Լեռնային Ղարաբաղի Հանրապետության էկոնոմիկայի նախարարության տրամադրած տվյալների համաձայն՝ Արցախում ներդրումների միջին տարեկան աճը 2007–2015 թթ-ին կազմել է շուրջ 30%:
Արցախում ներդրումների միջին տարեկան աճը 2007–2015 թթ-ին կազմել է շուրջ 30%. ԼՂՀ Էկոնոմիկայի նախարարություն
ՍՏԵՓԱՆԱԿԵՐՏ, 8 նոյեմբերի, ԱՐՑԱԽՊՐԵՍ: Միայն 2015 թ-ին ներդրումների գումարը 5.8 անգամ գերազանցել է 2007 թ-ին կատարված ներդրումներին, օտարերկրյա ներդրումները գերազանցել են 2.8 անգամ: 2007-2015թթ. կատարված օտարերկրյա ներդրումների ընդհանուր արժեքը կազմել է 54,4 մլրդ դրամ:
Այդ տարիներին իրական ակտիվներում իրականացված ներդրումների ավելի քան 31,7%-ը իրականացվել է արդյունաբերության ոլորտում, իսկ ներդրումներ-ՀՆԱ հարաբերակցությունը տարեկան կտրվածքով կազմում է շուրջ 33%:
Օտարերկրյա ներդրումների տեսակարար կշիռը ընդհանուրի մեջ դիտարկված ժամանակահատվածում կազմում է շուրջ 13%: Տարբեր են օտարերկրյա ներդրումների ոլորտներն ու աշխարհագրությունը:
ԼՂՀ-ում գործող առևտրային բանկերի (մասնաճյուղերի) վարկային ներդրումները 2016 թ-ի հունվարի 1-ի դրությամբ կազմել են 206.3 մլն դոլար, իսկ ավանդների գումարը՝ մոտ 127 մլն դոլար, որոնք համապատասխանաբար մոտ 7 և 13 անգամ գերազանցում են 2007 թ-ի հունվարի 1-ի դրությամբ արձանագրված ցուցանիշները:
Ըստ նախարարության՝ 2016թ. հունվարի 1-ի դրությամբ ԼՂՀ պետական ռեգիստրում գրանցված է 3521 առևտրային կազմակերպություն, 885 ոչ առևտրային կազմակերպություն և 8141 անհատ ձեռնարկատեր: Սկսած 2007թ.-ից առևտրային կազմակերպությունների թիվը ավելացել է 876-ով, ոչ առևտրային կազմակերպությունների քանակը՝ 478-ով, իսկ անհատ ձեռնարկատերերի քանակը՝ 5546-ով (ընդամենը տնտեսվարող սուբյեկտների թիվն աճել է 6900-ով կամ 2,2 անգամ):
ԼՂՀ արդյունաբերության ոլորտում արձանագրվել են էական կառուցվածքային փոփոխություններ: Եթե 2007 թվականին արդյունաբերական արտադրանքի 46.3 տոկոսը բաժին էր ընկնում հանքագործական արտադրությանը, 34,9 տոկոսը մշակող արդյունաբերությանը, 18,8 տոկոսը էլեկտրաէներգիայի, գազի, ջրի արտադրությանը և բաշխմանը, 2015 թ-ին ունենք միանգամայն այլ պատկեր է: Գրեթե 2 անգամ նվազել է հանքագործական արտադրության բաժինը՝ կազմելով 24,2 տոկոս: Հակառակ դրան՝ նույն համամասնությամբ (գրեթե 2 անգամ) աճել է էլեկտրաէներգիայի, գազի, ջրի արտադրությանը և բաշխումը՝ հասնելով մինչև ՀՆԱ-ի 35,7 տոկոսը:
ԹԵՐԹ.ամ-ի փոխանցմամբ՝ ըստ ԼՂՀ Էկոնոմիկայի նախարար Անդրանիկ Խաչատրյանի՝ նման ցուցանիշներ հնարավոր է եղել ապահովել փոքր ՀԷԿ-երի կառուցման ծրագրի իրականացման շնորհիվ:
Թվով 12 նոր ՀԷԿ-երի կառուցումը հնարավորություն է ընձեռել գրեթե հասնել էլեկտրաէներգիայով ինքնապահովման մակարդակին: 2016թ. 9 ամիսների արդյունքներով՝ արտադրված էլեկտրաէներգիայի ծավալը գերազանցել է սպառումը և շուրջ 5.0 մլն կՎՏ էլեկտրաէներգիա արտահանվել է ՀՀ:
Զգալիորեն աճել է նաև մշակող արդյունաբերության մասնաբաժինը ՝ կազմելով 40.1 տոկոս:
