Այսօր Գյումրիում Ավետիսյանների ընտանիքի դաժանաբար սպանված անդամների համար քաղաքային գերեզմանատանը տեղի կունենա հոգեհանգստյան կարգ, որից հետո ժամերգություն և մոմավառություն` քաղաքի Յոթ վերք եկեղեցում:
Գյումրիում այսօր կոգեկոչեն Ավետիսյանների հիշատակը
ՍՏԵՓԱՆԱԿԵՐՏ, հունվարի 12, ԱՐՑԱԽՊՐԵՍ: Այս մասին Tert.am-ին հայտնեց գյումրեցի ակտիվիստ Կարեն Պետրոսյանը՝ տեղեկացնելով. «Հոգևոր բնույթի բաներ են արվելու»,-տեղեկացրեց գյումրեցի ակտիվիստը:
Հիշեցնենք, որ 2015 թվականին հունվարի 12-ին հետամանորյա Հայաստանը, ուղղակի ցնցվեց տեղեկատվությունից, որ Գյումրիում Ավետիսյանների 7 հոգանոց ընտանիքը սպանվել է: Գյումրեցի ընտանիքի սահմռկեցուցիչ սպանությունը ոչ միայն ցնցեց հայ հասարակությանը, այլև բողոքի զանգածային ակցիաների ալիք բարձրացրեց Երևանում և Գյումրում:
Ավետիսյանների ընտանիքի սպանությանն ու դրան հաջորդած վերջին իրադարձություններին անդրադարձավ նաև համաշխարհային, մամուլը.Washington Post, Associated Press, ABC News, EurasiaNet.org, The New York Times, The Huffington Post, The Washington Post, Newsday, Times Union պարբերականները, Sky News, Aljazeera, BBC, CBS News, Reuters , Euronews , The Guardian, France 24, The Observer կայքերը:
Գյումրիի «Ասպարեզ» ակումբի ղեկավար, Գյումրիի ավագանու անդամ Լևոն Բարսեղյանը, ամփոփելով անցած մեկ տարվա հիմնական տրամադրությունները` հետևյալ արձանագրումներն արեց.« Առաջինը, կարծում եմ` իշխանությունը չկարողացավ մեկ տարվա ընթացքում ցույց տալ, որ ինքը ՀՀ քաղաքացիների շահերի պաշտպանն է, իսկ դրանից բխեց երկրորդը, որ քաղաքացիները սկսեցին մտածել ինքնուրույն իրենց գլխի ճարը տեսնելու մասին, քան իշխանություններին ապավինելու»:
Ըստ Լևոն Բարսեղյանի` այս հանցագործության բացահայտման և իրավական գործընթացների հետ կապված գյումրեցիների և հայ հասարակության պահանջները հիմա էլ կան, ուղղակի դրանք այդքան սուր և էմոցիոնալ չեն արտահայտվում, որքան հանցագործության առաջին օրերին:
«Որովհետև շատերը հասկացան, որ իշխանությունը ելավ իրենց դեմ` ցուցարարների նկատմամբ գործ հարուցելով ու մոտ 30 հոգու ներգրավելով որպես կասկածյալ: Եվ՛ ռուսներին վախեցրին, և՛ մարդկանց պատանդի նման պահեցին, մինչդեռ ոմանք պատրաստվում էին մեկնել արտագնա աշխատանքի»,-նկատեց Գյումրու ավագանու անդամը:
Ինչ վերաբերում է կոնկրետ ռուսական ռազմաբազայի գոյությանը քաղաքում, (ի դեպ, Ցարական Ռուսաստանի ժամանակներից սկսված), ապա ըստ Լևոն Բարսեղյանի, գյումրեցիների մոտ որոշ զգուշավորություն մտավ:
Հիշեցնենք, որ Ավետիսյանների սպանության գործով դատական նիստը սենսացիոն դարձավ, երբ զոհերի իրավահաջորդների շահերի ներկայացուցիչները հայտարարեցին, որ Վալերի Պերմյակովը գործարք է կնքել սատանայի հետ, խոստացել է սատանային զոհաբերել երեխաների, կանանց ու տղամարդկանց, իսկ փաստաբանները միջնորդեցին նախաքննությունը և լրացնել նաև այս նոր փաստական հանգամանքներից բխող նյութերով: