BBC News-ի հաղորդմամբ, համաձայն Oxfam բարեգործական կազմակերպության կողմից անցկացված հետազոտության՝ աշխարհի բնակչության 1%-ը կազմող մեծահարուստ մարդկանց մասնաբաժինը համաշխարհային հարստության մեջ շուտով կգերազանցի բնակչության մնացած մասին պատկանող ողջ հարստության ընդհանուր մակարդակը՝ 2016 թ. անցնելով համաշխարհային հարստության 50% սահմանը:
Աշխարհի հարստությունը պատկանում է նրա բնակչության ընդամենը 1%-ին
ՍՏԵՓԱՆԱԿԵՐՏ, 19 ՀՈՒՆՎԱՐԻ, ԱՐՑԱԽՊՐԵՍ։Ինչպես հաղորդում է կազմակերպությունը, նրանց հարստության մակարդակի տեսակարար կշիռը 2009թ. 44%-ից աճել է մինչև 48% անցյալ տարվա համար: Oxfam-ը զգուշացնում է, որ «սոցիալական անհավասարության բումը» խոչընդոտ է հանդիսանում համաշխարհային աղքատության դեմ պայքարի շարունակման համար:
«Գլոբալ անհավասարության մակարդակը պարզապես ցնցող է, և չնայած այդ հարցը հանդիսանում է համաշխարհային օրակարգի առաջնահերթ խնդիրներից մեկը, հարուստների և աշխարհի մնացած բնակչության միջև սոցիալական ճեղքվածքն արագորեն ընդլայնվում է», նշվում է Դավոսի Համաշխարհային տնտեսական ֆորումի նախօրեին Oxfam International կազմակերպության գործադիր տնօրեն Վինի Բայանիմայի հայտարարության մեջ: Հոկտեմբերին համաշխարհային բանկային ոլորտի հսկաներից մեկի՝ Credit Suisse-ի հաշվետվության մեջ նույնպես նշվել է, որ բնակչության 1%-ը կազմող ամենահարուստ մարդկանց է պատկանում աշխարհի հարստության գրեթե կեսը: