Արգենտինայի հայ համայնքը հոկտեմբերի 7-ին երթով շարժվել է դեպի Ադրբեջանի դեսպանատուն՝ դատապարտելու Լեռնային Ղարաբաղի հայ բնակչության դեմ ցեղասպանությունը:
Սա ցեղասպանություն է. Արգենտինայի հայ համայնքը Ադրբեջանի դեսպանության դիմաց ակցիայով դատապարտել է Արվախում էթնիկ զտումները
ՍՏԵՓԱՆԱԿԵՐՏ, 9 հոկտեմբերի, ԱՐՑԱԽՊՐԵՍ-ԱՐՄԵՆՊՐԵՍ։ Երթն ադրբեջանական վարչակարգի դիվանագիտական ներկայացուցչություն է շարժվել «Ադրբեջանի էթնիկ զտումների պատճառով տեղահանված 120.000 հայեր» գրությամբ պաստառի ներքո:
Երթի մասնակիցները բարձրացրել են «Ադրբեջան` պետական մարդասպան», «Ցեղասպանությունը ժխտվել է, ցեղասպանությունը կրկնվում է» և այլ գրություններով պաստառներ:
Արգենտինայի և Չիլիի Հայ Առաքելական եկեղեցու առաջնորդ վարդապետ Արեն Շահենյանի խոսքերից հետո Արգենտինայի Հանրապետության հայկական հաստատությունների (IARA) նախագահ Ալեխանդրո Կալփաքյանն ընթերցել է հայ համայնքի ելույթը՝ դատապարտելով Ադրբեջանի կողմից ԼՂ հայ խաղաղ բնակչության էթնիկ զտումները:
«Մեր հայրենակիցներն ապրել և ապրում են իրենց կյանքի ամենավատ օրերը Սումգայիթի, Բաքվի և Կիրովաբադի ջարդերից հետո: Ադրբեջանը չհարգեց 2020 թվականի նոյեմբերի 9-ին ստորագրված պայմանագիրը և 2022 թվականի դեկտեմբերի 12-ին արգելափակվեց Լաչինի միջանցքը՝ միակ ճանապարհը, որը կապում է Հայաստանը Լեռնային Ղարաբաղին: Ադրբեջանի նախագահ Ալիևի ռեժիմը չի հարգել նաև ՄԱԿ-ի Արդարադատության միջազգային դատարանի 2023 թվականի փետրվարի 22-ի որոշումը՝ Լաչինի միջանցքով տեղաշարժն ապահովելու վերաբերյալ»,-ասել է նա:
DSC_0087.jpg (4.83 MB)
Կալփաքյանը հիշեցրել է արգենտինացի փորձագետ Լուիս Մորենո Օկամպոյի խոսքերը, որ Ադրբեջանը ԼՂ բնակչության նկատմամբ ցեղասպանություն է իրականացնում: Սեպտեմբերի 19-ից Ադրբեջանն արագացրել է բնաջնջման գործընթացի իրականացումը: Նա շեշտել է՝ Ադրբեջանի կողմից շարունակվող էթնիկ զտումների քաղաքականության հետևանքով հայերը բռնի տեղահանվել են Լեռնային Ղարաբաղից՝ գիտակցելով, որ անհնար է անվտանգ ապրել ադրբեջանական տիրապետության տակ։ Ակնհայտ է, որ Ադրբեջանը չի ցանկանում հարգել միջազգային նորմերը: Հայ համայնքը պահանջել է անհապաղ ազատ արձակել ապօրինաբար գերեվարված ԼՂ պաշտոնյաներին և մյուս բոլոր գերիներին:
«Մեր ներկայությունն այստեղ այսօր վառ օրինակ է, որ մենք շարունակելու ենք պայքարել Թուրքիայի կողմից հայ ժողովրդի դեմ ցեղասպանության, շարունակվող հալածանքների և բնաջնջման դեմ, որն այժմ իրականացնում է Ադրբեջանը»,-ասել է Կալփաքյանը:
