Օրեր անց ամբողջ աշխարհի շախմատասերների և հին խաղի գիտակների ուշադրության կենտրոնում կհայտնվի Հայաստանի գողտրիկ վայրերից մեկը` Ծաղկաձորը, որն այս տարի հյուրընկալելու է շախմատի աշխարհի թիմային առաջնությունը:
Ֆավորիտները Ռուսաստանի Դաշնությունը, Հայաստանը, Ուկրաինան և Չինաստանն են
ՍՏԵՓԱՆԱԿԵՐՏ, 15 ԱՊՐԻԼԻ, ԱՐՑԱԽՊՐԵՍ։ 10 թիմերի շարքում` Հայաստանի հավաքականի հիմնական մրցակիցներից մեկը կլինի Ռուսաստանի հավաքականը, ով այս առաջնությանը ներկայացել է առանց հիմնական առաջատարներից մեկի` Վլադիմիր Կրամնիկի:
Առաջնության մեկնարկից մի քանի օր առաջ «Արմենպրես»-ի թղթակիցը զրուցեց Ռուսաստանի հավաքականի ներկայացուցիչ, ռուսական շախմատի երիտասարդ սերնդի ամենահեռանկարային շախմատիստներից մեկի` Սերգեյ Կարյակինի հետ:
-Պարոն Կարյակին, ի՞նչ սպասելիքներ ունեք շախմատի աշխարհի թիմային առաջնությունից, որն այս տարի կկայանա Հայաստանում:
-Մենք շախմատի աշխարհի թիմային առաջնության գործող չեմպիոններն ենք, և հրաշալի կլիներ, եթե կարողանայինք պահպանել այդ տիտղոսը: Սակայն ակնհայտ է, որ մեծ մրցակցություն է լինելու: Իմ կարծիքով, շատ սուր և ուժեղ մրցակցություն է գնալու մրցանակային տեղերի համար պայքարում:
-Ովքե՞ր են, ըստ Ձեզ, այս առաջնության ֆավորիտները:
-Ավանդաբար այս տեսակի մրցաշարերում ֆավորիտները Ռուսաստանի Դաշնությունը, Հայաստանը, Ուկրաինան և Չինաստանն են լինում: Հաշվի առնելով ԱՄՆ հավաքականի թուլացածությունը՝ նրանց ֆավորիտ չես համարի: Սակայն առանձին վերցրած նրանք նույնպես ուժեղ են:
-Ինչպիսի՞ հնարավորություններ ունի Ռուսաստանի հավաքականն այն դեպքում, երբ այս անգամ թիմի կազմում չկա Կրամնիկը:
-Առանց Կրամնիկի խաղալը, բնականաբար, դժվար է, ամեն դեպքում մեր հավաքականը բավականին ուժեղ է: Թիմային ոգին ուժեղ է, և մենք մեր ամբողջ ուժերը ներդնելու ենք արդյունքի հասնելու համար:
-Արդյոք մինչ այս եղե՞լ եք Հայաստանում, և ի՞նչ գիտեք մեր երկրի մասին:
-Հայաստանում եղել եմ երկու անգամ: Մեկ անգամ 2007 թվականին, երբ Լևոն Արոնյանի հետ ընդհանուր հավաքի էինք հավակնորդների մրցաշարից առաջ, որն, ի դեպ, հենց Ծաղկաձորում էր, իսկ երկրորդ անգամ՝ ՖԻԴԵ-ի Գրան-Պրիի ժամանակ Ջերմուկում 2009 թվականին: Երկու անգամն էլ ինձ ամեն ինչ դուր եկավ, հույս ունեմ այս անգամ ևս հայերին բնորոշ հյուրընկալությունը բարձր մակարդակ կունենա:
