Գյուղատնտեսության ոլորտի ռիսկերի մեղմացման առաջնային խնդիրներից մեկը ոլորտում ապահովագրական ոլորտի ներդրումն է:
Հայաստանում անասնապահության ոլորտում փորձնական ապահովագրական համակարգ կներդրվի
Գյուղատնտեսության ոլորտի ռիսկերի մեղմացման առաջնային խնդիրներից մեկը ոլորտում ապահովագրական ոլորտի ներդրումն է:
ՀՀ կառավարության 2014-2017 թթ. ծրագրում ընդգրկված է նաև գյուղատնտեսության ոլորտում ապահովագրական համակարգի աստիճանական ներդրման հայեցակարգը, ինչի ուղղությամբ արդեն իսկ որոշակի աշխատանքներ տարվել են:
Ինչպես տեղեկացնում է «Արցախպրես»- ը, «Արմենպրես»-ի հետ զրույցում ՀՀ գյուղատնտեսության նախարարության ծրագրերի զարգացման վարչության պետ Հրաչյա Ծպնեցյանը նշեց, որ արդեն իսկ ուսումնասիրվել է միջազգային փորձը, թե որ երկրում ինչպես է իրականացվում գյուղատնտսության ոլորտի ապահովագրության ծրագիրը:
«Վերջերս նաև «Թայեքս» ծրագրի շրջանակում փորձագետ եկավ, հավաքվեցին նաև տարբեր շահագրգիռ կողմեր՝ մասնագետներ կենտրոնական բանկից, ագրարային համալսարանից, ապահովագրական ընկերություններից, ինչպես նաև մեր նախարարության աշխատակիցներ: Եղան քննարկումներ, թե Հայաստանում գյուղատնտեսական ոլորտում ապահովագրական համակարգի ներդրման ուղղությամբ ինչ մեխանիզմներ կարելի է կիրառել»,- ասաց Ծպնեցյանը՝ հավելելով,որ ուսումնասիրվել է Ֆրանսիայի, Իսպանիայի, Հունաստանի, ԱՄՆ-ի, Կանադայի, Ճապոնիայի փորձը:
Նա նշեց, որ հարցը քննարկվել է նաև ապահովագրական ընկերությունների միության նախագահի հետ: «Որոշակի աշխատանքներ են տարվել «Ինգո Արմենիա» ապահովագրական ընկերության հետ, նրանք այդ ուղղությամբ նախարարության հետ աշխատելու նախաձեռնություն են ցուցաբերել: Ստեղծվել է աշխատանքային խումբ, որում ներգրավված է նաև «Ինգո Արմենիա» ընկերության համապատասխան դեպարտամենտի ղեկավարը: Աշխատանքներ են տարվել նորմատիվային փաստաթղթերի, ելակետային տվյալների հավաքագրման ուղղությամբ»,- ասաց Ծպնեցյանը՝ ընդգծելով, որ Հայաստանում գյուղատնտեսությունը ռիսկային ոլորտ է, և դա այդքան արագ լինելու բան չէ:
ՀՀ գյուղատնտեսության նախարարության ծրագրերի զարգացման վարչության պետի խոսքով, հաշվարկներն արդեն կան, և ոլորտում ապահովագրական համակարգի ներդրումը մեծ ռեսուրսներ է պահանջում: Հաշվարկները ցույց են տալիս, որ ապահովագրական վճարները նույնպես շատ մեծ թիվ են կազմում, և գյուղացիների համար դժվար կլինի միայնակ կատարել այդ վճարները, ուստի այստեղ ևս ուսումնասիրվում է միջազգային փորձը՝ հասկանալու համար, թե պետությունն ինչ մեխանիզմներով կարող է մասնակցություն ունենալ այս հայեցակարգի կիրառմանը:
«Եթե աշխատում է այդ համակարգը, ապա այստեղ պետությունն էլ պետք է իր մասնակցությունն ունենա, օրինակ՝ այդ ապահովագրական վճարների մի մասի փոխհատուցման եղանակով: Ուղղակի այստեղ մեծ ռեսուրսներ են պահանջվում, և այդ համակարգի ներդրումը արագ լինել չի կարող»,- ասաց Ծպնեցյանը:
Նա նշեց, որ նախարարությունը որոշել է ապահովագրական համակարգը փորձնական ներդնել առավել քիչ ռիսկային՝ անասնապահության ոլորտում՝ հասկանալու համար, թե որքանով այն կարդարացնի իրեն, ինչից հետո արդեն աստիճանաբար համակարգը կներդրվի նաև մնացած ոլորտներում: «Անասնապահության ոլորտը համեմատաբար առավել քիչ ռիսկային է, և կարելի է փորձնական հենց այդ ոլորտից էլ սկսել, սակայն, ասեմ, որ այստեղ էլ կարող են բարդություններ լինել»,- նշեց Ծպնեցյանը՝ ընդգծելով, որ չի կարող հստակ ասել, թե երբ կսկսվի փորձնական ծրագիր իրականացումը, սակայն առաջիկայում արդեն այդ ուղղությամբ քայլեր կարվեն:
Գյուղատնտեսության ոլորտն այնքան էլ գրավիչ չէ ապահովագրական ընկերությունների համար: Ապահովագրական ընկերությունները հիմնականում չեն ձգտում այս ոլորտ մտնել, որովհետև այն ռիսկային է և մեծ ջանքեր է պահանջում: Ծպնեցյանը նշեց, որ գյուղատնտեսության նախարարությունը նաև ոլորտում ռիսկերի նվազեցման ռազմավարություն է մշակել, որի շրջանակում իրականացվող աշխատանքները կնպաստեն, որպեսզի ոլորտի ռիսկերը նվազեն, ինչն էլ իր հերթին կարող է հանգեցնել նրան, որ ապահովագրական ընկերությունները սկսեն հետաքրքվել գյուղատնտեսության ոլորտով:
