ՍՏԵՓԱՆԱԿԵՐՏ, 17 հունվարի, ԱՐՑԱԽՊՐԵՍ: Այս  մասին  «Արցախպրես»-ի  թղթակցի  հետ զրույցում  ասել  է  ՍԱՊԾ   պետ   Արթուր  Ներսիսյանը:

Նա  նշել է, որ  ոլորտի կարգավորման հիմնական նպատակը հանրության առողջությունը սննդամթերքի հնարավոր վնասակար ազդեցությունից պաշտպանելն  է: Սննդամթերքի անվտանգության ոլորտի  մյուս  խնդիրն էլ  սննդի շղթայի բոլոր փուլերում կատարվող գործառույթների ժամանակ մարդու կյանքի, առողջության և շրջակա միջավայրի անվտանգության երաշխիքների ապահովումն է:

«Սննդամթերքի անվտանգության հետ կապված խնդիրների պարզաբանման նպատակով ցանկացած անձի հնարավորություն ենք տալիս ուղիղ կապ հաստատել մեր  կառույցի  հետ՝  զանգահարելով ծառայության 5099 «թեժ գծի» համարով: Այս 5  տարիների ընթացքում գործող թեժ գծին զանգահարել է 100-ից ավել քաղաքացի: Զանգերի   հիմնական պատճառները՝ բողոքներ, դիտողություններ, տեղեկություններ կամ առաջարկություններ փոխանցելն  է»,- տեղեկացրել  է   կառույցի  պատասխանատուն:

Ըստ   պետի՝ ծառայության կողմից պարբերաբար վերահսկողություն է իրականացվում հանրապետությունում գործող վաճառքի կետերում: Սակայն, որոշ  հանգամանքներից   ելնելով, հնարավոր չէ ամենօրյա վերահսկողություն իրականացնել բոլոր համայնքներում:  Ուստի, անհրաժեշտ է՝  տեղական ինքնակառավարման մարմիններն օգտվեն այս մասով օրենսդրությամբ իրենց վերապահված լիազորություններից:

Խոսելով  առաջիկա  ծրագրերի  մասին՝  Ա.  Ներսիսյանն  ասել է, որ  ծառայությունը   շարունակելու  է կատարելագործել սննդամթերքի անվտանգության բնագավառը կարգավորող օրենսդրական դաշտը՝ հաշվի առնելով նախորդ տարվա վերահսկողության արդյունքում հայտնաբերված խախտումների բնույթը՝ դրանք հնարավորինս նվազագույնի հասցնելու ակնկալիքով: Ծառայությունը կիրականացնի   նաև  իրազեկման և տեղեկատվական լայնածավալ աշխատանքներ:

«Նշված գործընթացների իրագործման հիմնական նպատակն այն է, որ սպառողը իրազեկված  լինի իր իրավունքների մասին. լինի    պաշտպանված և  ապահով»,-ընդգծել  է  Ա.  Ներսիսիյանը: