Ըստ ընթացիկ տարվա հունվար ամսվա պաշտոնական տվյալների՝ Հայաստանի տնտեսությունում կարեւոր ձեռքբերումներ կան:
ԵՏՄ երկրներից միայն Հայաստանում է արդյունաբերական արտադրության աճ գրանցվել
ՍՏԵՓԱՆԱԿԵՐՏ, փետրվարի 23, ԱՐՑԱԽՊՐԵՍ։ Օրինակ արդյունաբերական ապրանքատեսակների ֆիզիկական ծավալն աճել է 15.7 տոկոսով: Նկատեք, որ ԵՏՄ-ում մեր գործընկեր երկրներում նոր տարվա առաջին ամիսը բավականին անբարենպաստ էր արդյունաբերության համար, հաղորդում է NEWS.am-ը:
Ռուսաստանում արդյունաբերական արտադրության ծավալը կրճատվել է 2.7 տոկոսով: Ընդ որում օգտակար հանածոների արդյունահանումն աճել է: Ճիշտ է զուտ խորհրդանշական՝ 0.7 տոկոսով: Հիմնականում դա պայմանավորված էր հում նավթի արդյունահանման աճով, որի հաշվին պետությունը փորձում էր գոնե մասամբ փոխհատուցել նավթի համաշխարհային գների զգալի անկումը: Աճել է նաեւ մի շարք այլ օգտակար հանածոների՝ այդ թվում բնական գազի արդյունահանումը: Իսկ վերամշակող արդյունաբերության ոլորտում լուրջ անկում է գրանցվել՝ 5.6 տոկոսով:
ԵՏՄ մեկ այլ անդամի՝ Բելառուսի մոտ հունվարին պահպանվել են անցած տարվա միտումները՝ արդյունաբերական արտադրատեսակների ծավալը կրճատվել է 6.8 տոկոսով: Հիմնականում դա պայմանավորված էր տրակտորների, բեռնատար ավտոմեքենաների, կոմբայնների ու գյուղատնտեսական մեքենաների արտադրության անկումով: Նկատենք, որ այդ ապրանքատեսակները հիմնականում Ռուսաստան են արտահանվում:
Ղազախստանում արդյունաբերական ապրանքների ծավալը համեմատաբար քիչ է կրճատվել՝ 0.7 տոկոսով: Ավելի մանրամասն տվյալներ դեռ չեն հրապարակվել: Բայց կարելի է ենթադրել, որ այդ երկրում նույնպես շարունակվել են անցած տարվա բացասական միտումները, երբ լուրջ անկում էր գրանցվել սննդի արդյունաբերության մեջ: Տեղացի փորձագետները դա պայմանավորում էին ազգային շուկայում ավելի էժանագին ռուսական ապրանքատեսակների աճող դերակատարումով: Դրան հավելենք նաեւ մի շարք ապրանքների արտադրությունում սկսված անկումը, ինչը պայմանավորված է դեպի Չինաստան դրանց արտահանման կրճատումով:
ԵՏՄ-ում հակառեկորդը Ղրղզստանն է սահմանել, որտեղ արդյունաբերական ապրանքների ծավալը կրճատվել է 40.7 տոկոսով: Ընդ որում վերամշակող արդյունաբերության ոլորտում անկումը հասել է 50.8 տոկոսի: Արդյունաբերության մեջ նման հսկայական հետընթացը բացատրվում է թանկարժեք մետաղների արտադրության զգալի կրճատումով: Վերջինս էլ իր հերթին անմիջական կապ ունի երկրում ոսկի արդյունահանող խոշորագույն ձեռնարկության՝ «Կումտորի» գործունեության հետ:
Ստացվում է, որ Հայաստանը դարձել է ԵՏՄ միակ երկիրը, որտեղ արդյունաբերությունը կարծես թե չի ճահճացել: Բայց եթե դատենք վերջին ժամանակների միտումներով՝ ապա պարզ կդառնա, որ այս հաջողության առյուծի բաժինը ապահովել է մետաղների արդյունահանումը:
Անցած տարի տվյալ ոլորտը հարաբերականորեն արագացրեց արդյունաբերական արտադրության տեմպերը՝ 7.5 տոկոսով: Իսկ ահա առաջատար ոլորտը՝ վերամշակող արդյունաբերությունը, հակառակը, «նպաստեց» ընդհանուր ցուցանիշի դանդաղեցմանը 3.7 տոկոսով: Այս հարցում ԵՏՄ երկրների հետ նմանություն կա: Հավելենք, ո ր մետաղները ( հիմնականում ապարներն ու խտանյութերը) գրեթե ամբողջությամբ արտահանվում են երրորդ երկրներ:
Սմբատ Գրիգորյան
