Կոմիտասի ծննդյան 150-ամյակի առթիվ՝ Արցախի պետական երգչախումբը հանդես է եկել կոմիտասյան երգերով
Արցախի պետական երգչախումբն իր իսկ նախաձեռնությամբ այսօր Շուշիի Կանաչ Ժամ եկեղեցում (Սուրբ Հովհաննես Մկրտիչ) և կերպարվեստի թանգարանում հանդես է եկել կոմիտասյան երգերով՝ նվիրված հայ երգահան, երգիչ, երաժշտագետ, վարդապետ և ուսուցիչ, բանահավաք, խմբավար, հայկական ազգային կոմպոզիտորական դպրոցի հիմնադիր Կոմիտասի (Սողոմոն Գևորգի Սողոմոնյան) ծննդյան 150-ամյակին:
Կոմիտասի ծննդյան 150-ամյակի առթիվ՝ Արցախի պետական երգչախումբը հանդես է եկել կոմիտասյան երգերով
ՍՏԵՓԱՆԱԿԵՐՏ, 26 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Արցախի պետական երգչախմբի գեղարվեստական ղեկավար Նինա Գրիգորյանն ասել է, որ արդեն 30 տարի է, ինչ իրենք երգում են Կոմիտասի ստեղծագործությունները:
Խոսելով Կոմիտաս վարդապետի մասին՝ Ն. Գրիգորյանը նշել է. «Հենց Կոմիտասի շնորհիվ է, որ հայ ժողովուրդը պահպանել և հնագույն ժամանակներից բերել մեզ է հասցրել իր երգերը: Շատ կարևոր է, որ երաժշտության միջոցով է ավելի շատ պահպանվել մեր մշակույթը: Կոմիտասի գիտական և ստեղծագործական գործունեությունը նոր էջ է բացել հայ երաժշտական մշակույթի պատմության մեջ: Անգնահատելի է Կոմիտասի ավանդը հայկական երաժշտության զարգացման գործում: Մենք պարտավոր ենք մշտապես հիշել ու մեծարել Կոմիտասին՝ պահպանելով հայի ինքնությունն ու ինքնագիտակցությունը»:
Արցախի պետական երգչախմբի անդամ Արմինե Թովմասյանի խոսքով՝ Կոմիտասն իր համար համամարդկային արժեք է:
«Մենք ոչ միայն ԱՀ-ում, ՀՀ-ում, այլև արտերկրում ենք ներկայացնում Կոմիտասի ստեղծագործությունները: Երգչախմբի անդամներս՝ տարիներ շարունակ Վարդապետի երգերով ենք սնվել, դաստիարակվել ու կրթվել: Այսօր էլ շարունակում ենք ոգևորվել ու պարծենալ հայզգի մեծն Կոմիտասով»,-մասնավորապես ավելացրել է Ա. Թովմասյանը:
Շուշիի կերպարվեստի թանգարանում Նինա Գրիգորյանը՝ Կոմիտասի ծննդյան 150-ամյակի առթիվ երգչախմբի անդամներին է հանձնել պատվոգրեր:
Տեղեկացնենք նաև, որ սեպտեմբերի 28-ին՝ Ստեփանակերտի վերանվանման 96-րդ տարեդարձի կապակցությամբ մայրաքաղաքի պատկերասրահում համերգային ծրագրով հանգես է գալու Արցախի պետական երգչախումբը: