Ադրբեջանի ազգային արժույթի` մանաթի դեվալվացիայից հետո արժութային ճգնաժամը երկրում շարունակվում է:
Բաքվի բնակիչները երկար հերթեր են գոյացրել ԱՄՆ դոլար գնելու համար
ՍՏԵՓԱՆԱԿԵՐՏ, դեկտեմբերի 28, ԱՐՑԱԽՊՐԵՍ-ԱՐՄԵՆՊՐԵՍ: Ադրբեջանական Haqqin.az-ի տեղեկացմամբ, տարադրամի փոխանակման կետերի մեծ մասում հրաժարվում են հաճախորդներին ամերիկյան դոլար վաճառել, ինչն իսկական իրարանցում է առաջացրել երկրում:
Մայրաքաղաք Բաքվում «Ազատություն» ռադիոկայանի ադրբեջանական ծառայության աշխատակցին հաջողվել է գտնել տարադրամի փոխանակման այն փոքրաթիվ կետերից մեկը, որտեղ դեռ վաճառվում է ԱՄՆ դոլար: Լրագրողը լուսանկար է արել, որտեղ երևում է, թե ինչ մեծ հերթ է գոյացել այն մարդկանցից, ովքեր ցանկանում են ձեռք բերել ԱՄՆ դոլար:
Ադրբեջանի կենտրոնական բանկը հայտարարել է դեկտեմբերի 21-ից ազգային արժույթի՝ մանաթի լողացող փոխարժեքի անցնելու մասին: Կենտրոնական բանկը նման որոշումը պայմանավորել է արտաքին առևտրաշրջանառության մեջ դրական սալդոյի, ինչպես նաև այլ աղբյուրներից փոխարժեքային փոխանցումների կտրուկ նվազեցմամբ: ԿԲ հայտարարության մեջ նշվում է, որ արտաքին բացասական ազդակներով, այդ թվում և նավթի գնի անկումով, պայմանավորված՝ անհրաժեշտություն է առաջացել մանաթի փոխարժեքը հարմարեցնել նավթի նոր գներին: «Հաշվի առնելով տնտեսական արտաքին ցնցումների երկարաժամկետ բնույթը և ձգտելով պահպանել երկրի արժութային պաշարներն ու ազգային տնտեսության միջազգային մրցունակությունը՝ դեկտեմբերի 21-ից անցում է կատարվում ազգային արժույթ մանաթի լողացող փոխարժեքի»,- հայտնել է Կենտրոնական բանկը:
Ադրբեջանական մանաթի դեվալվացիայի հետևանքով երկրում սկսել են թանկանալ սպառողական ապրանքները, մասնավորապես հացը, մսամթերքը, դեղորայքը և այլն:
