13:25 Միջնորդության հետ համամիտ են մյուս փաստաբանները: Մեղադրյալ Վալերի Պերմյակովն էլ նշեց, որ իր համար տարբերություն չկա: Դատական նիստը ընդմիջվեց 30 րոպեով: 

13:17 Ավետիսյանների իրավահաջորդների շահերի պաշտպան, փաստաբան Լուսինե Սահակյանը միացավ իրավաբան Արթուր Սաքունցի միջնորդությանը` դատը Շիրակի մարզի առաջին ատյանի դատարան տեղափոխելու վերաբերյալ: Նա հավելեց, որ ռազմաբազայի տարածքում նաեւ խախտվում են Պերմյակովի իրավունքները, քանի որ վերջինս գտնվում է վանդակում, ինչը հակասում է եվրոպական բոլոր չափորոշիչներին: Սահակյանը նաեւ նշեց, որ ռազմաբազայի տարածքում դահլիճի անհարմարության պատճառով նաեւ խաթարվում  է լրագրողների աշխատանքը, ինչպես նաեւ դատավորի` հաշվի առնելով, այսպես կոչված, խորհրդակցական սենյակի անհարմարությունը: 

12:45 Պերմյակովի նկատմամբ դատը սկսվեց 25 րոպե ուշացումով: Նրան այս անգամ դահլիճ բերեցին հայ կարգադրիչները եւ ոստիկանները: Երբ դահլիճ բերվեց Պերմյակովը, Ավետիսյանների հարազատները փորձեցին հարձակվել մեղադրյալի վրա, բայց կարգադրիչներին եւ ոստիկաններին հաջողվեց հետ պահել նրանց:

Նիստը վարող դատավոր Հարություն Մովսիսյանի կողմից բարձրացվեց դատախազի եւ դատավորի ինքնաբացարկների հետ կապված հարցը: Բայց փաստաբանները նշեցին, որ այս պահին իրենք որեւիցե բան չեն կարող ասել, քանի որ հետագայում իրենք ներկայացնելու են միջնորդություն` կապված դատավորի ինքնաբացարկի հետ: Այս պահին իրավաբան Արթուր Սաքունցը ներկայացնում է միջնորդություն դատը Շիրակի մարզի առաջին ատյանի դատարանում անցկացնելու վերաբերյալ:

Վալերի Պերմյակովին մեղադրանք է առաջադրվել այն բանի համար, որ նա 2015թ. հունվարի 12-ին ՀՀ Գյումրի քաղաքում տեղակայված ՌԴ 102-րդ ռազմաբազայի թիվ 04436 զորամասի տանկային գումարտակի 1-ին տանկային վաշտի ժամկետային զինծառայող Վալերի Պերմյակովը իրեն ամրակցված ԱԿՍ-74 տեսակի,1283689 համարի ինքնաձիգով, 5,45 մմ տրամաչափի 60 փամփուշտով և 689 համարի սվին դանակով «Մալայա կրեպոստ» կոչվող տարածքում իրականացնելով պահակային ծառայություն, ժամը 02-ի սահմաններում ինքնակամ լքել է պահակակետը և հագուստներ, գումար հայթայթելու նպատակով շրջել Գյումրի քաղաքում: Ժամը 06-ի սահմաններում հասնելով Գյումրի քաղաքի Մյասնիկյան փողոցի 188-րդ հասցեի տան մոտ` զենքի գործադրմամբ ավազակային հարձակման եղանակով« ուրիշի գույքը հափշտակելու դիտավորությամբ դարպասի բաց դռնակից մտել է բակ, մոտեցել տանը« սվին դանակով մուտքի դռան ապակին հանելու և ներսի կողմից փականի վրա մնացած բանալիով դուռը բացելու միջոցով ապօրինի մուտք է գործել նշված տուն« որտեղ երկու և ավելի անձանց ապօրինաբար կյանքից զրկելու դիտավորությամբ իր մոտ եղած ԱԿՍ-74 տեսակի,1283689 համարի ինքնաձիգից ուղիղ նշանառությամբ արձակած 28 կրակոցով տեղում սպանել է նույն տան բնակիչներ Աիդա Ավետիսյանին, Հասմիկ Ավետիսյանին, Սերյոժա Ավետիսյանին, Արմեն Ավետիսյանին, Արաքսյա Պողոսյանին և մանկահասակ Հասմիկ Ավետիսյանին, ինչից հետո մանկահասակ Սերյոժա Ավետիսյանին առանձին դաժանությամբ սպանելու դիտավորությամբ, այն է` ունենալով երկու փամփուշտով լիցքավորված ինքնաձիգ և երեսուն փամփուշտով լիցքավորված պահեստային պահունակ, վերը նկարագրված եղանակով հանցավոր մտադրությունն ավարտին հասցնելու փոխարեն՝ ինքնաձիգին ամրացված սվին-դանակով հինգ հարված է հասցրել մոր գրկում անօգնական վիճակում գտնվող վեց ամսական Սերյոժա Ավետիսյանի մարմնի կենսական կարևոր օրգանների` կրծքավանդակի ձախ կեսի«, որովայնի, ինչպես նաև ձախ բազկի շրջաններում` պատճառելով կտրած-ծակած թափանցող և չթափանցող վերքեր,որոնց հետևանոքով մանկահասակ Սերյոժա Ավետիսյանը հիվանդանոցում յոթ օր անց մահացել է: