ՀՀ էկոնոմիկայի նախարար Կարեն Ճշմարիտյանը փետրվարի 11-ին ընդունել է Չեխիայի Հանրապետության արդյունաբերության և առևտրի նախարար Յան Մլադեկի գլխավորած պատվիրակությանը, որի կազմում էին պետական և մասնավոր հատվածի ներկայացուցիչներ:
Չեխ նախարարը հայտնել է Պրահայում հայկական արտադրանքի ցուցահանդեսի կազմակերպմանն աջակցելու պատրաստակամություն
ՍՏԵՓԱՆԱԿԵՐՏ, փետրվարի 11, ԱՐՑԱԽՊՐԵՍ: ՀՀ էկոնոմիկայի նախարարության տեղեկատվության եւ հասարակայնության հետ կապերի բաժնի փոխանցմամբ՝ ողջունելով հյուրերին, Կարեն Ճշմարիտյանը համոզմունք է հայտնել, որ հայ-չեխական համագործակցության ընդլայնման համար կան դեռևս չօգտագործված հնարավորություններ` նշելով, որ կարելի է մեծացնել համագործակցության ոլորտների շրջանակը` հաշվի առնելով նաև երրորդ երկրների հետ փոխգործակցության հնարավորությունները: Էկոնոմիկայի նախարարը փաստել է երկու երկրների գործարարների միջև կոնկրետ երկխոսության անհրաժեշտությունը, ինչի համար, ըստ նախարարի, հրաշալի առիթ է չեխ գործընկերոջ այցի շրջանակում կազմակերպված հայ-չեխական գործարար համաժողովի անցկացումը: Կարեն Ճշմարիտյանը մասնավորապես շեշտել է առևտրի, արդյունաբերության տարբեր ճյուղերի, տեղեկատվական տեխնոլոգիաների, զբոսաշրջության և մշակույթի բնագավառներում համագործակցության ակտիվացումը, այդ առումով առանձնապես կարևորելով հայ-չեխական միջկառավարական հանձնաժողովի աշխատանքը և ապրիլի վերջին համատեղ երկրորդ նիստի անցկացումը: Էկոնոմիկայի նախարարն առաջարկել է նաև կազմակերպել Չեխիայում հայկական ապրանքների ցուցահանդես: Գործարարների միջև ուղղակի կապերի աշխուժացման տեսանկյունից Կարեն Ճշմարիտյանը նշել է Երևան-Պրահա-Երևան ուղիղ չվերթների վերաբացման կարևորությանը:
Կարեն Ճշմարիտյանը ներկայացրել է հյուրերին Հայաստանում տնտեսական գործունեություն ծավալելու առանձնահատկություններն ու առավելությունները, արտաքին առևտրի բարենպաստ պայմանները, խոսել Հայաստանում գործող ազատ տնտեսական գոտիներում արտադրություն կազմակերպելու հնարավորությունների մասին:
Չեխիայի արդյունաբերության և առևտրի նախարարը շնորհակալություն է հայտնել ջերմ ընդունելության համար: Յան Մլադեկը նշել է, որ Չեխիան առավելագույնս կաջակցի Հայաստանին ՀՀ-ԵՄ համագործակցության շրջանակներում: Նա ներկայացրել է Չեխիայի հիմնական մակրոտնտեսական ցուցանիշները, իր հերթին նույնպես կարևորել հայ-չեխական գործարար համաժողովի անցկացումը և պատրաստակամություն հայտնել աջակցելու Պրահայում հայկական արտադրանքի ցուցահանդեսի կազմակերպման աշխատանքներին: Յան Մլադեկի խոսքերով, Չեխական ավիաուղիների կողմից Երևան-Պրահա-Երևան չվերթները տնտեսապես արդյունավետ են համարվել և նախատեսվում է շաբաթական իրականացնել երեքական թռիչք: Չեխ նախարարը կարևորել է նաև համագործակցությունը կոնյակի և գինիների արտահանման, զբոսաշրջության և այլ բնագավառներում:
Հանդիպմանը ներկա գտնվող Հայաստանի զարգացման հիմանդրամի գործադիր տնօրենը և Չեխիայի Առևտրաարդյունաբերական պալատի փոխնախագահը ներկայացրել են իրենց կառույցների գործունեությունը:
