Այսօր՝ հոկտեմբերի 11-ին, Ստեփանակերտի քաղաքային հուշահամալիրի Զինվորական պանթեոնում տեղի է ունեցել անվանի երաժիշտ, ջութակահար, ԼՂՀ մշակույթի վաստակավոր գործիչ Բորիս Բաբայանի հիշատակը հավերժացնող հուշարձանի բացման արարողությունը:
Ստեփանակերտում կանգնեցվել է սիրված ջութակահար Բորիս Բաբայանի հուշարձանը
ՍՏԵՓԱՆԱԿԵՐՏ, 11 հոկտեմբեր, ԱՐՑԱԽՊՐԵՍ։«Արցախպրես»-ի թղթակցի հաղորդմամբ՝ ներկաները նախ հարգանքի տուրք են մատուցել ջութակահարի հիշատակին:
Բորիս Բաբայանի հուշարձանը կանգնեցնելու գաղափարը Արցախի Հանրապետության Ներքին գործերի նախարար Կարեն Սարգսյանինն է,ում աջակցությամբ Հայաստանի Հանրապետության վաստակավոր քանդակագործ Տիգրան Արզումանյանը հանձն է առել և կերտել ջութակահարի արձանը:
ԱՀ ԿԳՄՍ նախարարի տեղակալ Լեռնիկ Հովհաննիսյանի խոսքով՝ Բորիս Բաբայանի հետ շփվելու բազմաթիվ առիթներ է ունեցել:
«Շատ հաճախ պատերազմն ու մշակույթը համաձուլվում են,որի մասին փաստում է համաշխարհային պատմության փորձը: Հայոց ազգային-ազատագրական շարժման բոլոր ժամանակներում հայ ֆիդայիները, ազատամարտիկները մարտի էին գնում երգ ու պարով: Հայրենական պատերազմում խորհրդային դիվիզիաները մարտի մեջ էին մտնում ջութակի երաժշտության ներքո: Բնական է,որ պատերազմն իր տեղն է գտնում արվեստում ու մշակույթում՝ այդ թվում երաժշտության մեջ: Բորիս Բաբայանը այն կոլորիտային գործիչներից էր, ով երաժշտության լեզվով անընդհատ խոսում էր մեր զոհված ազատամարտիկների հետ, ով կարողացավ ողջ մնացածներիս և մեր ազատամարտիկների երաժշտական ներդաշնակ կապը ստեղծել: Նա այստեղ նաև իր երաժշտությամբ է ներկա: Կարծում եմ,որ նրա այդ երաժշտությունն անմահություն է բերելու մեր բոլոր ազատամարտիկներին երկնային կյանքում»,-ասել է Լ.Հովհաննիսյանը:
Բորիս Բաբայանը 1957 թվականից մինչև 2020 թվականն աշխատում էր Կոմիտասի անվան երաժշտական դպրոցում՝ որպես ջութակի դասատու: Դպրոցի տնօրեն Զարինե Բաբայանի համոզմամբ՝ Արցախի մշակույթի զարգացման գործում Բորիս Բաբայանն անփոխարինելի էր:
«Նրա տաղանդին ծանոթ յուրաքանչյուր ոք քաջատեղյակ է,թե ինչպես էր նրա ջութակի մեղեդին ալիքվում օդում, խոսում յուրաքանչյուր մարդու սրտի ու մտքի հետ,շարժում հույզերը:
Ցավոք նրա ջութակը լռեց ընդմիշտ:
Մենք պարտավոր ենք մեր սերունդներին փոխանցել նրա երաժշտությունը»,-հավելել է Զ.Բաբայանը:
Հուշարձանի բացման պատիվը տրվեց Կարեն Սարգսյանին և Բորիս Բաբայանի թոռանը՝ Արսեն Բաբայանին:
«Հպարտ եմ, որ իմ ընտանիքում, ինձ բախտ է վիճակվել ստանալ նաև Բորիս պապիս դաստիարակությունը:
Նա մեր քաղաքի խորհրդանիշներից էր, իսկ այսուհետ հավերժ ներկա կլինի սիրելի վայրում՝ Հուշահամալիրում, մեր հերոս եղբայրների կողքին՝ իր հավատարիմ ջութակով»,-մեզ հետ զրույցում նշել է երջանկահիշատակ ջութակահարի թոռը, իր ընտանիքի անունից երախտագիտություն հայտնելով Կարեն Սարգսյանին:
Ջութակահարուհի Ալինա Ապրեսյանը միջոցառմանը նվագել է Կոմիտասի ստեղծագործություններից:
Միջոցառմանը ներկա էին ԱՀ նախագահի աշխատակազմի ղեկավար Կարեն Շահրամանյանը, Ստեփանակերտի քաղաքապետ Դավիթ Սարգսյանը, պաշտոնատար այլ անձինք, Բորիս Բաբայանի հարազատները, ընկերներն ու ստեփանակերտցիներ:
