Forbes ամսագրի ռուսական ծառայությունը կազմել է Ռուսաստանի ամենահարուստ մարդկանց վարկանիշային աղյուսակը, որում տեղ է գտել 200 գործարար:
Ռուսաստանի ամենահարուստ մարդկանց թվում են ծագումով հայ 8 գործարարներ. Forbes
ՍՏԵՓԱՆԱԿԵՐՏ, 20 ապրիլի, ԱՐՑԱԽՊՐԵՍ: Վարկանիշային աղյուսակում ներառված են հայկական ծագում ունեցող 8 գործարարներ, հայտնում է 1in.am-ը:
18-րդ հորիզոնականում գտնվում է Սերգեյ Գալիցկին (Հարությունյան), որը «Մագնիտ» առևտրի ցանցի գործադիր տնօրենն է: Նրա կարողությունը կազմում է 6.8 միլիարդ դոլար:
«Տաշիր Գրուպ» ձեռնարկության սեփականատեր Սամվել Կարապետյանի կարողությունը նախորդ տարվա համեմատ ավելացել է 300 միլիոն դոլարով: Նա 3.4 միլիարդ դոլարով զբաղեցրել է 32-րդ հորիզոնականը:
«Ռոսգոսստրախ» ընկերության համասեփականատեր և գործադիր տնօրեն Դանիլ Խաչատուրովը՝ 2 միլիարդ դոլար կարողությամբ, 48-րդ տեղում է:
Վարկանիշային աղյուսակում տեղ են գտել նաև Ռուբեն Վարդանյանը, որը զբաղեցրել է 99-րդ հորիզոնականը և ունի 950 միլիոն դոլարի կարողություն, «ՍԿԱՐԼԵՏ» ընկերության հիմնադիր Ալբերտ Ավդոլյանը (800 միլիոն դոլար), Նիկոլայ և Սերգեյ Սարգիսովները (700 միլիոն դոլար) և Mamba և Badoo ծանոթությունների կայքերի հիմնադիր Անդրեյ Անդրեևը (Անդրեյ Օհանջանյան), որի կարողությունը գնահատվել է 500 միլիոն դոլար:
Նշենք, որ վարկանիշային աղյուսակը գլխավորում է «ՆՈՎԱՏԷԿ» ընկերության համահիմնադիր Լեոնիդ Միխելսոնը՝ 18.4 միլիարդ դոլար կարողությամբ: Ռուսաստանի երկրորդ ամենահարուստ մարդը «Սեվերստալ» հոլդինգի տնօրենների խորհրդի նախագահ Ալեքսեյ Մարդաշովն է (17.5 միլիարդ դոլար): Եռյակը եզրափակում է Նովոլիպեցկի մետարուլգիական կոմբինատի համասեփականատեր Վլադիմիր Լիսինը (16.1 միլիարդ դոլար):
