Կոնգրեսական Լուիզա Սլոթերն ԱՄՆ Կոնգրեսի առաջին անդամն է դարձել, ով միացել է այն օրինագծին, որը նախատեսում է պատժամիջոցների սահմանում Ադրբեջանի պաշտոնատար անձանց նկատմամբ՝ քաղաքացիների իրավունքներն ու ազատությունները ճնշելու համար:
Հայերին պետք չէ խառնել, Բաքվի մեղադրանքներն անմիտ են. ամերիկացի կոնգրեսական
ՍՏԵՓԱՆԱԿԵՐՏ, փետրվարի 12, ԱՐՑԱԽՊՐԵՍ: Այդ օրինագիծը ներկայացվել էր անցյալ տարեվերջին՝ ազդեցիկ կոնգրեսական և Հելսինկյան հանձնաժողովի ղեկավար Քրիստոֆեր Սմիթի կողմից տեղեկացնում է Tert.am-ը հղում անելով contact.az-ին։
Բաքվում այդ օրինագիծը «հայամետ» էին կոչել՝ հիշեցնելով, որ Սմիթը կողմ է հանդես գալիս 1915 թվականի Հայոց ցեղասպանության ճանաչմանը։
Սակայն Լուիզա Սլոթերին դժվար է մեղադրել հայամետ տրամադրությունների համար, քանի որ նա միշտ հօգուտ Ադրբեջանի է հանդես եկել, գրում է գործակալությունը։
Քրիստոֆեր Սմիթը մեկնաբանել է Բաքվից իր հասցեին հնչող մեղադրանքները։
««Ակտ՝ Ադրբեջանի ժողովրդավարության մասին» փաստաթուղթը որևէ կապ չունի հայերի հետ, այդ փաստաթուղթն Ադրբեջանում մարդու իրավունքների մասին է»,-ասել է նա Հելսինկյան հանձնաժողովի նիստի ընթացքում։
«Երբ շատ մարդիկ, այդ թվում՝ այնպիսի լրագրողներ, ինչպես, օրինակ, Խադիջա Իսմայիլովան, ձերբակալվում են իրենց հետաքննությունների համար, մենք նման փաստաթղթեր ենք ստեղծում։ Ալիևի կառավարության ռեակցիան դրան, ներառյալ՝ երկրի խորհրդարանինը, ապշեցուցիչ անխոհեմության դրսևորում են, և նրանց պնդումները բոլորովին չեն համապատասխանում իրականությանը»,- ասել է նա։
Կոնգրեսականը նշել է, որ նրանք, մասնավորապես, պնդում են, որ հայերն են պատվիրել այս օրինագիծը։
«Հայերն առհասարակ սրա հետ կապ չունեն, նրանք անգամ տեղյակ չեն եղել նման նախագծի մասին։ Այդ պատճառով, երբ լսում եմ, թե ինչ են ասում Ադրբեջանի խորհրդարանում, կառավարամետ լրատվամիջոցներում, նախագահի մամուլի քարտուղարը, մտածում եմ, թե որքանով են տեղեկացված այլ հարցերի մասին... Այս օրինագծի նպատակն Ադրբեջանում բարեփոխումներ իրականացնելն է, բանտերից ազատ արձակելն այն մարդկանց, որոնք հանցագործ չեն»,-ասել է Սմիթը։
Նա հավելել է, որ երբ լրագրողն ԱՄՆ-ում հետաքննություն է իրականացնում կոռուպցիայի կամ նման մի բանի մասին, մրցանակ է ստանում, իսկ Ադրբեջանում՝ բանտարկում են։
