Արցախի նախագահական ընտրություններին դեռ կա մոտ 1.5 տարի ժամանակ, բայց այդ փաստը չի խանգարում, որպեսզի այդ ընտրություններին մասնակցող գործիչներն արդեն իսկ հայտարարեն իրենց հավակնությունների մասին։
Ամենայն հավանականությամբ, մեր կուսակցությունը ևս թեկնածու կառաջադրի. Վարդգես Բաղրյան
ՍՏԵՓԱՆԱԿԵՐՏ, 10 փետրվարի, ԱՐՑԱԽՊՐԵՍ: Արցախի ԱԺ նախագահ Աշոտ Ղուլյանի ղեկավարած «Ժողովրդավարություն» խմբակցության ղեկավար Վարդգես Բաղրյանը «Առաջին լրատվական»-ի հետ զրույցում նշել է, որ ընտրությունների հետ կապված վերջնական որոշում կլինի կուսակցության համագումարում: «Բայց այնպես չէ, որ մենք չենք պատրաստվում թեկնածու առաջադրել։ Ամենայն հավանականությամբ, մեր կուսակցությունը ևս թեկնածու կառաջադրի։ Այս պահի դրությամբ հստակ ասել չեմ կարող, կուսակցությունը կորոշի»,- ասաց մեր զրուցակիցը՝ շեշտելով, որ իրենք անպայման ընտրություններին մասնակցելու են։
Ի՞նչն է պատճառը, որ Արցախում ըստ էության մեկնարկել է ոչ պաշտոնական քարոզարշավ, և ընտրությունների հետ կապված խմորումները մեկուկես տարի շուտ են սկսել, հարցին ի պատասխան Վարդգես Բաղրյանն ասաց. «Անկեղծ ասած՝ այդ հարցն ինձ մոտ է առաջանում։ Կարծում եմ՝ դա պայմանավորված է և՛ այն հանգամանքով, որ գործող նախագահ Բակո Սահակյանը հայտարարել է, որ 2020 թվականին չի առաջադրելու իր թեկնածությունը և՛ նաև պայմանավորված է Հայաստանում տեղի ունեցած իրադարձություններով»։
Արայիկ Հարությունյանի ղեկավարած «Ազատ Հայրենիք» խմբակցության ղեկավար Արթուր Թովմասյանը «Առաջին լրատվական»-ի հետ զրույցում ասաց՝ իրենց նախընտրելու թեկնածուն Արայիկ Հարությունյանն է. «Եթե հիշում եք՝ ես հարցազրույցում նշել եմ, որ «Ազատ Հայրենիք» կուսակցությունը մասնակցելու է 2020 թվականի համապետական ընտրություններին և սեփական թեկնածուն է առաջադրելու, մասնակցելու ենք նաև խորհրդարանական ընտրություններին։ Կենտրոնական խորհրդի նիստ այդ կապակցությամբ առայժմ չի եղել, թեպետ ունեմ իմ նախընտրական թեկնածուն՝ ես հայտարարել եմ, որ այդ թեկնածուն Արայիկ Հարությունյանն է։ Կենտրոնական խորհուրդը դա դեռ պետք է հաստատի»։
Մեր զրուցակիցը հավելեց, որ այս պահի դրությամբ ինքը զբաղված է կուսակցական շինարարությամբ. «1000-ին մոտ մարդիկ ցանկություն են հայտնել անդամագրվել մեր կուսակցությանը, ընդ որում՝ մեծամասնությունը երիտասարդներ»։
Արթուր Թովմասյանից ևս հետաքրքրվեցինք, ի՞նչն է պատճառը, որ այսքան վաղ են սկսվել նախընտրական քննարկումները։ «Օրենքով սահմանված կարգով ամեն ինչ կլինի։ Իհարկե, մեկ թեկնածու չի լինի։ Թեկնածուներն ինչքան շատ լինեն, այնքան ժողովուրդն ավելի մեծ հնարավորություն կունենա ճիշտ ընտրություն կատարելու»,-եզրափակեց նա։
Արցախի խորհրդարանի «Դաշնակցություն» խմբակցության ղեկավար Արմեն Սարգսյանը «Առաջին լրատվական»-ի հետ զրույցում ասաց. «Մենք ունենալու ենք Շրջանային ժողով, որի ընթացքում կորոշենք մասնակցության հարցը»։
Սարգսյանը նշել է, որ դա տեղի կունենա առաջիկա 2-3 ամիսների ընթացքում. «Այժմ քննարկում ենք ժամկետից շուտ անցկացնելու հարցը»։
Մեր այն հարցին, թե ինչու են այսքան շուտ սկսվել քննարկումները, պատգամավորը նշել է. «Չեմ կարող այդ հարցին պատասխանել։ Մենք ունենք մեր ծրագիրը և դրանով ենք առաջ շարժվում»։
