ԱՀ ավտոճանապարհների վերակառուցման, վերանորոգման և պահպանման նպատակով 2018 թվականին հատկացվել է 6 մլրդ 221 մլն 458 հազար դրամ:
Տեղական նշանակության ճանապարհների պատասխանատվությունը կստանձնեն շրջվարչակազմերի պատասխանատուները. Կարեն Շահրամանյան
ՍՏԵՓԱՆԱԿԵՐՏ, 21 հունվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ հունվարի 21-ին տեղի ունեցած մամուլի ասուլիսի ժամանակ ասել է ԱՀ քաղաքաշինության նախարար Կարեն Շահրամանյանը՝ նշելով, որ ԱՀ կառավարության կողմից կատարված ներդրումներն ուղղվել են ԱՀ ընդհանուր օգտագործման ավտոճանապարհների հիմնանորոգմանն ու շահագործմանը, ինչպես նաև գյուղամիջյան ճանապարհների բարեկարգման աշխատանքներին:
Ըստ նախարարի՝ հաշվետու տարում իրականացվել է 2830 քառ./մ փոսային նորոգումներ։
«Ավարտված են Շուշիի մի շարք փողոցների բարեկարգումը և կենցաղային կոյուղու կառուցման մասնակի վերանորոգումը, Շահումյանի շրջանի Նոր Գետաշեն գյուղի հետիոտնի կամրջի կառուցումը, Ստեփանակերտ-Ասկերան ճանապարհահատվածի փոսային վերանորոգումը, Մարտակերտի շրջանի Մատաղիսի բնակելի շենքերի բակերի բարեկարգումը, Գանձասար տանող վանական համալիրի ավտոճանապարհի փոսային վերանորոգման աշխտանքները: Կատարվել են նաև Հադրութի շրջանի Արա լեռ տարածքի, Կարմիր Շուկա-Հադրութ ճանապարհահատվածի ասֆալտապատման աշխատանքները, ինչպես նաև Ստեփանակերտ-Հադրութ ավտոճանապարհի փոսերի վերանորոգումը, Թալիշի դպրոցի, մանկապարտեզի, համայնքային կենտրոնի և հանդիսությունների տան տարածքի բարեկարգումը: Աշխատանքներ են տարվել նաև Շահումյանի, Բերձորի, Ասկերանի շրջանի Իվանյան համայնքներում, ինչպես նաև Հադրութի շրջանի Հին Թաղեր-Արևշատ և Վարդենիս-Մարտակերտ ավտոճանապարհների ու Քարվաճառի խաչմերուկի վերանորոգման ուղղությամբ»,- մասնավորապես ասել է նախարարը:
Նա տեղեկացրել է նաև, որ այսուհետ տեղական նշանակության ճանապարհների պատասխանատվությունը կստանձնեն շրջվարչակազմերի պատասխանատուները: Ի դեպ, եթե 2018 թվականին այդպիսի ճանապարհների համար նախատեսված էր 2 մլրդ դրամ, ապա 2019 թ-ին՝ 3 մլրդ:
