ՍՏԵՓԱՆԱԿԵՐՏ, 16 հունվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ հունվարի 16-ին Արցախում մեկնարկած Հայ Յեղափոխական Դաշնակցության 33-րդ ընդհանուր ժողովին ասել է ՀՅԴ Բյուրոյի ներկայացուցիչ Հրանտ Մարգարյանը՝ ավելացնելով, որ Արցախը վերջին 30 տարիների ընթացքում եղել է կենսագրություն և գերխնդիր։

«Պայքարը դեռ շարունակվում է մեր ազատագրածը հավերժացնելու համար: Անցած 30 տարիներին թե՛ Արցախը՝ իբրև ինքնուրույն, միասնական քաղաքական միավոր, թե՛ Հայ Յեղափոխական Դաշնակցությունը աշխարհը տեսել են մեկ ընդհանուր դիտակետից: Այժմ վտանգ կա. արտաքին քաղաքականության մեր ձախողումները, ռազմավարական դաշնակցի՝ Ռուսաստանի Դաշնության հետ հարաբերություններում առկա, մեղմ ասած, դժվարությունները ուղղակիորեն առնչվում են մեր անվտանգությանն ու Արցախի պայքարին։ Անհրաժեշտ է կարգավորել հարաբերությունները։ Պետության կազմակերպական ընթացքը, բարոյական, քարոզչական մթնոլորտը ամենեևին վստահություն չեն ներշնչում, թե մենք ընթանում ենք չզիջելով զարգանալու ուղիով։ Մենք մի կողմ ենք դրել ազգ-բանակ ծրագիրը, ու լրջորեն չենք պատրաստվում պատերազմի, որպեսզի իսկապես խուսափենք պատերազմից։ Պարտադրված պատերազմ դիմագրավելու համար մեզ պետք է միասնություն, հայրենասիրություն ու պայքարի ոգի, իսկ այն, ինչ քարոզվում է այսօր, այլ բան է: Կազմակերպված պետություն, հասարակություն ունենալու փոխարեն մեզ հրամցվում են օտարածին ինչ-ինչ արհեստական օրակարգեր։ Կոտրվում է մեր ժողովրդի միասնության, պայքարի ոգին»,- մասնավորապես նշել է Հ. Մարգարյանը:

Նրա խոսքով՝ մեծ շփոթ կա, հնարավոր է նաև գիտակցաբար ստեղծվող շփոթ, որպեսզի հետզհետե ընդունելի դառնա անընդունելին:

«Ասածս վերաբերում է արցախյան հարցի շուրջ բանակցություններում մեր դիրքորոշումներին։ Շրջանառության մեջ են դրվել «տարածքներ խաղաղության դիմաց», «տարածքներ անվտանգության դիմաց» բանաձևերը։ Բայց մեր ժողովուրդը շարունակել է փաստել՝ Արցախը մերն է ու վերջ»,- նշել է Հ. Մարգարյանը:

Իր խոսքում Հրանտ Մարգարյանը հայտարարել է, որ չի դնելու թեկնածությունը Բյուրոյի կազմի ընտրությունների ժամանակ։

«Նախապես հայցում եմ բոլոր ընկերների ներողամտությունը: Իմ որոշումը նահանջ և պարտություն չէ»,- նշել է Հ. Մարգարյանը: