Ադրբեջանի ընդդիմությունը մայիսի 19-ի առավոտյան Բաքվի Ազադլըգ պողոտայի 16 հարկանի բնակելիներից մեկում ծագած հրդեհի, նաև բազմաթիվ զոհերի եւ վիրավորների թվի պատասխանատուն համարում է իշխանություններին:
Ադրբեջանի ընդդիմությունը Բաքվում հրդեհի համար մեղադրել է իշխանություններին
ՍՏԵՓԱՆԱԿԵՐՏ, 19 ՄԱՅԻՍԻ, ԱՐՑԱԽՊՐԵՍ։ «Արմենպրես»-ը վկայակոչելով ադրբեջանական faktxeber.com լրատվական կայքը` փոխանցում է, որ Ադրբեջանի ազգային ռազմավարական հետազոտությունների կենտրոնի ղեկավար Իսա Ղամբարը, ով ընդդիմադիր «Մուսավաթ» կուսակցության նախկին նախագահն է, facebook-ի իր էջում նշել է. «Դա Բաքվում իշխանության կոռուպցիան եւ ժողովրդի ողբերգությունն է»:
Բաքվում հրդեհին սոցիալական ցանցի միջոցով իր վերաբերկունքն է հայտնել նաեւ Ադրբեջանում ճանաչված փաստաբան Ասլան Իսմայիլովը: «Մինչեւ ժողովուրդը ոտքի չկանգնի իրեն կողոպտող, շահագրոծող եւ ստրկացրած իշխանությունների դեմ, նման աղետներն ու ողբերգությունները կշարունակեն տեղի ունենալ: Դրա միակ լուծումը ամեն ինչ վաճառող, մարդկությունից, բարոյականությունից եւ խղճից հեռու գտնվող իշխանությունից ազատվելն է», -ասել է նա: Բաքվում տեղի ունեցած հրդեհից զոհերի թիվը, ըստ ադրբեջանական ԶԼՄ-ների, արդեն հասել է 16-ի, իսկ վիրավորների թիվը` 54-ի: Առավոտյան ժամերին ծագած հրդեհը դեռեւս շարունակվում է:
Հրշեջներին չի հաջողվում մարել շենքի 8, 9 եւ 10-րդ հարկերում հրդեհը: Նշվում է, որ մահացածների մեջ կան նաեւ երեխաներ: Վիրավորները տեղափոխվել են Բաքվի տարբեր կլինիկաներ: Հրդեհը սկսվել է 16 հարկանի շենքի վերին հարկերում: Կրակն անմիջապես տարածվել է շենքով մեկ` այն դրսից ցածրորակ պլաստիկ նյութով պատված լինելու պատճառով: Միջադեպի վայրում աշխատում են 30-ից ավելի շտապօգնության բրիգադներ: Հրդեհի մարման եւ մարդկանց որոնողական-փրկարարական աշխատանքները շարունակվում են:
Ըստ ադրբեջանական ԶԼՄ-ների` Բաքվում պլաստիկ սալիկներով պատված նման 800 բնակելի շենքեր կան: Այդ շենքերի բնակիչները երկյուղելով, որ իրենք եւս կարող են նման աղետի ենթարկվել, սկսել են իրենց բնակարանների արտաքին պատերից պոկել պլաստիկ սալիկները:
