Օրեր առաջ 93 տարեկանում մահացած, ՄԱԿ-ի նախկին գլխավոր քարտուղար Բուտրոս Ղալին մեծ ջանքել է գործադրել Լեռնային Ղարաբաղում տեւական խաղաղություն հաստատելու ուղղությամբ:
Բուտրոս Ղալին մեծ ջանքեր է գործադրել՝ հակազդելու Ադրբեջանի կողմից ԼՂ բնակչության դեմ բռնությանը. Արդունի
ՍՏԵՓԱՆԱԿԵՐՏ, փետրվարի 19, ԱՐՑԱԽՊՐԵՍ: Այս մասին հայտարարություն է տարածել Ամերիկայի հայկական համագումարը:
«Հայերը միշտ երախտապարտ կլինեն նրա աշխատանքի համար եւ կհիշեն, թե ինչպես նա դիվանագիտական միջոցներ ձեռնարկեց՝ հակազդելու Ադրբեջանի կողմից Լեռնային Ղարաբաղի ազատատենչ ժողովրդի դեմ ուղղված բռնությանը» - NEWS.am-ի փոխանցմամբ՝ հայտարարել է Ամերիկայի հայկական համագումարի գործադիր տնօրեն Բրայան Արդունին:
Հայտարարությունում նշվում է, որ 1992 թ. մարտին Բուտրոս Ղալին, որպես միջնորդ Լեռնային Ղարաբաղ է ուղարկել ՄԱԿ-ի հատուկ բանագնաց Սայրուս Վենսին: Սա ՄԱԿ-ի կողմից Լեռնային Ղարաբաղի հարցում առաջին պաշտոնական քայլն էր: Դրանից երկու շաբաթ անց Հայաստանը դարձավ ՄԱԿ-ի անդամ:
Բուտրոս Ղալին այն ժամանակ պարզաբանել էր, որ ինքն ուղարկում է իր բանագնացին տարածաշրջանի մասին տեղեկություններ հավաքելու, ոչ թե փորձում է իր վրա վերցնել ԵԱՀԽ միջնորդական ջանքերը: «Խնդրում ենք համոզված լինել, որ պարոն Վենսին ԼՂ ուղարկելու նպատակը փաստահավաք առաքելությունն է, որը կլրացնի խաղաղության որոնման ջանքերը»,-ասել է Բուտրոս-Ղալին ու հավելել. «Գերեզմանային իրավիճակն այդ տարածաշրջանում ստիպում է մեկտեղել ջանքերը, կանխել հետագա բռնությունը եւ խնդրի խաղաղ լուծման պայմաններ ստեղծել»:
Անդրադառնալով ԼՂ խնդրի կարգավորման հարցում Բուտրոս Ղալիի ջանքերին, Համագումարը հույս է հայտնել, որ նրա նվիրումը կոգեշնչի է նոր ջանքեր գործադրել ԼՂ հակամարտության կարգավորման փակուղային իրավիճակից դուրս գալու համար:
Նշվել է նաեւ, որ շփման գծում Ադրբեջանի կողմից ավելացել են հրադադարի ռեժիմի խախտման դեպքերը, որի արդյունքում 2014-2015 թվականներին հայ զինվորականների զոհերի թիվն ավելի շատ է եղել, քան դրան նախորդած 20 տարիներին՝ միասին վերցրած:
Նշենք, որ Բուտրոս Ղալին ՄԱԿ-ի գլխավոր քարտուղար է եղել 1992-1996 թվականներին: