ՆԱՏՕ-ի գլխավոր քարտուղար Յանս Ստոլտենբերգը Հայաստանի արտաքին գործերի և պաշտպանության նախարարներ Էդվարդ Նալբանդյանի ու Սեյրան Օհանյանի հետ Բրյուսելում կայացած հանդիպման ընթացքում շնորհակալություն է հայտնել Հայաստանին` Աֆղանստանում և Կոսովոյում ՆԱՏՕ-ի առաքելություններին ցուցաբերած աջակցության համար:
Յանս Ստոլտենբերգը շնորհակալություն է հայտնել Հայաստանին` Աֆղանստանում և Կոսովոյում ՆԱՏՕ-ին աջակցելու համար
ՍՏԵՓԱՆԱԿԵՐՏ, 10 մարտի, ԱՐՑԱԽՊՐԵՍ: ՆԱՏՕ-ի լրատվական բաժնի հաղորդմամբ` նախարարներ Նալբանդյանը և Օհանյանը հանդիպումներ են ունեցել նաև Հյուսիսատլանտյան դաշինքի երկրների դեսպանների հետ, որի ընթացքում քննարկվել են դաշինքի հետ Հայաստանի համագործակցության և տարածքաշրջանային անվտանգությանն առնչվող մի շարք հարցեր:
ՆԱՏՕ-ի գլխավոր քարտուղարը ողջունել է Հայաստանի հանձնառությունն իրականացնելու ՆԱՏՕ-ի բարեվարքության ամրապնդման ծրագիրը, ինչպես նաև կյանքի կոչելու ՄԱԿ-ի Անվտանգության խորհրդի 1325 բանաձևը (Կանանց, խաղաղության և անվտանգության խնդիրներին առնչվող բանաձև):
Յանս Ստոլտենբերգը շեշտել է նաև դաշինքի հետ Հայաստանի շարունակական համագործակցության փաստը պաշտպանական բարեփոխումների, պաշտպանական ոլորտի կրթության, ինչպես նաև արտակարգ իրավիճակներում քաղաքացիական ծառայության գործարկման ոլորտներում:
ՆԱՏՕ-ի հետ համագործակցության շրջանակներում ներկայումս Հայաստանն իրականացնում է իր չորրորդ Անհատական Գործընկերության Գործողությունների Ծրագիրը (2014-2016թթ.):
2004թ-ից սկսած Հայաստանի խաղաղապահ ստորաբաժանումները մասնակցում են ՆԱՏՕ-ի խաղաղության հաստատման գործողություններին. ներկայումս Հայաստանը շարունակում է աջակցել իր խաղաղապահ զորքերով Կոսովոյում Կոսովոյի Ուժեր/KFOR առաքելությանը, ինչպես նաեւ 2015թ. հունվարից Աֆղանստանում «Հաստատակամ աջակցություն» առաքելությանը (2010թ-ից մինչեւ 2014թ. դեկտեմբերը Հայաստանը մասնակցել է Աֆղանստանում Միջազգային Անվտանգության Աջակցության Ուժերի (ISAF) գործողությանը): Հայաստանի ներգրավվածությունը խաղաղության հաստատման գործողություններում հնարավորություն տվեց նրան դառնալու անվտանգության սպառողից անվտանգության ներդրողի:
