Անվանի դաշնակահար Տիգրան Համասյանն իր «Լոյս ի Լուսոյ» խորագրով համերգով հունիսի 17-ին ելույթ է ունեցել Թբիլիսիի Սուրբ Էջմիածին եկեղեցում:
Տիգրան Համասյանն աջակցում է Թբիլիսիի ջրհեղեղից տուժածներին
ՍՏԵՓԱՆԱԿԵՐՏ, ՀՈՒՆԻՍԻ 18, ԱՐՑԱԽՊՐԵՍ: Վիրահայոց թեմի փոխանցմամբ՝ 5-20-րդ դարերի հայկական հոգևոր երաժշտության նորովի մեկնաբանությանը մասնակցել է Երևանի պետական կամերային երգչախումբը՝ Հարություն Թոփիկյանի ղեկավարությամբ: Երաժիշտը համերգային շրջագայություն է իրականացնում աշխարհի տարբեր երկրների 100 եկեղեցիներում ու տաճարներում:
Թբիլիսիի Սուրբ Էջմիածին հինավուրց եկեղեցու համերգին մասնակցել են Վիրահայոց թեմի առաջնորդ գերաշնորհ տեր Վազգեն եպիսկոպոս Միրզախանյանը, Վրաստանում ՀՀ դեսպանության խորհրդական Կարեն Մելիքյանը, ՀՀ սփյուռքի նախարարության Մերձավոր Սփյուռքի հետ կապերի վարչության պետ Տարոն Շագոյանը, հոգևոր հայրեր Տեր Սամվել քահանա Թորոսյանը, տեր Մանուկ քահանա Զեյնալյանը և այլոք:
Ներկաները մեկ րոպե լռությամբ հարգել են Թբիլիսիում տեղի ունեցած ողբերգության զոհերի հիշատակը:
Բացելով համերգը՝ Վիրահայոց թեմի մշակույթի բաժնի տնօրեն Լևոն Չիդիլյանը և իրավական հարցերի բաժնի տնօրեն Միքայել Ավագյանը ներկայացրել են Տիգրան Համասյանի նախագիծը: Նրանց խոսքով՝ նախագծի նպատակն է, հնչեցնելով հայկական հոգևոր երգն ու երաժշտությունը հին եկեղեցիներում ու վանքերում, երախտագիտություն հայտնել շարականների ստեղծողներին և համայն աշխարհին ցույց տալ, որ հայ ժողովուրդը պահպանել ու նոր իմպրովիզացիոն մտածելակերպ ու շունչ է հաղորդել հայկական հոգևոր երգեցողությանը:
Երևանի պետական կամերային երգչախմբի հետ Տիգրան Համասյանի դաշնամուրային նվագակցությամբ համերգի երգացանկում ընդգրկված են Մեսրոպ Մաշտոցի, Գրիգոր Նարեկացու, Գրիգոր Պահլավունու, Ներսես Շնորհալու, Մխիթար Այրիվանեցու, Մակար Եկմալյանի ստեղծագործությունները:
Վիրահայոց թեմի առաջնորդ գերաշնորհ տեր Վազգեն եպիսկոպոս Միրզախանյանը համերգը նմանեցրել է Սուրբ նահատակներին ուղղված աղոթքի: Նա Տիգրան Համասյանին և Հարություն Թոփիկյանին է նվիրել Թենգիզ Միքոյանցի և Մերուժան Շահումյանի գեղանկարները:
Արձագանքելով այս օրերին Թբիլիսիում տեղի ունեցած ողբերգությանը, մշակույթի հայ գործիչները իրենց զորակցությունը արտահայտեցին վրաց ժողովրդին: Հունիսի 18-ին «Լոյս ի Լուսոյ»- խորագրով բարեգործական համերգով նրանք հանդես կգան Թբիլիսիի Վանո Սառաջիշվիլու անվան պետական կոնսերվատորիայի համերգային մեծ դահլիճում: Համերգից ստացված հասույթը կփոխանցվի ջրհեղեղից տուժածների օգնության հիմնադրամ:
