Սիրիայի հայաշատ Քեսաբի վրա հարձակումից հետո բռնությամբ Թուրքիայի Վաքըֆ գյուղ տեղափոխված հայերը մայիսի 15-ին Բեյրութ կտեղափոխվեն:
Քեսաբից գերեվարված հայերը Թուրքիայի Վաքըֆից կտեղափոխվեն Բեյրութ
Սիրիայի հայաշատ Քեսաբի վրա հարձակումից հետո բռնությամբ Թուրքիայի Վաքըֆ գյուղ տեղափոխված հայերը մայիսի 15-ին Բեյրութ կտեղափոխվեն:
Այս մասին «Արցախպրես»-ին տեղեկացրեց ՀՀ սփյուռքի նախարար Հրանուշ Հակոբյանը: «Մենք աշխատում էինք այս ուղղությամբ Կարմիր Խաչի միջազգային կոմիտեի, Լիբանանի և Սիրիայի մեր հայակական կազմակերպությունների հետ:
Բանն այն է, որ 22 հոգուն ավելացան ևս 5-ը, նրանք ցանկություն են հայտնել վերամիավորվել իրենց ընտանքիներին հետ, ընտանիքները Հայաստանում չեն, այդ պատճառով նրան պետք է հասնեն կամ Բեյրութ կամ Լաթաքիա: Մեր տեղեկություններով` քանի որ նրանք փասաթղթեր չունին, այս օրերին փաստաթղթավորվել են, որ կարողանան տեղաշարժվել, վաղը` մայիսի 15-ին, նրանք պետք է անցնեն Բեյրութ»,-ասաց նախարարը:
Նախարարությունն ավելի վաղ դիմել էր Կարմիր խաչի միջազգային կոմիտեի հայաստանյան պատվիրակությանը, նրան հանձնել այն բոլոր քեսաբահայերի ցուցակը, ովքեր գտնվում են Թուրքիայում, և խնդրել օգնել, որպեսզի քեսաբահայերը միավորվեն իրենց ընտանիքների հետ:
Թուրք-սիրիական սահմանի մերձակայքում և Լաթաքիայի հյուսիսում գտնվող Քեսաբ գյուղաքաղաքի վրա հարձակումը սկսվել է մարտի 21-ին Թուրքիայի սահմանի մի քանի կետերից: Տեղեկություններ են հաղորդվել, որ հարձակումն իրականացրել են «Ջաբհա ան Նուսրա» և «Ջեյշ ալ Իսլամ» խմբավորումները: Գյուղաքաղաքից բնակիչների մեծ մասը տեղափոխվել է առավել ապահով վայրեր, իսկ որոշ ընտանիքներ, այդ թվում` մեծահասակներ, մնացել են իրենց տներում, հետո գերի վերցվել զինյալների կողմից: Նրանց մեծամասնությանը տարել են Թուրքիայի
Վաքըֆ հայաբնակ գյուղ: Հայերի մեծամասնությունը ապաստան է գտել Լաթաքիայի Սուրբ Աստվածածին եկեղեցու տարածքի մոտ գտնվող ազգային կառույցներում: Տեղի հայկական շտապօգնության մարմինը Սիրիայի Կարմիր մահիկի կազմակերպության հետ անհրաժեշտ պարագաներով և սնունդով ապահովել է բնակիչներին:
Տարբեր համահայկական կառույցներ իրականացնում են դրամահավաք կարիքավոր քեսաբահայերին օգնելու համար, աշխարհասփյուռ հայ քաղաքական ու հասարակական կառույցներն էլ փորձում են հարցը բարձրացնել քաղաքական ու դիվանագիտական շրջանակներում`պահանջելով Թուրքիային ստիպել դադարեցնել օգնությունը ծայրահեղական զինյալ ուժերին և ապահովել խաղաղ բնակչության վերադարձն իրենց բնակավայր: