Նավթի համաշխարհային գների կտրուկ էժանացումից հետո Ադրբեջանի նավթարդյունաբերության ոլորտում եւ պետական հատվածում զանգվածային կրճատումները շարունակվում են:
Ադրբեջանում աշխատողների զանգվածային կրճատումները շարունակվում են
ՍՏԵՓԱՆԱԿԵՐՏ, 4 ՄԱՐՏԻ, ԱՐՑԱԽՊՐԵՍ։ «Ազադլըգ» թերթի փոխանցմամբ՝ «Բաքվի մետրոպոլիտեն», «Ազերէներժի» պետական ընկերություններից հետո աշխատակիցների զանգվածային կրճատումներ է սկսել իրականացնել նաեւ «Ազերքյորփու» պետական կամրջաշինական ընկերությունը:
Նշվում է, որ ընկերությունն արդեն կրճատել է հարյուրավոր իր աշխատակիցների: Պարզվել է, որ դադարեցվել են նաեւ բոլոր նախագծերը: Թերթին հասած տեղեկություններով` ֆինանսական դժվար կացության մեջ են հայտնվել Ադրբեջանի իշխող ընտանիքին մոտ շինարարական ընկերությունները եւս:
Այդ ընկերությունները եւս դադարեցրել են ընթացիկ եւ նոր բոլոր նախագծերը: Ենթադրվում է, որ մոտ օրերին նրանք ես զանգավածային կրճատումներ կսկսեն:
Ադրբեջանական ԶԼՄ-ներն ավելի վաղ հայտնել էին, որ նավթի գների հետ կապված ճգնաժամով պայմանավորված` Ադրբեջանի ձեռնարկություններում աշխատակիցների զանգվածային կրճատումներ են իրականացրել ինչպես արտասահմանյան նավթային գլխավոր օպերատոր բրիտանական «Բրիթիշ Փեթրոլիում» ընկերությունը, այնպես էլ Ադրբեջանի պետական նավթային ընկերությունը (SOCAR):
Որոշ փորձագետների կարծիքով, եթե նավթի հետ կապված ճգնաժամային վիճակն աշխարհում շարունակվի, Ադրբեջանում գործազուրկների մեծ բանակ կառաջանա:
Ադրբեջանի արտահանման 95 տոկոսը կազմում են գազը, նավթն ու նավթամթերթքները, իսկ երկրի պետբյուջեն 87 տոկոսով ձեւավորվում է էներգակիրների արտահանումից ստացվող եկամուտների հաշվին:
Ադրբեջանի 1915 թվականի պետբյուջեում նավթի գինը մեկ բարելի համար նախատեսված է 90 դոլար: Ներկայում այն արդեն պետբյուջեում նախատեսվածից մոտ 40 դոլարով ցածր է: