Խաչատրյան 15-րդ հոբելյանական մրցույթում իրենց ուժերն են չափելու երեսուն դաշնակահար տասներկու երկրից
Արամ Խաչատրյանի ժառանգությունը ամբողջ աշխարհում ճանաչելի դարձնելու նպատակով 15 տարի շարունակ կոմպոզիտորի ծննդյան օրը` հունիսի 6-ին, Երևանում մեկնարկում է նրա անվան միջազգային երաժշտական մրցույթը, որին այս տարի մասնակցելու է երեսուն երաժիշտ տասներկու երկրից:
Խաչատրյան 15-րդ հոբելյանական մրցույթում իրենց ուժերն են չափելու երեսուն դաշնակահար տասներկու երկրից
ՍՏԵՓԱՆԱԿԵՐՏ, 30 ապրիլի, ԱՐՑԱԽՊՐԵՍ-ԱՐՄԵՆՊՐԵՍ: Մրցույթում, որը կանցկացվի մինչև հունիսի 14-ը, Խաչատրյանի և այլ ստեղծագործողների գործերն են ներկայացնելու դաշնակահարները:
«Մրցույթը նշում է իր 15-ամյա հոբելյանը, և այս տարի այն անցկացվելու է դաշնակահարների համար. դա շատ խորհրդանշական է, որովհետև 2003 թվականին անդրանիկ մրցույթին նույնպես դաշնակահարներն էին մրցում:
Ընտրվել է 30 մասնակից 12 երկրից: Մեզ բազմաթիվ երիտասարդ ստեղծագործողներ են դիմել: Առավելագույնը 24 երաժիշտ պետք է անցներ, բայց ընտրությունն այնքան մեծ էր, որ երեսունին ուժերը մեր հարթակում չափելու հնարավորություն ընձեռեցինք: Ըստ իս` բավականին թեժ մրցակցություն է սպասվում»,-մեզ հետ զրույցում նշեց «Արամ Խաչատրյան-մրցույթ» մշակութային հիմնադրամի գործադիր տնօրեն Աննա-Տեր Հովակիմյանը:
Նրա խոսքով` տարիների ընթացքում մրցույթն ընդլայնում է իր աշխարհագրությունը: «Ընդգրկվել են Չինաստանից, Հայաստանից, Ռուսաստանից, Ուկրաինայից, ԱՄՆ-ից, Հյուսիսային Կորեայից, Թայլանդից և այլ երկրներից երաժիշտներ, որոնք ներկայացնում են տարբեր կատարողական դպրոցներ: Յուրաքանչյուր տարի անհամբեր սպասում ենք մասնակիցների հենց Խաչատրյանի գործերի կատարումներին, քանի որ մրցույթի նպատակը Խաչատրյանի ստեղծագործությունները հանրահռչակելն է»,-ընդգծեց Տեր-Հովակիմյանը:
Հիմնադրամի գործադիր տնօրենը նշեց` ցանկանում են, որ Արամ Խաչատրյանի կոնցերտները համալրեն երիտասարդ և շնորհալի կատարողների երկացանկն ու հարատև կյանք ունենան համաշխարհային երաժշտական ասպարեզում:
Նրա հավաստիացմամբ` միջազգային հարթակում կան երաժիշտներ, որոնց նվագացանկում մշտապես առկա են մեծն կոմպոզիտորի ստեղծագործությունները: Նրանցից են Արամ Խաչատրյանի անվան 8-րդ միջազգային մրցույթի Գրան պրիի մրցանակակիր ջութակահար Ֆյոդոր Ռուդինը, թավջութակահար Նարեկ Հախնազարյանը, որն իր համաշխարհային հաղթարշավը սկսել է հենց 2006 թվականին Խաչատրյանի մրցույթի հաղթանակից և այլք:
«Ուրախալի է, որ Ֆյոդոր Ռուդինն այժմ հանրահռչակված նվագախմբերից մեկի` Վիեննայի ֆիլհարմոնիկի կոնցերտմայստերն է: Դա մեծ հաջողություն է նրա համար: Խաչատրյանի մրցույթի բոլոր դափնեկիրները հետագայում մասնակցում են այլ միջազգային մրցույթների, մրցանակների արժանանում, բարձունքներ գրավում: Դա ևս ապացուցում է, որ Խաչատրյանի մրցույթի ժյուրին ճիշտ որոշումներ է կայացնում»,-շեշտեց Տեր-Հովակիմյանը:
Մրցույթի ժյուրիի նախագահն այս տարի դաշնակահար, դիրիժոր Վահագն Պապյանն է։ Նա ելույթներ է ունենում աշխարհի լավագույն համերգասրահներում լավագույն նվագախմբերի հետ: Ժյուրիում ընդգրկված են բարձրակարգ երաժիշտներ Ռուսաստանից, Իսրայելից, Չինաստանից, Բելառուսից, Շվեդիայից:
«Մրցույթի անցկացման ձևաչափը երբեք չի փոխվում: Այն կմեկնարկի Արամ Խաչատրյանի ծննդյան օրը` հունիսի 6-ին, Արամ Խաչատրյան համերգասրահում: Բացմանը Հայաստանի պետական սիմֆոնիկ նվագախմբի հետ (գեղարվեստական ղեկավար և գլխավոր դիրիժոր Սերգեյ Սմբատյան) հանդես կգա միջազգային ճանաչում ունեցող դաշնակահար, որի անունը ես դեռ չեմ ասի: Թող անակնկալ լինի: Բացման համերգին ելույթ է ունենալու նաև Խաչատրյանի դաշնամուրային տրիոն, որը կկատարի հատուկ մրցույթի համար Գեորգ Պելեսիցի կողմից գրված ստեղծագործություն` Դաշնամուրային տրիոյի և սիմֆոնիկ նվագախմբի համար:
Ինչպես նախորդ, այնպես էլ այս տարի, մրցույթը կանցկացվի երեք փուլով: Հունիսի 7-8-9-10-ին Երևանի Չայկովսկու անվան միջնակարգ երաժշտական մասնագիտական դպրոցի Տատյանա Հայրապետյանի անվան դահլիճում կանցկացվեն առաջին և երկրորդ փուլերը, իսկ երրորդ փուլը տեղի կունենա հունիսի 12-ին և 13-ին Արամ Խաչատրյան համերգասրահում մրցույթի պաշտոնական նվագախումբ Հայաստանի պետական սիմֆոնիկ նվագախմբի նվագակցությամբ: Հունիսի 14-ին կիմանանք հաղթողների անունները»,-ասաց նա:
Մրցույթի 2-րդ և 3-րդ փուլերում դաշնակահարների պարտադիր կատարման ծրագրում ընդգրկված են Արամ Խաչատրյանի ստեղծագործությունները։
Մրցույթի առաջին մրցանակակիրը կստանա դրամական պարգև՝ 15000 ԱՄՆ դոլարին համարժեք դրամ, 2-րդ տեղը զբաղեցրած երաժիշտը կարժանանա 10000 ԱՄՆ դոլարին համարժեք դրամ մրցանակի, իսկ երրորդ մրցանակակիրը՝ 5000 ԱՄՆ դոլարին համարժեք դրամ պարգևավճարի։ Կշնորհվեն նաև մի շարք հատուկ մրցանակներ:
Աննա Տեր-Հովակիմյանն անդրադարձավ հայ երաժիշտների մասնակցությանն ու շեշտեց, որ ունենք դաշնամուրային բարձր կատարողական դպրոց, և ինքը համոզված է, որ հայ երիտասարդները պատվով կներկայացնեն մեր երկիրը մրցույթում:
Յուրաքանչյուր տարի հունիսի 6-14-ը Երևանում անցկացվող Խաչատրյանի անվան միջազգային մրցույթն առաջին անգամ մեկնարկել է 2003 թվականին՝ մեծ կոմպոզիտորի 100-ամյակին նվիրված տոնակատարությունների շրջանակում: Խաչատրյանական մրցույթը 2013-ին ընդգրկվել է Միջազգային երաժշտական մրցույթների համաշխարհային ֆեդերացիայի կազմում՝ դրա գոյության ամբողջ ընթացքում հանդիսանալով այդ պատվին արժանացած միակ հայկական մրցույթը:
Մրցույթն ուղղված է «դաշնամուր», «ջութակ», «թավջութակ», «դիրիժորություն», «վոկալ» մասնագիտություններով շնորհալի երիտասարդ երաժիշտների բացահայտմանը: