուցքաբանություն, սրտաբանություն, ընդհանուր վիրաբուժություն և էլեկտրոնային առողջապահություն թեմաներով»,-տեղեկացրել է նախարարը:
Նա նշել է նաև, որ 2018 թվականին պետական պատվերի շրջանակներում Երևանի Մխիթար Հերացու անվան պետական բժշկական համալսարան է ընդունվել 22 դիմորդ: Հանրապետության շրջանները նեղ մասնագետներով համալրելու համար Արցախի առողջապահության նախարարության միջնորդությամբ հետդիպլոմային մասնագիտացում անցնելու նպատակով կլինիկական օրդինատուրա է ընդունվել 17 բժիշկ, իսկ կլինիկական օրդինատուրան ավարտած մասնագետներից 6-ը տեղավորվել են աշխատանքի:
«Համագործակցելով ՀՀ առողջապահության նախարարության ու տարբեր բարեգործական կազմակերպությունների հետ՝ ինչպես պետական աջակցությամբ, այնպես էլ բարեգործական հիմունքներով, համակարգի բժիշկ-մասնագետների մասնագիտական որակը բարձրացնելու նպատակով պարբերաբար վերապատրաստվում են ՀՀ և արտասահմանյան տարբեր երկրների կլինիկաներում: 2018 թվականին վերապատրաստվել է համակարգի 50 բժիշկ, որից 43-ը Հայաստանի Հանրապետության տարբեր բուժհիմնարկներում և 7-ը արտասահմանյան երկրներում, այդ թվում 2-ը Ֆրանսիայում, իսկ 5-ը ՝ Ռուսաստանի Դաշնությունում»,- ավելացրել է նախարարը:
Նա ասել է նաև, որ 2019 թվականի հունվարից վերակազմակերպման ձևով Հանրապետական բժշկական կենտրոնին է միացվել Ուռուցքաբանական դիսպանսերը, իսկ «Արևիկ» մանկական բուժմիավորմանը՝ ինֆեկցիոն հիվանդանոցը։ Նշված բուժհիմնարկների միավորման արդյունքում հաստիքների կրճատում չի կատարվել։
Ըստ Ա. Բաղրյանի՝ 2019 թվականին ԱՀ առողջապահության կառույցը նախատեսում է բնակիչների բուժսպասարկման մատչելիություն և բուժման որակի բարձրացում:
Ասուլիսի վերջում նախարարը պատասխանել է լրագրողների հարցերին: