Դեռևս հայտնի չէ՝ ժյուրին, թե հանդիսատեսն է ընտրելու «Մանկական Եվրատեսիլ-2014» երգի մրցույթի Հայաստանի մասնակցին:
«Մանկական Եվրատեսիլ-2014»-ի մրցույթին մասնակցության համար հայտերը պետք է ներկայացնել մինչև օգոստոսի 15-ը
Դեռևս հայտնի չէ՝ ժյուրին, թե հանդիսատեսն է ընտրելու «Մանկական Եվրատեսիլ-2014» երգի մրցույթի Հայաստանի մասնակցին: Ինչպես հաղորդում է «Արցախպրես»-ը, Panorama.am-ի հետ զրույցում Եվրատեսիլում հայաստանյան պատվիրակության ղեկավար Գոհար Գասպարյանն ասաց, որ չեն որոշել, թե ինչ կերպ կլինի ընտրությունը, բայց վստահ է, որ կհաղթի լավագույն երգը:
Հիշեցնենք, որ «Մանկական Եվրատեսիլ- 2014» երգի միջազգային մրցույթին Հայաստանից մասնակցել ցանկացողները իրենց հայտերը պետք է ներկայացնեին հունիսի 1-ից մինչև օգոստոսի 15-ը:
«Գիտենք, կան կոնկրետ մարդիկ, ովքեր ներկայացնելու են հայտեր, բայց դեռևս ստեղծագործելու ընթացքում են, թղթերն են պատրաստում, որ հայտեր ներկայացնեն»,- ասաց Գ. Գասպարյանը:
Եվս մեկ անգամ հիշեցնենք մասնակցության կանոնները.
• Մրցույթին կարող են մասնակցել նոյեմբերի 15-ի դրությամբ 10 տարեկանը լրացած մինչեւ 15 տարեկան այն պատանիները, ովքեր Հայաստանի քաղաքացիներ են կամ ապրել են Հայաստանում առնվազն 2.5 տարի:
• Մրցույթին մասնակցող երգը պետք է լինի 2:45-03:00 րոպե տևողությամբ:
• Երգը պետք է լինի հայերեն, թույլատրելի է նաեւ օտար լեզվի օգտագործումը` երգի խոսքերի 25%-ի չափով:
• Ներկայացվող երգը պետք է լինի նոր եւ հրապարակված չլինի նախքան 2014 թ-ի մայիսի 1-ը:
• Երգի ստեղծման մեջ ակտիվ մասնակցություն պետք է ունենան 10-15 տարեկան երեխաներ, եւ եթե անգամ նրանք հիմնական կատարողներ չեն, պետք է մասնակցեն երգի կատարմանը` որպես բեք-վոկալիստներ, պարողներ կամ երաժիշտներ: 2008 թ-ից սկսած` կանոնները պաշտոնապես թույլ են տալիս մեծահասակներին մրցույթի համար երգեր պատրաստելու գործընթացում օգնել երեխաներին` միայն այն պայմանով, որ այդ երգերի բոլոր իրավունքները պատկանեն միայն երեխաներին:
• Բեմում գտնվող մասնակիցների թիվը չպետք է գերազանցի 6-ը:
• Ձայնագրված բեք-վոկալները «Մանկական եվրատեսիլ- 2014»-ին թույլատրելի են:
• Չի թույլատրվում կրկին մասնակցել մրցույթին (բացառությամբ պարողների և բեք-վոկալիստների):
«Մանկական Եվրատեսիլ- 2014» երգի միջազգային հեղինակավոր մրցույթն այս տարի կանցկացվի նոյեմբերի 15-ին Մալթայում: