Ադրբեջանում իշխանության կոռուպցիան բացահայտելու համար դատապարտված լրագրող Խադիջա Իսմայիլովայի փաստաբան Ամալ Քլունին հույս ունի, որ կկարողանա շահել Մարդու իրավունքների եվրոպական դատարանում Ադրբեջանի կառավարության դեմ գործը:
Ամալ Քլունին հույս ունի բանտից ազատել Ադրբեջանում դատապարտված լրագրողին
ՍՏԵՓԱՆԱԿԵՐՏ, հունվարի 27, ԱՐՑԱԽՊՐԵՍ-ԱՐՄԵՆՊՐԵՍ: Այս մասին, Քլունին հայտարարել է CNN հեռուստաալիքին տված հարցազրույցում:
Ադրբեջանցի լրագրողի դեմ մեղադրանքների մասին հարցին Քլունին հայտարարել է, որ այդ մեղադրանքները վերաբերվում են, իբր, հարկերից խուսափելուն, յուրացումներին եւ չարաշահումներին:
«Սակայն, իրական պատճառը` Ալիեւյան ռեժիմի մերկացումն է», -ասել է փաստաբանը:
Սկզբում նրան փորձել են մեղադրել ինքնասպանության հասցնելու, իսկ հետո այլ չհիմնավորված մեղադրանքներ են առաջադրել, ասել է Քլունին:
«Ես չեմ կորցնում Եվրոդատարանի արդարացի որոշման նկատմամբ հույսս: Դատական գործընթացին միանում են նաեւ շատ ոչ կառավարական կազմակերպություններ», -ասել է նա:
Քլունին հույս է հայտնել, կհասնի Իսմայիլովայի ազատմանը եւ կհանդիպի նրա հետ:
«Ազատություն» ռադիոկայանի ադրբեջանական ծառայության լրագրող Խադիջա Իսմայիլովան Ադրբեջանում ձերբակալվել է անցյալ տարվա դեկտեմբերի 5-ին` նախկին գործընկերոջը ինքնասպանության հասցնելու շինծու մեղադրանքով, եւ հետո «խոշոր չափերի յուրացում եւ զեղծարարության», «ապօրինի ձեռնարկատիրության», «հարկերի վճարումից խուսափելու», «պաշտոնեական լիազորությունները չարաշահելու» կեղծ մեղադրանքներով դատապարտվել 7,5 տարվա ազատազրկության:
Խադիջա Իսմայիլովան Ադրբեջանի իշխանությունների թիրախ է դարձել իր լրագրողական գործունեության համար: Իսմայիլովան հանդիսանում է Ադրբեջանում իշխանության վերին էշելոններում կոռուպցիոն փաստերի լրագրողական հետաքննությունների հեղինակ, որոնց արդյունքում բացահայտվել է նաեւ Ադրբեջանի նախագահ Իլհամ Ալիեւի եւ նրա ընտանիքի օֆշորյան գոտիներում ունեցած հարյուրավոր միլիոն դոլարիների հասնող ունեցվածքը:
Վերջին տարիներին նա թոք-շոու էր վարում «Ազատություն» ռադիոկայանի ադրբեջանական ծառայությունում:
Բանտում գտնվելու ժամանակահատվածում Խադիջա Իսմայիլովան արժանացել է Գյոթեբորգի Handels-och-Sjofarstidning (GHT) լիբերալ թերթի «Holme տարվա հերոս», միջազգային հեղինակավոր Alison Des Forges, ԱՄՆ-ի Ազգային մամուլի ակումբի Մամուլի ազատության, միջազգային «PEN/Barbara Goldsmith գրելու ազատություն» եւ Շվեդիայի ազգային մամուլի ակումբի «Աննա Պոլիտկովսկայա խոսքի ազատություն» պարգեւներին:
Foreign Policy հանդեսը Ադրբեջանում շինծու մեղադրանքներով եւ քաղաքական դրդապատճառներով դատապարտված ադրբեջանցի լրագրող Խադիջա Իսմայիլովային մտցրել է 100 գլխավոր համաշխարհային մտածողների ցուցակ:
Amnesty International-ը եւ այլ միջազգային կազմակերպություններ նրան ճանաչել են «խղճի դատապարտյալ»:
