ՍՏԵՓԱՆԱԿԵՐՏ, 17 հունվարի, ԱՐՑԱԽՊՐԵՍ: Այս  մասին  «Արցախպրես»-ի  թղթակցի  հետ  զրույցում  ասել  է Ստեփանակերտի  նորաբաց  «VitaSol» աղաբուժության  կենտրոնի  գործադիր  տնօրեն, բժիշկ  Հայկ  Պապիկյանը՝ նշելով, որ  դեռևս 2017թ-ից աշխատելով  Արցախում՝   ակներև դարձավ, որ արցախցիներին  ևս անհրաժեշտ է ոչ դեղորայքային պրոֆիլակտիկ բուժում։

Ըստ   տնօրենի՝  այդ  պակասը  լրացնելու  համար մտահղացում  է   առաջացել  Ստեփանակերտում   բացել  «Աղե քարանձավ», որը  ծովին փոխարինող այլընտրանք է:

«Աղաբուժությունը (հալոթերապիա) անհրաժեշտ  է  այն դեպքում, երբ երեխաների  կամ  մեծահասակների  մոտ  առկա են ցածր դիմադրողականություն, շնչուղիների  հիվանդություններ՝ գրիպ, կրկնվող բրոնխիտ և թոքաբորբ, ձգձգվող հազեր, պոլինոզ՝ այսինքն սեզոնային ալերգիա, ռինիտ՝ ադենոիդիտ, ֆարինգիտ, ալերգիկ և խրոնիկ հարբուխ, քնի խանգարումներ, մաշկային ալերգիաներ, նյարդային շեղումներ, սթրեսի նկատմամբ մեծ զգայունություն: Հալոթերապիան մարդկանց համար բուժական ազդեցություն ունի, որը տրվում է շնչելով աղի միկրոմասնիկներով հագեցած օդը։ Հալոթերապիան մեզ հայտնի է դեռևս դարեր առաջ և ցուցված է ոչ միայն որևէ խնդիր ունեցող հիվանդներին, այլ նաև որևէ գանգատ չունեցող մարդկանց համար: Կենտրոնում  տեղադրված  է  հալոգեներատոր  սարք, որն  օդը հագեցնում է աղի իոններով։ Մշտապես հալոգեներատորը լազերով չափում է և օդը հագեցնում անհրաժեշտ քանակի իոններով։ Աղե քարանձավում պատերը և առաստաղը ևս ամբողջությամբ աղով են պատված՝ միջավայրում բակտերիաներ անցնելուց խուսափելու համար»,-մանրամասնել է  Հ.  Պապիկյանը՝   հավելելով, որ  կենտրոնի աղը բերված է Երևանում գործող աղի հանքից:

Մեր  զրուցակիցն  ասել է  նաև, որ  հալոթերապիայի մեկ ամբողջական կուրս ստանալու համար անհրաժեշտ է առանց դադարի այցելել 15 անգամ։ Առաջին այցելության տևողությունը կազմում է 30 րոպե, այնուհետև, սկսած երկրորդ այցելությունից՝  40 րոպե։

Մեկ սեանս անց կացնելը «աղե քարանձավ»-ում հավասարազոր է 3-4 օր ծովի ափին անց կացնելուն։ Անկախ  տարիքից  բոլոր  ցանկացողները  կարող  են  այցելել  կենտրոն։

«Կենտրոնում  կան  մանկական և ընտանեկան փաթեթներ, որոնք էլ ավելի հարմարավետ են դարձնում «աղե քարանձավ» հաճախումը։ «VitaSol»-ում երեխաների  և մեծահասակների  համար ստեղծված է հետաքրքիր ժամանց՝ գերարագ «WIFI» կապ, հեռուտացույց, բազմաթիվ մանկական խաղեր։ Մեզ մոտ, ի տարբերություն նմանատիպ այլ կենտրոնների, գները բավականին մատչելի են. մինչև 7 տարեկան փոքրիկի և ծնողի համար մեկ այցելության գինը կազմում է 3000 դրամ, 7-15 տարեկանների համար՝ 2500 դրամ: Առկա են նաև տարբեր խմբային փաթեթներ, որոնցից մեկի դեպքում  15 հաճախումը կազմում է 40.000 դրամ։ Գինը կախված է սեանսների քանակից, տարիքային խմբից և կոնկրետ փաթեթից»,-տեղեկացրել  է  Հ.  Պապիկյանը:

«VitaSol» աղաբուժության կենտրոն չի  թույլատրվում  սուր  բույրով   օծանելիք  օգտագործած, ալկոհոլի, թմրանյութերի  կամ  հոգեմետ  նյութերի  ազդեցության  տակ   կամ  ոչ  սթափ  վիճակում, ինչպես  նաև   ինֆեկցիոն  հիվանդություններով, բարձր  ջերմությամբ և  հիվանդությունների սրացման  փուլում   գտնվող  հաճախորդներին:

«VitaSol» աղաբուժության կենտրոն հաճախող երկու երեխաների մայր Լիրա Միրզոյանն ասել է, որ ինքը շատ ուրախ է, որ Արցախում սկսել է գործել հալոթերապիա, հաշվի առնելով դրա խիստ անհրաժեշտությունը:

«Արցախում շնչառական ուղիների խնդիրներ ունեցող երեխաների թիվը մեծ է: Իմ երեխաները հաճախակի էին հիվանդանում և ես անընդհատ դիմում էի բժիշկներին: Երեխաներին  նշանակել էին ծովային բուժում, որը, ինչպես  շատերի, այնպես  էլ   մեզ  համար, հասանելի չէ: Այսօր ոգևորությամբ կարող եմ ասել, որ Արցախում զգացվում է ծովի շունչը: Հալոթերապիայի արդյունքը միանգամայն նկատվում է երեխաների մոտ»,-ավելացրել է Լ. Միրզոյանը և   նշել,  որ կենտրոնում երեխաների համար նախատեսված է էկոլոգիապես մաքուր խաղալիքներ, որոնցով նրանք խաղում են. նույնիսկ ժամանակի ավարտին էլ չեն ցանկանում դուրս գալ «աղե քարանձավ»-ից: