Նախորդ տարվա ամռանը կնոջ եւ 5 երեխաների հետ Արցախ ժամանեց եւ Շուշիում բնակություն հաստատեց 48-ամյա հանրահայտ ռուս գործարար ու ֆերմեր Գերման Ստերլիգովը:
Գերման Ստերլիգովը խոստացել է վերադառնալ Ղարաբաղ. ջրաղացպան
ՍՏԵՓԱՆԱԿԵՐՏ, հունվարի 20, ԱՐՑԱԽՊՐԵՍ: Գործարարը ասուլիս տվեց եւ հայտարարեց, որ Ղարաբաղ տեղափոխվելու պատճառն այն է, որ Ռուսաստանում 2011 թվականից հետապնդումների էր ենթարկվում, նույնիսկ իր դեմ մահափորձ են արել, երեխաներից մեկին փորձել առեւանգել: Ամիսներ շարունակ նա գովասանքի խոսքեր էր շռայլում Ղարաբաղի հասցեին, աշխարհի ամենաանվտանգ վայրը անվանում, գովաբանում այնտեղի օդն ու ջուրը, էկոլոգիական մաքրությունը՝ պնդելով, որ պատրաստվում է հաստատվել Ղարաբաղում:
Ստերլիգովն ասում էր, որ ինքը ԼՂՀ-ում բիզնես է հիմնելու, իսկ կինը նորաձեւության ցուցահանդեսներ է կազմակերպելու: Մարտունու շրջանի գյուղերից մեկում ջրաղաց գնեց, մեկ-երկու անգամ ալյուր աղաց, իսկ կինը մեկ ցուցահանդես կազմակերպեց՝ ներկայացնելով ռուսական տարազներ, զգեստներ:
Ապա գործարարը կնոջն ու երեխաներին հետ ուղարկեց Ռուսաստան՝ պատճառաբանելով, թե Սլոբադայում կայանալու է աներձագին պատկանող պանրի գործարանի բացումը: Ավելի ուշ Ռուսաստան վերադարձավ նաեւ ինքը՝ Գերման Ստերլիգովը:
Երեկ կրկին համացանցում հայտնվեց Ստերլիգովի անունը. Ռուսաստանի հայերի «Երկրամաս» պարբերականը տեղեկացրել էր, որ կրասնոդարցիների հետ հանդիպման ժամանակ ներկայացրել է «Ադամից մինչեւ Պուտին» գրքի 5-րդ հատորը: Պատասխանելով իրեն ուղղված հարցերին, Ստերլիգովը չի անտեսել նաեւ Ղարաբաղի թեման: Նա Ղարաբաղը անվանել է ամենաապահով վայրը մոլորակի վրա, ընդգծել մարդկանց լավագույն գծերը, եւ խորհուրդ տվել անպայման այցելել Ղարաբաղ:
Շուշիի քաղաքապետ Արծվիկ Սարգսյանը armtimes.com-ի հետ զրույցում նշում էր, որ Ստերլիգովն անհետացել է եւ նրան Շուշիում այլեւս տեսնողներ չեն լինում: Ներկայացնենք նրա հետ մեր զրույցը.
- Պարոն Սարգսյան, ամիսներ առաջ Շուշիում էր հաստատվել ռուս գործարար Ստերլիգովը: Հետո մեկնեց Ռուսաստան: Ի՞նչ տեղեկություններ ունեք, նա այցելո՞ւմ է Շուշի:
- Ինքը հիմա Շուշիում չի, ինտերնետով տեսել եմ, որ ռուսներին ու ուկրաինացիներին քարոզում է, որ Ղարաբաղը լավ տեղ է, գնացեք:
- Նա որտե՞ղ էր ապրում, երբ Շուշիում էր:
- Տուն էր վարձել, հետո չհավանեց, տեղափոխվեց հյուրանոցներից մեկը:
- Կինը էդտեղ ցուցահանդես էր բացել, պլաններ ուներ, դեռ էդտե՞ղ է:
- Չէ, ընտանիքով հանդերձ գնացել է: Ոչ մեկ չկա:
- Իսկ ինչ-որ բանից նեղացա՞վ: Որովհետեւ այդպես էլ չհասկացվեց՝ ինչու եկավ, ինչու գնաց:
- Դե բոլորին հայտնի է՝ ինչու էր եկել: Էստեղ բիզնես բացեց, գնաց: Գնալու պատճառը հայտնի չէ: Ես չեմ շփվել նրա հետ:
- Ի՞նչ բիզնես է գնել:
- Գյուղերից մեկում ջրաղաց էր գնել, ալյուր էր աղում՝ սեւ գույնի (առաջին տեսակի): Նպատակ ուներ էդ ալյուրը տեղափոխել Ռուսաստան, լավ բիզնես անել: Մտածում էր լավ առեւտուր կգնա:
- Էդտեղ ձիեր ուներ: Տեղեկություններ կան, որ գործարար Լեւոն Հայրապետյանն էր նվիրել: Ի՞նչ եղան դրանք:
- Նորից տեղափոխել են Գանձասար: Լեւոն Հայրապետյանը Գանձասարից է, էնտեղից էին բերել ձիերին, նորից տարան:
Զրուցեցինք նաեւ Ստերլիգովի ալրաղացում աշխատող Սարգիսի եւ Թաղավարդի (այդ գյուղում է գտնվում ալրաղացը-խմբ.) գյուղապետԼեւոն Ալավերդյանի հետ: Գյուղապետն ասաց, որ ինքը Ստերլիգովի մասին բավական ժամանակ չի լսել, իսկ նրա բիզնեսով զբաղվում է իրենց համագյուղացի Սարգիսը: Վերջինս տեղեկացրեց, որ ալրաղացը չի աշխատում, քանի որ ցորեն չկա: «Ցորեն չկա, որ աշխատենք: Ստերլիգովը պիտի գա, որ աշխատենք»,- ասաց նա: Մեր հարցին, թե երբ է գալու՝ Սարգիսը պատասխանեց, որ իր իմանալով արդեն պետք է եկած լիներ, բայց դեռ չկա: